2 KORINT DIM 6

1Tiname tum ne taaba Wina'am ni la, ti belimi ya ye yanam bane di'e Wina'am popielim piini la da ke ka li a zaalim ya sa'ane. 2Bozugo Wina'am da yel o gbauŋin ye, “Saŋkan ka m siak ye m tisi ya m yelsum la, ka m wumi ya sosug. Ka faangir daar la ka m suŋi ya.” M na yeli ya ye saŋa kan ka Wina'am siak ye o tisi ya o yelsum la ane nannanna nwa, ka faangir daar la a zina. 3Ti pu niŋid si'el line na vi'i so' suer ka ba luu, ka so' da nye taali ti tuuma nii. 4Ka lin wusa ka ti nyet la pa'al ye ti ane nimbane tum Wina'am tuuma su'uŋa. Ti daa nyet daamug ne fara ne yeltood. 5Ka ba daa bu'udi ti ka loodi ti sarega ni. Ka nidib bedego giligi ti n kisi ti. Ka ti daa tum tuumkpi'ema bedego, ka daa pu gbisida. Ka ko'om daa more ti. Ti daa modig bama ni wusa. 6Ti niŋir wusa a nyain. Ka lin ne ti mi'ilim ne ti modigir ne ti yelsum ne Wina'am Siig Suŋ ne ti sida noŋilim 7ne ti sida pian'ad ne Wina'am paŋ la wusa pa'al ye ti ane nimbane tum o tuuma su'uŋa. Ti mor popielim wuu zaba la'ad line be datiuŋ ne dagobug, 8ka nyet na'asi ne nyan ne tu'ud ne zun'or. Ba niŋidi ti wuu dama'anam ka ti lee a sida dim, 9ka niŋidi ti wuu ba zi'i tii amaa nidib bedego mi'i ti, ka niŋidi ti wuu ti kpine ka ti lee mor nyovur, ka namisidi ti ka ti lee pu kpii. 10Ka ti mor susa'aŋ ka me yiti mor sumalisim, ka a noŋdim ka lee ke ka nidib bedego di'ed yelsum bedego, ka pu mor si'el dunia nwa nii, ka lee mor si'el wusa Wina'am tuon. 11M zuasuma bane be Korint teŋine, ti pie ti poog n pian'ad, ka noŋi ya ne ti sunf bedego. 12Tiname noŋi ya si'em la ka' bi'elaa. Ka li ane yanam noŋilim pu zu'e tinam sa'anee. 13M pian'adi ya wuu ya ane m biis, ye ya me noŋi ti ne ya sunf wusa wuu tiname noŋi ya si'em la. 14Da mor noor yinni ne bane ka' yadda niŋidib la ye ya niŋ si'ela. Popielim ne be'ed ku nyaŋe la'as taabaa. Ka li ku nyaŋ a lik ka a neesim saŋa yinnii. 15Ka Kiristo ne Sutaana ku nyaŋe siak taaba noore. Ka one a yadda niŋid ku nyaŋe mor noor yinni ne one ka' yadda niŋida. 16Ka Wina'am pu'usug yir ku nyaŋe a yinni ne badaa. Tinam meŋ ane Wina'am one voe la yir. Li dolne Wina'am da yel o gbauŋin si'em la ye, “M na bee ba soogin ka la'am ken ne ba. M na aa ba Wina'am. Ka ban na aa m nidib.” 17Ka dinzug ka Zugsob Wina'am one mor paŋ n gaad si'el wusa la da yel o nidib ye, “Yimi bane ka' m nidib la soogin, ka baki ya meŋ ne ba. Da si'is bun line a dian'ade, ka m na di'e ya.” 18“M na aa ya Ba' ka yanam me aa m biribis ne m bipumis.”

will be added

X\