1 TIMOTI 4

1Wina'am Siig Suŋ la nie pa'al nyain ye, dunia naar saŋa la, ninsieba na basi ba yadda niŋir ka dol siis bane ma'ad nidib la, ne siis be'ednam pa'alug. 2Pa'alug bama ane line yi dama'amnam sa'an ka ba potenda n kpi la ni na. 3Nimbama pa'an ye po'ab da kul sidib bee dap di po'aba, ka lem kis disieba diib, line ka Wina'am maal ye bane pu'us o bareka ka niŋ o yadda ka baŋ yelsida suer la, na tun'e dii li la. 4Bun line wusa ka Wina'am maal la ane su'uŋa ka ba ya'a di'ed li ne Wina'am bareka pu'usum si'el si'el pu kisa. 5Ka Wina'am yelsum ne ti winsosug la ke ne ka li lieb su'um ye ti di. 6Fu ya'a pa'ali fu ba'abiis taab la ne'eŋa fu na a Yesu Kiristo tumtum suŋ, bozugo fu di'e Wina'am yelkan a yelmeŋir yadda la ne pa'al suŋ line ka fu dol la. 7Zan'asim solima line ka'a gbin ne ka me zan'as line a yalim tuuma, amaa kpe'eŋimi fu meŋi n zamis Wina'am suer ne li tuuma niŋir. 8Fu ya'a tum line na tis niŋgbiŋ paŋ li nyood be bi'ela, amaa Wina'am suer dolim lee mor nyood bedego line a ti'ir beilim kaŋa, ne line na ti kena la ni. 9Yelmeŋir nwa nar ye so' mekama di'e li. 10Ne'eŋa nwa yela ka ti kpe'eŋid hale ne tuum kpi'ema, ka ti mor ti'ir ne Wina'am one voe la yela, one a nidib wusa faangid la, ka li kas kas ane bane niŋ o yadda la. 11Pa'alim ka sa'ali ba ne'enam. 12Da ke ka so' ziem uf fun a dasaŋ la zugo, ka niŋim line a su'um ka ba me tu'as uf, ka me tu'asi fu pian'ad ne fu tuuma ne fu noŋilim ne Wina'am yadda niŋir poten'esuŋ. 13Karem Wina'am gbauŋ la n tis nidib la, ka pa'ani ba, ka lem sa'ali ba hale ka m ti kena. 14Da bas piini line ka Wina'am tis uf saŋkan ka nodi'es so' da di'e o pian'ad ka pian'a piini yela ka kpeenmnam nyaan pa'ali ba nu'usi fu zugin la. 15Tum tuumbama ka noki fu meŋi pesig tuuma la, ka ba nye fun kpe'eŋidi fu meŋ si'em. 16Gu'usimi fu meŋ ne fun pa'an si'el la. Kpelim tumi ala, ka tuumbamanamin ka fun ne bane kelisidi fu pian'ad la na paam faangir.

will be added

X\