1 TIMOTI 2

1Ne'eŋa nwa a yiiga yel, ye fu kpe'eŋi ba ka ba pu'us Wina'am ne sosug ne beluŋ ne bareka pu'usum nidib wusa yela. 2M bood ye ya sos Wina'am n tis na'anam ne kpi'emnam ka ti be ne laafe ka daamug kae', ka ti dol Wina'am suer ne nimmua yela wusa ni. 3Ne'eŋa a su'um ka malisi ti faangid Wina'am suunr 4one bood ye nidib wusa nye faangir ka lem baŋ yelsida suer la. 5Wina'am yinni ma'aa be. Ka nu'unwe'ed yinni ma'aa me be nidib ne Wina'am soogin, ka one a Yesu Kiristo la, 6one pesigi o meŋi tis ye nidib wusa nye yolisim la. Ka li saŋa paae la bane nyee li la, dii li kaset. 7Ne'eŋa nwa zug ka Wina'am da gaŋi m ye o tum m ka m mooni li, ka pa'al bane ka' Jew dim la ye ba niŋ Wina'am yadda ka baŋ line a sida. M yetne yelsida, ka pu ma'ada. 8M bood ye zin'ig wusa, ka dap pu'usum ka uk nu'us line a nyain la, pu'us Wina'am. Ka supeen ne nogban nwa'ar kae'. 9Ka po'ab me yeem fuud line nar ka na sua'a ba nyan su'uŋa, ka ka'ane zuobid loob yela bee salima la'ad bee kugvenla line buon peel ka li ligidi zu'e, ne fuud ban ka ba ligidi zu'e laa. 10Ba lee venl ne tuumsuma line nar po'ab bane yel ye ba ane Wina'am pu'usum dim la. 11Kel ka po'ab a baanlim ka zamis ka siak ba bane so'e ba la noya. 12M pu siak ye po'ab pa'an dapa, bee mor kpi'euŋ ka so'e baa. Ba ae baanlim; 13ka Wina'am da deŋim maalne Adam ka nyaan maal Eve. 14Ka Sutaana da pu ma' Adam, amaa o nyaŋe ma' Eve, ka o sa'am Wina'am noor yelug. 15Ka la'am ne wala, po'a ya'a nyidigid ne Wina'am yadda niŋir ne noŋilim ka a nyain ka mor ya'am su'uŋa la na paasid faangir ne biis du'abin.

will be added

X\