2 KORINT DIM 11

1M mor ti'ir ye ya na di suguru ne m yalimis la bi'ela, amaa ya pun di suguru ne li. 2M nyuune ya yela wuu Wina'ami nyuune ya yela si'em la, li wenne dau one gur po'a'eliŋ one zi' dau la, ka ti ke ka o kul sid. Ka yanam wenne po'a'eliŋ la, ka o sid la me wenne Kiristo ne. 3M zot dabiem ye ya potenda na tiak ka ya bas ka ku tia' ye ya dol Kiristo su'uŋa ne ya sunf yinnii, ka wenne Eve one ka waaf la da ma' o ne o ya'ambe'ed la. 4Ka so' ya'a keenn ya sa'an na ka moon Yesu so' yela, ka li ka' Yesu one ka ti mool la yelaa, bee ya di'e siig kane be li kon' ne line ka ya pun di'e la, bee ya di'e labasuŋ line be li kon' ne line ka ya siak la, ya na yiti modig ka di suguru ne ba. 5M pu ten'es ye m ane nya'aŋ nid ne Tumtumnib bane ka ya ten'es ye ba a su'um galis laa. 6Hale ne man pu zamis nomi'ilim pian'ad la, m lee mor baŋir. Ti yele ya nyain si'el wusa poogin. 7M daa mool Wina'am labasuŋ la ya sa'an, ka daa pu ke ka ya yo si'ela, ka sie m meŋ ye yanam lee du. Ya ten'es ye man daa tum si'el la, a be'ed n tisi ya bee? 8M daa di'e ligidi Wina'am nidib sieba sa'an ye m suŋi m meŋ ka lee tum tisi ya. 9Ka man daa be ya sa'an ka m boodim a si'em wusa, m daa pu daami yaa. Amaa li daa ane ti ba'abiis bane yi Masedonia ni la daa tis man bood si'el wusa. Man daa pu daami ya si'el ni la, m na kpelim a ala ne dabisbane be tuon la. 10Li a sida ye m mi' Kiristo yelsida ka doli li. Ala li me a sida ye so' ku ke ka m sin m noor Akaia teensin nyo'og nwe'eb kaŋa yelaa. 11Bo ka m yel anwaa? Man pu noŋi ya la zug bee? Ayei. Wina'am mi' ye m noŋi ya. 12M na kpelim niŋ man niŋid si'em la nannanna ye m ke ka ziri dim la ku nye suer n nwe'e nyo'og n yel ye ba tum wuu tiname tum si'em laa. 13Nimbama nwa buudi ane nimbane ma'ad ye ba ane Tumtumnib, ka ma'adi ba tuuma yela ka tiake ba meŋ n tu'as wuu Tumtumnib bane ka Kiristo sid tum la. 14Li ka' yelsaaŋa. Hale Sutaana tun'e tiak o meŋ n tu'as wuu malek suŋ ne. 15Dinzugo, Sutaana tumtumnib ya'a tiake ba meŋ n tu'as wuu nimbane tum popielim tuuma la, li ka' bunnyalimaa. Ba daar ya'a ti paae, ba na di'e line nare ba tuuma la a si'em. 16M ye m yel din ka m pun yeli ya ye, so' da ten'es ye m ane zolugo. Amaa ya ya'a ten'es ye m sid ane zolug, yanam dimi m suguru wuu yaname yiti dit zolug suguru si'em la, ka m na nyaŋe nwe'e nyo'og bi'ela. 17Man yel si'el nannanna la pu yit Zugsob sa'an naa. Ka li ya'a aa m nyo'og nwe'eb la ni, m pian'ad wuu zolug ne. 18Ka nidib bedego sadigim nwe'e nyo'og ba dunia bun yela la, mam me na nwe'e nyo'og. 19Yaname sadigim a ya'am dim bedego la, ya yiti dit suguru ne zon! 20So' ya'a tansi ya wuu ya ane ba yamis, bee di'e si'el ya sa'an yanam na'asidi ba la yela, bee more ya ba nu'usin, bee ziemi ya, bee nwe'e ya tampian'as, ya yiti modig ka di suguru ne ba. 21Line kpen'esi m nyan la ane ye ti daa tadigne, ka m me siake li. Ka so' ya'a mor sukpi'euŋ na nwe'e nyo'og ne si'el yela, mam me mor sukpi'euŋ na nwe'e nyo'og li yela. M pian'ad ne wuu zolug ne. 22Ba ya'a nwe'e nyo'og n yel ye ba ane Hibiru dim bee Israel dim bee Abraham yaas, man me tun'e lebis ye man me ane ba yinni. 23Ba ya'a yel ye ba ane Kiristo tumtumnib m tun'e lebis ye man a Kiristo tumtumsuŋ n gaadi ba. M pian'ad ne wuu one ka'a ya'am ne. Mam tum bedego n gaadi ban tum si'em la. Ka ba kpen'esi m sarega noor bedego n gaad bam kpen'esi ban si'em la. Ka ba fi'ebi m noor bedego n gaad bam fi'ebi ban si'em la. Ka saŋa bedego ka m pu lal ne ku'um. 24Noor anu ka Jew dim fi'eb man ne kpa'asa noor piistan' ne awai. 25Noor atan' ka Room dim bu'u m. Ka noor yinni ka nidib lob man ne kuga. Noor atan' ka m be aaruŋin ka li tua tampiins ka sa'am ateukun. Ka noor yinni ka m be ku'omin la dabis mum. 26M daa nye yeltood m goondim ni. Ku'om daa ye li di man, ka faandib giŋi man ye ba faann m la'ad. Ka m Jew dim taaba ne bane ka'a Jew dim mo' ye ba sa'am man. Ka m nye yeltood ateuk poogin. Ka zam ba'abiis mo' ye ba sa'am man. 27M daa tum tuum kpi'ema. Ka noor bedego ka m pu gbisida. Ka ko'om ne ku'onuud daa gban'e m. Ka m pu nye diib bee gbeensir bee fuugi na pil waade. 28Line pa'as la, daa wusa m mor sunf zeeb ne Wina'am nidibi n be zin'ig wusa yela. 29So' ya'a pu kpi'em ne o Wina'am dolim la nii, li wenne mane pu kpi'ema. Ka so' ya'a ke ka o tiraan tum tuumbe'ed, m sunf yiti sa'am ne one ke ka o niŋ ala la. 30Li ya'a nar ye m nwe'e nyo'og, m na nwe'e nyo'og ne line pa'al m tadimis. 31Wina'am one aa ti Zugsob Yesu saam ka o yu'ur nyet zun'or ka li ka' naar la, mi' ye m pu ma'ada. 32Man daa be Damaskus teŋin la, niŋ kane ka na'ab Aretus ke ka o so'e Damaskus la daa gu'ul nidib teŋ la za'anoorin ye ba gban'e m. 33Ka sieba daa nok nwiig n lo peog ka ke ka m kpen' zin'i peogin la, ka ba noki li tud takoro ni sigisi m ka m zo.

will be added

X\