2 KORINT DIM 3

1Ya ten'es ye ti lem pin'ili pian'ad tinam a su'um la yela bee? Ka ten'es ye ti wenne ninsieba ka bood gbana line na pa'ali tinam a su'um si'em la yela ye ti tisi ya bee? Ka bood ye ya sob gbauŋ kan la buudi ye ti tis ninsiebaa? 2Yanam meŋ wenne gbauŋ kaŋa ne. Ka nidib wusa nyaŋe nyee li ka karemi li. Ka ti noŋi ya bedego. 3Li nie paalo ye Kiristo meŋ sob gbauŋ kaŋa la ye ti tolisi li. Ka o pu nok si'el sob kuglamir zugo, ka lee nok Wina'am one voe la Siig Suŋ n sob ninsaalib sunfin. 4Ti mi' ye Wina'am niŋid ala, ka ti mi'ilim yit Yesu Kiristo ni na. 5Ka si'el kae' ti ni n ke ka ti tun'e yel ye ti nar ye ti tum tuumkaŋaa. Li ane Wina'am ke ka li nar ye ti tumi li, 6ka me nar ye ti tum nonaar paal tuuma la. Nonaar paal la ka'ane wada kan ka ba sobe, ka lee yine Wina'am Siig Suŋ ni na. Ka wada dine sob la dolne ku'um, ka Siig Suŋ la tisid nyovur. 7Wina'am da tis wada line ta'asid ku'um ka o da kpi'a li sobir kuglamir zug la, ka o na'am pipilim nie nyain li tisibin la. Ka Moses nindaa pelig ka nyeen pil pil, ka Israel dim pu nyaŋe gosi lii, la'am ne pipilim la da sied la. Wada line ta'asid ku'um la sadigim da mor pipilim anwa la, 8labasuŋ line tisidi Wina'am Siig Suŋ la ku mor pipilim n gaad ala bee? 9Ka wada line ke ka nidib li kumin la ya'a da mor pipilim, labasuŋ line ke ka ti a popielim dim Wina'am tuon la ku peligi gaad ala bee? 10Sida, pipilim line be nannanna nwa gaad pipilim line da be la bedego, ka dinzug ka pipilim line da be la lieb zaalim. 11Line ku ya'as naar la ya'a da mor pipilim, line be nannanna nwa ka ku naae laa, ku mor pipilim bedego n gaad ala bee? 12Tiname mor ti'ir kaŋa la zug, ka ti sunf kpi'em, 13ka ti pu wenne Moses one da nok pien lus o nindaa ye Israel dim da nyee o nindaa pipilim line sied la naare. 14Ka Israel dim la me mor ya'am lik. Ka saŋkan la n ti paae zina, ka ba ya'a karem nonaakudug gbauŋ la, li wenne pien la nan kpelim be, ka ba pu gban'ed ban karem si'el la gbin ne. Kiristo ni ma'aa, ka pien la na bodig. 15Sida, saŋkan la n ti paae zina, ba ya'a karem Moses gbauŋ la, pien la nan kpelim ligil ne ba ya'am. 16Ka so' ya'a bas ka dol Zugsob la, pien la na bodig o ni. 17Ka Zugsob on ka ba dol la ane Wina'am Siig Suŋ. Ka Zugsob Siig Suŋ la be si'el la, yolisim me be anina. 18Pien pu ligil tinam bane wusa dol Zugsob la nindaase. Ka Zugsob la na'am pipilim nie ti ni, ka tiakedi ti ye ti wenne on a si'em la. Ka o na'am pipilim bee ti ni n nobugid bedego bedego. Ka li wusa yi ne Zugsob one a Siig Suŋ la ni na.

will be added

X\