1 TIMOTI 1

1Man Paul, one ka Wina'am ti faangid ne Yesu Kiristo one ka ti mor ti'iri o yela la, tis man noor ye m a Kiristo Tumtum la, 2n sobid gbauŋ kaŋa tisid Timoti one niŋ Yesu Kiristo yadda ka liebi m biig ameŋa la. Ti Ba' Wina'am ne ti Zugsob Yesu Kiristo na tis uf yelsum ne nimbaanlzoor ne sumalisim. 3Man daa wa'ae Masedonia teŋin la, m daa tis uf noor ye fu kpelim be Efesus teŋin ka sa'al ninsieba ye ba da pa'an ziri pa'ala la. 4Ka da dol teŋkudumin solima ne yaanam yuda kal line ta'asid nogban nwa'ar ka pu suŋid ka Wina'am tuuma la ken tuon ne ya yadda niŋir nii. 5Dinzug ke ka m yel anwa la ane ye noŋilim line zu'e yine ya poten'er line a nyain ne popielim ne yadda niŋir ameŋa. 6Ninsieba bas ne'eŋanam ka pian'ad pian'ayaalis, 7ka bood ye ba a Wina'am wada pa'anib, amaa ba pu baŋ ba meŋ pian'ad la gbin ne, bee yelban ka ba pian'ad ne sukpi'em laa. 8Ti mi' ye wada la a su'uŋa ti ya'a noki li tum lin nar si'em. 9Ti mi' ye wada la pu maal ne zi'el popielim dim yelaa, amaa bane pu dol wada la suer, ne bane pu siakid yelugo, ne bane pu dol Wina'am suere, ne tuumbe'ed dim, ne bugusum dim, ne bane dol ninsaalib suer, ne bane kuud ba'anam ne manam, ne bane a ninkuudib, 10ne po'ab ne dapi bane sa'am taaba, ne dap bane dig ne ba dap taaba wen wuu po'ab ne, ne bane zuud nidibi gban'ad, ne dama'anam, ne ziri kasetib, ne bane niŋid line mekama pu dol pa'alsuŋo. 11Pa'alug la dolne labasuŋ line nied pa'an Wina'am na'am ne na'asi, ka o da niŋi m nu'usin ye m mool la. 12M pu'usidi ti Zugsob Yesu Kiristo bareka, one tisi m paŋ ne'eŋa yela la. M pu'usid o, ne on baŋi m poog ka gaŋi m ye m tum tuumkaŋa nwa la, 13hale baa ka saŋsi'en ka m da sa'amidi o yu'ur, ka namisid o, ka tu'ud o, amaa ka o zo man nimbaanlig, bozugo man da nam pu niŋ Yesu yadda la, m da pu baŋ man niŋid si'el la. 14Ka Zugsob la tis man o popielim piini ka li galis, ne Yesu Kiristo yadda niŋir ne noŋilim line be o sa'an la. 15Yelmeŋir nwa ka m yet ye, li nar ye so' mekama di'e li su'uŋa ye, “Yesu Kiristo kenn dunia ni na ye o faaenn tuumbe'ed dim,” ka man tuumbe'ed gati ba wusa din. 16Ka mam one a tuumbe'ed dim kpeenm la, di'e nimbaanlzoor ye Yesu Kiristo pa'al nidib la o meŋ suguru su'uŋa ka bigis bane na yuolim niŋ o yadda, ka di'e nyovur line ka'a naar la. 17Na'ab kane so'e zumaana wusa la, o pu kpiida, nidib me pu nyet o ne ninii, one a Wina'am ayinni la, zun'or ne na'asi ane o din, saŋa line ka'a naare. Ami. 18M biig Timoti, nozi'elug kaŋa ka m tisid uf, ka li doli line ka Wina'am nodi'es da pian' fu yela la. Kel ka ne'eŋa kpe'eŋ uf ka fu zab zabsuŋ line na kad yelbe'ed la. 19Kpelim mor yadda niŋir ne popielim ya'am. Ninsieba pu siakidi ba meŋ popielim ya'am bood si'em laa, ka li sa'amidi ba yadda niŋir. 20Ba sieba ane Himeneus ne Alekizanda, ban ka m kee ba niŋ Sutaana nu'usin ye ba silig ya'am ka da sa'am Wina'am yu'ure.

will be added

X\