1 TIMOTI 6

1Kel ka bane a yamis la baŋ ye li nar ka ba na'asi ba zugsobnam la su'uŋa, ka so' da sa'am Wina'am yu'ur ne ti pa'alugo. 2Ka yamis ban ka ba zugsobnam a yadda niŋidib la da zan'as ye ba na'asi ba, ban a ba ba'abiis ne taaba la zugo, amaa ba tumi ba boodim su'uŋa bozugo bane tuuma ka ba tum la, ane yadda niŋidib ne ban ka ba noŋ. Pa'alim ka kpe'eŋi ba ne'enam. 3So' ya'a pa'an line be li kon', ka pu siak ti Zugsob Yesu Kiristo yelsida pian'ad line dol Wina'am suer laa, 4o mor tita'alim, ka lee zi' si'e si'ela, ka mor poten'ebe'ed n bood pian'ayaalis ne noŋgban nwa'ar, ka me zabid pian'ad yela, line mor nennim ka pu mor noŋgban yinnii. Ba bood yu'usa'uŋ ne ten'es be'ed ne 5noŋgban nwa'ar line yi nimbane mor ya'am be'ed ka pu mor yelsida la, ka ten'esid ye Wina'am suer dolim ane line na ke ka ba di nyood. 6Li a yelsida ye line malis ya'a be so' sunfin, nyood bedego be ne one dol Wina'am suer. 7Ka ti pu mor si'eli kenn dunia ni naa, ka ti me ku nyaŋe zaŋ si'el dunia nwa ni keŋee. 8Ti ya'a mor diib ne fuud, lin siaki ti. 9Ka bane bood ye ba a kpan'amnam la na kpen' makirin, ka lu sutaana bendigun, line a boodim be'ed, line sa'amid nid ka lem ta'asid o ku'um puugin. 10Bozugo ligidi noŋilim ane tuumbe'ed buudi wusa nya'ar. Ninsieba nini mu'e ne ligidi yela hale ka li ke ka ba yi yadda niŋirin la, ka namisi ba meŋ ne susa'aŋ bedego. 11Amaa fun, one a Wina'am nid la, zan'asim ne'enam wusa, ka dol Wina'am popielim suer la kiŋ kiŋ ne yadda niŋir ne noŋilim ne modigir ne suguru. 12Fu yadda niŋir yela, kpe'eŋimi fu meŋ ka nyaŋe gban'e nyovur line ka'a naare, line ka Wina'am gaŋi tis uf saŋkan ka fu peligi fu poog pian' pian'asuŋ nidib bedego tuon la. 13M tis uf nokaŋa Wina'am, one tisid si'el wusa nyovur la tuon, ne Yesu Kiristo, one daa nie n pian' su'uŋa Pontus Pilate tuon la, 14ye fu di'e sa'alug la. Guri li su'uŋa ne popielim ka ka' gba'aree, n ti paae Yesu Kiristo ti Zugsob lebig saŋa. 15O lebig la na ane Wina'am n zi'el saŋa si'a la. One a na'atita'ar yinni la, ka mor yelsum ka a na'anam na'ab ne Zugsobnam Zugsob. 16One ma'aa so'e nyovur ka be line nie nyain galis la ni ka so' ku nyaŋe li'el la, ka so' kae' nye o bee na nyaŋe nye o. Na'asi ne paŋ line ka' naar na be o ni. Ami. 17Sa'alim bane mor kpan'am dunia kaŋa nwa ye ba da mor nyeesim, ka da mor ti'ir ne ba kpan'am line ka ba zi' lin na niŋ si'em, amaa mor ti'ir ne Wina'am one tisi ti si'el wusa line na malisi ti sunya la. 18Sa'alimi ba ka ba tum tuumsoma, ka ke ka ba tuumsuma aa bedego ka lem bood ye ba tis piini ka a na'asi dim. 19Ne' a suer kan ka ba na sua' ba meŋ kpan'am line a eenb kpi'uŋo gur beug sa, ka gban'e nyovur line sid a sida la. 20Timoti, gur line ka ba gu'ul uf la. Luakim pian'ayood line pu dol Wina'am suer ne nogban nwa'ar, ka sieba gos ka li a ye ba mor baŋir. 21Ka sieba gos ka ban more li, dinzug ka ba yi ba yadda niŋirin. Wina'am na tisi fu yelsum.

will be added

X\