2 KORINT DIM 1

1Man Paul, on ka Wina'am gaŋ m ne o boodim ye m a Yesu Kiristo Tumtum la, ne ti ba'abiig Timoti, sobid gbauŋ kaŋa n tisid Wina'am nidib bane wusa be Korint ne Akaia teensin wusa la. 2Ti Ba' Wina'am ne ti Zugsob Yesu Kiristo na tisi ya yelsum ne sumalisim. 3Keli ka ti pu'us Wina'am one aa ti Zugsob Yesu Kiristo Ba' la bareka, on one aa ti Ba' ka zoti ti nimbaanlig, ka a Wina'am ka suŋir wusa yit o sa'an na la. 4O suŋidi ti ti yeltood wusa poogin, ye ti nyaŋedi nokid suŋir kane ka ti di'ed Wina'am sa'an la n suŋid bane mor yeltood sieba wusa la. 5Ti sadigim nyet namisug bedego Kiristo zug, ala men ti na di'e suŋir bedego ka li yine Kiristo sa'an na. 6Ti ya'a nye yeltoog, li ane ye yanam me ya'a ti nye yeltoog, ya na nye suŋir ne faangir, ka li yine tinam sa'an na. Ka tinam ya'a nye suŋir Wina'am sa'an, yanam me na nye suŋir, ka li yine ti sa'an na, ka na di'e paŋ ye ya modig ya namisug poogin line wenne namisug kane ka tinam nye la. 7Ti ti'ir ya yela ka'a bi'esugo. Ti mi' ye yaname sadigim namisid wuu tiname namisid si'em la, ya na di'e suŋir wuu tiname di'ed si'em la. 8M ba'abiise, ti bood ye ya baŋ yeltoog kan ka ti daa nye Asia teŋin la yela. Yeltoog la daa daami ti bedego ka gaadi ti paŋ ben, ka ti daa pu len ten'esid vum yelaa, 9ka ten'es ye li ane wuu koto ni ka ba kadi ti saria koos ka li a ku'um. Ka lina niŋ ye ti da tia' ti meŋ paŋa, ka lee tia'ane Wina'am one vu'ugid kum la. 10O faaenn ti yeltoog tita'ar line a ku'um la ni, ka ti mi' ye o na lem faaenn ti, ka mor ti'ir o sa'an ye o na lem faaenn ti ya'as. 11Ka yanam me suŋi ti n sos Wina'am tisi ti la. Wina'am na di'e ya sosug la bedego ka tisi ti yelsum. Dinzugo nidib bedego na pu'us Wina'am bareka on niŋ si'el tisi ti la zug. 12Tinam nwe'ed nyo'og ne'eŋa yela bozugo ti potenda dit kaset ye ti nyaŋe gban'e ti meŋ dunia nwa ni. Line gaad li wusa ane tinam ne yanam soogin. Li yi ne Wina'am a su'um nyain ne yelsida daan la yela. Li ane Wina'am popielim zug ka ka'ane ninsaalib ya'am ka ti be ala laa. 13Ti yiti sobidi lin ma'aa ka ya na nyaŋe karem ka gban'e li gbin. 14Ya daa gban'e lin ka ti daa niŋ la gbin ka pu gban'e li wusa su'uŋaa. Ka m mor ti'ir ye ya na gban'e lin ka ti sob la su'uŋa ye Yesu Kiristo ken daar la ka yanam na nwe'e nyo'og tinam yela wuu tinam na nwe'e nyo'og yanam yela si'em la. 15M daa mi' ne'e su'uŋa ka linzug ka m daa gban'e ye m na kena kaae ya yiiga ye ya di nyood noor ayi. 16M daa gban'e ye m na keenn ya sa'an na ka nyaan gaad keŋ Masedonia teŋin, ka m ya'a ti lebid na ka na len kaae ya ka ya na suŋi m ka m gaadi keŋ Juuda teŋin. 17Ya ten'es ye m gban'ar la ka'a su'uŋa bee? Ya ten'es ye m dolne ninsaalib boodim n gban'e ye m niŋ si'el ka bood ye m kpanbi siak ye eenn ne ayei nee? 18Wina'am ane yelsida sob, ala men ka li a sida ye tiname yeti ya si'el la ka'ane ye ti kpanbidi siakid ye eenn ne ayei nee. 19Yesu Kiristo one a Wina'am Biig ka mam, Paul ne Timoti ne Silvanus daa mool o yela ya sa'an la, pu mor bi'esugo. Li ane eenn o sa'an saŋa wusa. 20Li yine Yesu Kiristo ni na ka Wina'am siak ye eenn, ye o na niŋ lin ka o zi'el noor li yela la wusa. Ka linzug ka ti pu'usug poogin ka li yine Yesu Kiristo ni ka ti yel ye ami, ka tisid Wina'am na'asi. 21Li ane Wina'am ket ka ti zi'e kiŋ kiŋ Kiristo sa'an tinam la'am ne yanam, ka gaŋi ti ye ti tum o tuuma, 22ka nok o zanbin zanbili ti ka li pa'al ye one so'e ti ka tisi ti o Siig Suŋ n ke ka ti mi' su'uŋa ye o na ti tisi ti o piini wusa. 23Wina'am aa m kaset sob ye man pu leb Korint la, m faann ya yak. 24Ti pu mood ye ti yeli ya ne mugusug line nar ye ya siak laa; ka ya yadda niŋir dol suer su'uŋa. Ti tum ne taaba ye ya nye sumalisim.

will be added

X\