2 KORINT DIM 10

1Man Paul, one ka ya yel ye m ya'a bee ya sa'an m a dabieug, ka m ya'a ka'a ya sa'ane m mor sukpi'euŋ n pian'adi ya yela la, belimidi ya ne Kiristo sumbugusum, 2ka sosidi ya ye m ya'a ti kena, li ku nar ka m pian'ad ne sukpi'euŋo. M mi' ye m na nyaŋe mor sukpi'euŋ n sa'al bane yel ye ti tum ne ka li dolne ti ninsaalib boodim la. 3Hale ne tinam be dunia ni la ti pu nwe'ed tanp wenne dunia nidibi niŋid si'em laa. 4Lin ka ti more zabid la ka'ane dunia dine, ka lee more Wina'am paŋ ka sa'amid line mor paŋ wusa. 5Ka sa'amid ziri ten'es be'ed dim ne bane du'osid ba meŋ ne Wina'am baŋir yela la. Ka ti nyaŋ poten'er be'ed wusa ka ba siak a Kiristo din. 6Ka ti ya'a keenn ya sa'an na, ka ya pa'ali ti ye ya sid siak Wina'am noor, tiname tia' ye ti saans one pu siak Wina'am noor la. 7Gosimi lin ka ya nyet la ka kpansi ba. So' ya'a be ka ten'es ye o a Kiristo nid, on ten'esim o meŋ yela ye on a Kiristo nid la tinam me ane ala. 8M nwe'ed nyo'og ne paŋ kan ka Wina'am tisi ti la yela, line a ye ti kpe'eŋi ya, ka ka' ye ti sa'ami yaa. Hale ne man nwe'e nyo'og ka li gaad lin nar si'em la, m ku di nyan ne li yelaa. 9M pu bood ye m niŋ ka li a wuu m bood ye m kpen'esi ya dabiem ne m gbana laa. 10Sieba yet ye, “O gbana la kpi'emne ka tebis hale. Amaa o ya'a bee ti sa'an o mor dabiem ka o pian'ad ka'a gbin ne.” 11Niŋkan daana baŋim ye lin ka ti yet gbana ni la, ti ya'a keenn ya sa'an na, ala ka ti me na niŋ. 12Ti ku yel ye ti a su'um wuu bane ten'es ye ba a su'um hale la, ka maki ti meŋ ne baa. Ba meŋ boodim gban'e line a su'um ye ba niŋ, ka ba maki ba meŋ ne ban gban'e si'em la, ka me maki ba meŋ ne ba taaba. Linzug ba ka'a ya'am. 13Ka ti ku nwe'e nyo'og ka li gaad Wina'am tisi ti si'em la benne, ka lee na nwe'e nyo'og n zemis tuumkan ka o tisi ti la ben. Ka ti tuuma ya sa'an la zemis on tisi ti la ben. 14Ka lin sadigim a sida la, tiname daa a yiiga dim n keenn ya sa'an na n mor Kiristo labasuŋ na la, ti daa pu gaadi one tisi ti si'el la ben ne. 15Dinzugo ti pu nwe'ed nyo'og ne tuumbane ka sieba tum laa, line gaad Wina'am tisi ti si'em ben laa, ka lee mor poten'er ye ya yadda niŋir Wina'am ni na nobug ka ti na nyaŋe tum ya sa'an ka li gaad tinam daa yiti tum si'em ya sa'an la, ka li kpelim zemis ne Wina'am tisi ti si'em la ben. 16Ka ti yu'un na mool labasuŋ la teens bane be ya tuon la ni, ka ku nwe'e nyo'og ne tuumkan ka so' deŋim tum o so'olim kan ka Wina'am tis o ye o tum la nii. 17Li dolne lin da sob Wina'am gbauŋin si'em ye, “One bood ye o nwe'e nyo'og on nwe'em nyo'og ne lin ka Zugsob la niŋ la.” 18Li ka'ane niŋkane yel o meŋ su'um yela la a ninsuŋo, amaa li ane niŋkane ka Wina'am yel o su'um yela la a ninsuŋ.

will be added

X\