2 KORINT DIM 12

1Li nar ka m nwe'e nyo'og, hale la'am ne nyo'og nwe'eb la ka' nyood laa. Ka m ye m pian' si'elnam line ka Zugsob la ke ka m nye ka li wenne zaansuŋ ne, ne yelsua'ada line ka o ke ka ba nie ka m baŋi ba. 2M mi' so' Kiristo ni, ka yuma piinanaasi line da gaad sa la, ka Wina'am da nok o du arazana ni agol. M zi' o sid da du ne, ne o niŋgbinaa, bee o zaansimne nyee lii, Wina'am ma'aa mi'. 3Ka m mi' ye niŋkaŋa da du Wina'am sumalisim teŋin agol, ka lee zi' ye o sid da du ne, ne o niŋgbina bee o zaansimne nyee lii, Wina'am ma'aa mi'. 4Ka dau la wum si'elnam anina, line ka o ku nyaŋe yel, ne line ka ninsaal pu mor suer na yel laa. 5Ka man na nwe'e nyo'og dau kaŋa yela ka lee ku nwe'e nyo'og m meŋ yelaa. Asee bun line pa'al ye m ane tadim la yela ma'aa ka m na nwe'e nyo'og. 6Ka m ya'a boodin ye m nwe'e nyo'og m naan ku aan yalim, man pian'adin sida la zug. Ka m lee ku niŋi lii, ka so' ti ten'es m su'um yela n gaad on nye ka m niŋ si'em ne on wum man yel si'em la. 7Si'el be m niŋgbinin ka m laafe po'og, lin ket ka m pu nyaŋed nwe'ed nyo'og ne yelsua'ada titada line ka Wina'am nie m laa. Ka line zabidi m niŋin la yi ne Sutaana sa'an na n daamid m ye li ke ka m ku nyaŋe nwe' nyo'ogo. 8Noor atan' ka m sos Zugsob ye o yiisimi li m sa'an. 9Ka o lebisi m ye, “Man yelsum la siak uf, ka fun ka'a paŋ saŋsi'a la ka m pa'ane m paŋi zem si'em.” Dinzug m mor sumalisim ka nwe'ed nyo'og ne man pu kpi'em la ye Kiristo paŋ na bee m sa'an. 10M ya'a pu kpi'ema, bee nidib ya'a tu'ud m bee m ya'a nyet yeltood bee namisug bee daamug Kiristo zug, m mor sumalisim. Mam ka'a paŋ la, lin ket ka m mor Kiristo paŋ, ka linzug ka m mor sumalisim. 11M niŋid wuu yalim ne. Ka li ane yaname ke ka m aa ala. Yanam naan pa'alin mam a su'um si'em. Hale baa m ya'a a zaalim, li ka' ye m pu a su'um n paae nimbane ka ya ten'es ye ba a Tumtumnib ka a su'um galis laa. 12M daa modigi niŋ bunnyalima ne tuumtitada ya sa'an line pa'al ye m sid ane Kiristo Tumtum. 13Ka ya di'e yelsum ka li zemis ne Wina'am nidib sieba n di'e si'em la. Yelsum kan ma'aa ka ya pu di'e ane ye, m pu ke ka m meŋ yela daami yaa. M belimi ya ye ya tisi m suguru m taal kaŋa yela. 14Noor atan' daan nwa ka m ti'ebid ye m kena kaae ya. M noŋi ya ka bood ye ya me noŋi m, ka pu bood ye m di'e ya ligidi, ka ku ke ka m yela daami yaa. Yanam wenne m biis ne. Ka li ka' ye biise na diisi ba saamnama, ka ane ye saamnami na diisi ba biis. 15M na mor sumalisim ka nok m so'olim ne m meŋ wusa n tis, ye m suŋi ya. Man noŋi ya bedego la zugo, yanam na noŋi man bi'ela bee? 16Ya sieba yet ye, li a sida ye m yela pu daami yaa. Ka ye m lee more ya'am, ka nyaŋe ya ne dama'am. 17M daa pu ke ka nimbane ka m tumi ya sa'an la so' so' zami ya n di'e si'el ya sa'an n tisi ma. 18M daa belim Titus ye o keenn ya sa'an na, ka ke ka ti ba'abiig so' la'am dol o. Titus daa pu zami ya n di'e si'ela. Bee m ma'anee? Ka mam ne Titus tum ne poten'er yinni, ka dol suer yinni. 19Ya ten'es ye tinam yet ne'eŋa wusa la, ti mood ye ti pian' yiisi ti meŋ ya sa'an bee? Ayei, ti pu niŋid alaa. Ti pian'ad gbauŋin nwa ne Wina'am tuon lin ka Kiristo bood ye ti pian' la. Ka li wusa ane ye ti suŋ yanam bane aa ti ba'abinoŋa la. 20M zot dabiem ye m ya'a keenn ya sa'an na, m pa'ati nye ka ya pu wenne wuu man boodin ye ya aan si'em laa, ka ya me na nye ka mam meŋ ku niŋ wuu yanam boodin ye m niŋin si'em la mene. Ka m pa'ati nye ka ya zabid ne taaba ka nyuun, ka ya sunf dued ne taaba, ka ya weligid ne taaba, ka sa'am ya taaba zut, ka keend taaba, ka niŋid yood yoodi, ka mor nyeesim. 21M lem zot dabiem ye m ya'a lem kena Wina'am na diisi m nyan ya tuon, ka m sunf na sa'am ne ya sieba bane daa tum tuumbe'ed ka nam pu tiake ba sunya ne tuumbe'ed ne dian'ad tuuma ne nya'amis line ka ba daa tum la yelaa.

will be added

X\