1 TIMOTI 3

1Yelmeŋir nwa ka m yet ye, so' ya'a bood ye o a Wina'am nidib so'od, o boodim ane o tuuma a su'um. 2One a Wina'am nidib so'od asee ka o a one ka'a gba'are, ka a po'ayiŋdaan ka gban'adi o meŋ, ka mor ya'am, ka a one tum line dol suer su'uŋa, ne one di'esid saam ne sumalisim, ka a one na tun'e pa'al nidib su'uŋa, 3ka da a danuuda bee one bood zaba, amaa o be baanlim, ka a one pu mor noŋgban nwa'are, ka da noŋ ligidi, 4ka tun'e gosidi o yidim wusa su'uŋa, ka o biis siakidi o yelug ka mor na'asi o yela wusa ni. 5Ka so' ya'a pu nyaŋe gosi o yidima, o na niŋ wala n guri Wina'am nidiba? 6Ka da a niŋkane niŋ yadda paalim nan ne. Li ya'a ka'a ala o na mor nyeesim ka ba kad o saria be'ed wuu Sutaana ne. 7Asee ka yiiŋdim baŋ ye o a ninsuŋ. Li ya'a ka'a ala o na di nyan ka lu Sutaana bendugin. 8Bane me a Wina'am nidib suŋidib nar ka ba a nimmua dim, ka da mor pian'ade ayi yi, bee da ke ka daam kuli baa, bee dol suer be'ed nye nyoode. 9Li nar ka ba gban'e yelsua'adir line ka Wina'am yu'un pa'ali ti ka ti siak la kiŋ kiŋ, ka ba potenda a nyain. 10Asee ba kpansi ba yiiga, ka ba ya'a sid ane yelsida dim, ban on nyaan tum Wina'am nidib suŋidib tuuma. 11Ka ba po'ab la me ae bane tum ne nimmua, ka da yeesida, ka gban'adi ba meŋ, ka a yelsida dim si'el wusa ni. 12Asee ka suŋidib a po'ayiŋ dim ka na nyaŋe gosi ba biis ne yidim wusa su'uŋa. 13Suŋidib bane sid tum su'uŋa la nyet na'asi, ka na nyaŋe pian' Yesu Kiristo yadda niŋir yela ne sukpi'em. 14La'am ne man mor poten'er ye m na kenn fu sa'an ka li ku yuug la, m sobid sa'al bama ye 15daasi'ere, m ya'a yuuge, fun on baŋ nidi na tun'e tum si'em Wina'am nidibin, bane a Wina'am one voe la nidib la, ka suŋid yelsida la wuu za'antolug ne zaŋguomi suŋid doog si'em la. 16So' kae' na bi'es yelsua'adir tita'ar line be ti Wina'am dolim ni laa. O da nie na ne niŋgbiŋ. Ka Wina'am siig bigis ye o a su'um. Ka maleknam nye o. Ka ba mool o yela teens wusa ni. Ka dunia nidib siak li. Ka Wina'am di'e o lebi o na'am zin'igin.

will be added

X\