2 KORINT DIM 5

1Ti niŋgbina wenne fudoog ne. Ka ti mi' ye li ya'a ti sa'am ti na mor niŋgbin si'a arazana ni ka li wenne doog. Ka li ane Wina'am mee li, ka ka' ninsaaliba. Ka li na be yuma ka li ka' naare. 2Ti mor susa'aŋ dunia nwa ni ka bood ne ti sunf wusa ye Wina'am na noki ti arazana niŋgbiŋ la n yeeli ti wuu fuug ne. 3Bozugo ti ya'a ye' arazana fuug la ti ku ken bi'el la. 4Tiname be ti dunia niŋgbinin la, ka ti mor daamug ti sunfin ka si'imi li zug. Li ka'ane ye ti pu bood ye ti mor ti dunia niŋgbiŋ laa, ka ane ye ti bood ye Wina'am noki ti arazana niŋgbiŋ la n yeeli ti bozugo vum na nyaŋ niŋgbiŋ line na kpi la. 5Li ane Wina'am ti'ebi ti ye ti nye tiaker kaŋa, ka tisi ti o Siig Suŋ ye li pa'al ye ti na di'e on ye o tisi ti si'el la wusa. 6Dinzugo ti yiti mor sukpi'euŋ bedego, ka mi' ye ti ya'a be ti dunia niŋgbinin, ti ka' Zugsob sa'an arazana nii. 7Ka li ka'ane tiname nyet o la ke ka ti dol oo, ka ane ti yadda niŋir yela. 8Ti mor sukpi'euŋ bedego ka na boodin ye ti basin ti dunia niŋgbiŋ la ka moren ti arazana niŋgbiŋ la n be Zugsob sa'an. 9Aa to, ti ya'a be arazana ni bee ti dunia niŋgbinin ti bood bedego ye ti ma'ae Zugsob la sunf. 10Li nar ka ti wusa na zi'e Kiristo tuon ka on na kadi ti saria, ka na tis on mekama on nar ne o di'e si'em la. Ka li ya'a a su'um bee be'ed, li dolne on tum si'em dunia nwa ni. 11Dinzugo tiname zot Zugsob la dabiem ne ti sunf wusa la zug ka ti mood ye ti ke ka nidib siak Wina'am. O mi' tinam a si'em su'uŋa. Ka m mor poten'er ye yanam me mi' ya sunfin tinam a si'em la. 12Ti pu lem mood ye ti yeli ya tinam su'um yela ya'asa. Ti lee mood ye ti ke ka ya mor si'el na nwe'e nyo'og ti yela. Ka ya mor si'el na yel nimbane nwe'ed nyo'og ban a si'em ka nidib nyeti li paalo la, ka ka'a ban a si'em ba sunfinee. 13Ti niŋir ya'a a wuu geenmis tuuma, li ane Wina'am yela. Ka ti ya'a pu geenm li ane yanam meŋ zug. 14Kiristo noŋir so'e ti ka ti baŋ su'uŋa ye dau yinni da kpi tis nidib wusa, ka dinzug ka nidib wusa da la'am kpi ne o. 15Ka me baŋ ye o da kpi tisi ba ye bane mor vumpaal o zug la ku lem voe ye ba niŋ ba meŋ boodim, ka lee voe ye ba niŋ on, one kpi ka vu'ug kumin n tisi ba la boodim. 16Tiname ten'es nidib a si'em la, pu len dolne ti ninsaalib potendaa. Hale la'am ne tinam daa ten'es Kiristo a si'em la da dolne ti ninsaalib potenda la, ti pu len niŋid alaa. 17So' ya'a a yinni ne Kiristo, Wina'am maal o ka o a nimpaal. Ka o boodim kudug la gaadeya, ka o yu'un mor boodim paal. 18Wina'am niŋi li wusa ka naali ti ne o meŋ, ka li yine Kiristo ni na, ka tisi ti tuuma ye ti ke ka nidib me naal ne o. 19Ti labaar ane ye Wina'am da be Kiristo ni ka da naal dunia dim ne o meŋ ka yiisi ti tuumbe'edi bas, ka gu'uli ti o naaluŋ labaar la. 20Dinzug ka ti zi'e Kiristo zi'a n pian'ad. Ka Wina'am belim nidib, ka li yine tinam sa'an. Ti zi'e Kiristo zi'a ka belimi ya ye ya naal noor ne Wina'am. 21Kiristo pu mor tuumbe'ede. Ka Wina'am da ke ka o di'e ti tuumbe'ed zan'asa ye tinam lieb yinni ne o la, ka ti na di'e Wina'am popielim.

will be added

X\