2 KORINT DIM 7

1M zuanoŋa, noorzi'ela bama ane ti din. Dinzugo keli ka ti bas si'el wusa line ket ka ti niŋgbina ne ti siis a dian'ad la, ka lieb nyain. Keli ka ti na'as Wina'am ka ke ka ti aa o nidib ka a su'um nyain. 2Keli ka ya noŋilim ti sa'an nobug bedego. Ti pu tum so' be'ede, ka pu sa'am so' yadda niŋire, ka pu noki ti tuuma zug n di'e si'el so' sa'ane. 3M pu bood ye m yeli ya ye ya tum be'ede; ka m deŋin yel ye tiname noŋi ya si'em la ane bedego. Ka li ya'a a ye ti kpine bee ti voe ti ku bas ti noor yinni laa. 4M mi' ya poog su'uŋa ka mor nyeesim ya yela. Ti yeltood wusa poogin m mor sukpi'euŋ ne sumalisim bedego. 5Hale ne tinam daa paae Masedonia teŋin la, ti daa pu nye vu'usum. Yeltood daa be zin'is wusa ka zaba me be. Ka ti meŋ mor dabiem ti sunfin. 6Ka Wina'am one ket ka bane mor susa'aŋ la nye kpe'eŋir la daa ke ka Titus kena, ka ti sunf kpe'eŋ, 7ka li ka'ane o ken la na ma'anee, amaa on daa yeli ti yaname daa kpe'eŋ o sunf si'em la. O yeli ti ye ya bood hale ye ya nyee m ka mor susa'aŋ ne line daa niŋ la ye ka so' ya'a pian'a be'ed man yela, yanam yiti kpe'eŋi ya meŋ n lebis su'um man yela. Ka dinzug ka m sumalisim maligim paas bedego. 8Hale la'am ne gbauŋ kan ka m daa sob la daa sa'am ya sunya la, m sunf pu sa'am man sobi li laa. M nye ka m gbauŋ la daa sa'am ya sunya, amaa li ane saŋa bi'ela. 9Ka m mor sumalisim nannanna, ka li ka'ane man daa ke ka ya sunf sa'am la yelaa, ka ane ye ya susa'aŋ la daa ke ka ya tiake ya sueya la zug. Susa'aŋ kaŋa ane susa'aŋ lin ka Wina'am tisi ya, ka dinzug ka gbauŋ kane ka ti daa sob la pu ke ka ya nye be'ede. 10Susa'aŋ lin ka Wina'am tisid la ket ka nidib tiakedi ba sunya ka lin na ke ka ba nye faangir. Ka susa'aŋ ku be ne'eŋa nii. Ka dunia susa'aŋ dolne ku'um. 11Ya nye Wina'am n ke ka ya susa'aŋ dol suer si'a. Li daa ke ka ya ten'es line daa niŋi ya sa'an la yela ne nimmua, ka ke ka ya bood bedego ye ya pa'al ye ya ka' taal yelkaŋa nii, ka ke ka ya sunf due, ka ya zot dabiem, ka bood ne ya sunya wusa ye ya nyee m ka bood ye ya niŋ line a su'um, ka kpe'eŋi ya meŋ ye ya saans one tum tuumbe'ed kaŋa la. Ya pa'aleya ye ya ka' taal yelkaŋa wusa nii. 12Hale ne man daa sobi ya si'em la, man daa pu sobi li one tum tuumbe'ed kaŋa bee on ka o maal be'ed tis o la zugo, ka lee sobi li ye li ke ka ya baŋ su'uŋa Wina'am tuon yaname noŋi ti si'em bedego la. 13Dinzugo ti nye sukpi'euŋ ka me nye sumalisim bedego. Titus mor sumalisim yaname ke ka o susa'aŋ naae la zug. Ka lin ke ka ti sumalisim paas bedego. 14M daa nwe'e nyo'og ya yela Titus sa'an ka ya me pu diis m nyane. Ti yiti pian'ad sida tisidi ya. Ka ala men tiname pian'ad si'el n nwe'ed nyo'og ne Titus la daa sid a sida. 15Ka Titus tenr yaname wusa kpe'eŋi ya meŋ n siak m noor ka di'e o ne zotim si'em la. Ka dinzug ka o noŋilim ya sa'an nobugid bedego. 16M mi' ye ya na niŋ si'el wusa lin ka m yeti ya la. Ka dinzug ka m mor sumalisim.

will be added

X\