2 KORINT DIM 4

1Wina'am zoti ti nimbaanlig ka tisidi ti tuumkaŋa, ka dinzug ka ti pu sin'igida. 2Ti zan'asne ye ti dol nyan ne yelsua'ada tuuma wusa, ka me pu ma'ad nidibaa, bee tiaked Wina'am pian'ad ye li dol ziri sueyaa, ka lee pian'ad yelsida paalo ni, ka niŋidi li Wina'am tuon, ka ke ka nidib ya'am line mi' su'um ne be'ed la baŋ ye ti niŋid line a su'um. 3Labasuŋ line ka ti moon la ya'a sua'ane, ka li a wuu pien ligili li, li sua'ane bane bodig la sa'an ma'aa. 4Sutaana one so'e dunia nwa la ke ka bane pu niŋ Wina'am yadda la ya'am a lik, ka ba ku nyaŋe baŋ labasuŋ Kiristo na'am yela laa, one a wuu Wina'am a si'em wusa la. 5Ti pu mooni ti meŋ yelaa, ka lee moon ye Yesu Kiristo a Zugsob, ka ye tinam tumi tisidi ya Yesu zug. 6Wina'am da yel ye, kel ka li nie nyain likin. Ka li ane one ke ka li a nyain ti sunfin n ke ka ti baŋ Wina'am na'am pipilim line ka ti nye Kiristo sa'an la su'uŋa. 7Ka baŋir kaŋa la wenne si'el line ligidi zu'e bedego, ka ba sua'a li dukin. Ka tinam wenne duk la, ye li pa'al ye paŋtita'ar line ka li mor la ka'a tinam dine, ka lee ane Wina'am bun. 8Ti nyet daamug si'el wusa ni ka ti sunf pu sa'amida, ne yelpakir ka pu basi ka kpelim mor poten'er ye ti na yii li ni, 9ka nyet namisug ka Zugsob la pu basidi tii, ne demis ka ti pu kpii, 10ka yiti nyet namisug ti niŋgbina ni wuu Yesu da kpi si'em la ye nidib na nye o nyovur ti niŋgbina ni. 11Ti vum saŋa wusa ka ti yiti nyet namisug line zemis ne kum Yesu zug, ye nidib na nye o nyovur ti niŋgbina line na kpi la ni. 12Aa to, ku'um tumi ti sa'an, amaa vum tumi yanam sa'an. 13Li sob Wina'am gbauŋin ye so' yel ye, “Man niŋ Wina'am yadda la zug ka m pian'ad.” Tinam meŋ niŋ Wina'am yadda wuu on niŋ si'em la ka ti yadda niŋir zug ka ti me pian'ad. 14Ka mi' ye Wina'am one vu'ugi ti Zugsob Yesu kumin la, me na vu'ug tinam meŋ ne o, ka la'ase ti ne yanam n more ti keŋ o tuon. 15Li wusa ane yanam su'um nyeeb zug. Ka Wina'am popielim yadigid ka nidib nyee li ka paasid, ka ala ka ba bareka pu'usug la me paasid n tisid Wina'am na'asi. 16Dinzugo, ti pu sin'igida. Hale la'am ne ti ninsaal niŋgbina sa'amid la, Wina'am ket ka ti meŋ nyet vumpaal ti sunfin beog beog. 17Namisug line ka ti nyet la ane bi'ela ka na gaad, ka lee ke ka ti na nye na'asi tita'ar line ka'a naare, ka gati ti namisug la bedego, ka ti ku nyaŋe maki li ne ti namisug laa. 18Ti noki ti sunf n lo ne bun lin ka ti pu nyetaa, ka ka' ne bun lin ka ti nyeta. Bun lin ka ti nyet la ku ya'as naare, ka lin ka ti pu nyet la na be yuma ka li ka' naare.

will be added

X\