1 TESALONIKA DIM 5

1Ti ba'abiise, li lem kae' ye ti sob si'el tisi ya Zugsob ken la saŋa ne dabisa la yelaa. 2Ka yanam meŋ mi' su'uŋa, ye Zugsob dabisir la na kena wuu na'ayiigi na kenn yu'uŋ na si'em la. 3Nidib ya'a ti yet ye, “Laafe ne niŋma'asim be” saŋkan la ka toog na kpelim lu ba zugin, wuu po'a yiti sa'ae du'am si'em la. Ka ba ku nyaŋe yi li nii. 4Ti ba'abiise, yanam ka' lik dima, ka Zugsob la dabisir na kpelim di'igi ya wuu na'ayiiga. 5Ya wusa ane neesim nidib, ka be line a nyain la ni, ka ti ka' yu'uŋ ne lik nidiba. 6Dinzugo, ti da gbisid wuu bama laa, ka nei ka da aa wuu one nu daam koole. 7Bane gbisid la, gbisidne yu'uŋ. Ka bane nu daam kool la, kool ne yu'uŋ. 8Ka tiname a neesim nidib la zug, ti da kool ka ya'am kae'. Li nar ka ti a wuu sogia bane ye' zaba la'ad line a kunt la ye li gu'u ba meŋ, zaba ni. Ti yeem yadda niŋir ne noŋilim n gu'u ti nyo'od, ka pid kunt balaŋir line a ti'ir ye ti nye faangir la n gu'u ti zut. 9Wina'am pu gaŋi ti ye ti nye o supeene, ka lee ye ti di'e faangir line yi ti Zugsob Yesu Kiristo ni na la. 10On da kpi ti zug, ye saŋkan ka o ti ken la na, ti ya'a voe bee ti ya'a kpi ne, ti na la'am be ne o. 11Dinzugo kpemisimi ya taaba sunya, ka suŋ taaba ya yadda niŋir ni, wuu yaname niŋid si'em la. 12Ti ba'abiise, ti belimi ya ye ya na'as bane ka Zugsob la gaŋi ba ye ba guri ya ka tum o tuuma ya soogin ka pa'ani ya la, 13ka tisi ba na'asi bedego, ka noŋi ba ba tuuma la zug, ka ya mor sumalisim ne taaba. 14Ti ba'abiise, ti kpemisidi ya sunya ye ya sa'al bane mor gbanya'am la, ka kpemis bane pu mor sukpi'em la sunya, ka suŋ bane ka' paŋ ba yadda niŋir poogin la, ka mor sumbugusum ne ba wusa, 15ka gu'us ka ya so' da lebis o tiraan be'ed one tum be'ed la zugo, ka kpemis ya meŋ ye ya tum tuumsuma n tis taaba ne nidib wusa. 16More sumalisim daar wusa, 17ka pu'us Wina'am saŋa wusa, 18ka pu'us o bareka si'el mekama ni; ka li ane Wina'am boodim line yi Yesu Kiristo ni na, ye ya niŋid ala. 19Da zan'asi Wina'am Siig Suŋ laa, 20ka me da ne'es pian'ad line ka so' di'e Wina'am ni tisi ya. 21Kpansimi si'el wusa, ka more dine a su'um, 22ka luak bunbe'ed buudi wusa. 23Ti sosid Wina'am one tisidi ti sumalisim la ye o ke ka ya aa su'um nyain. Ka lem sos o ye o na more ya su'uŋa, ka Zugsob Yesu Kiristo la ya'a ti kena, ka ya siis ne niŋgbina a su'um ka ya di buod. 24Wina'am one gaŋi ya la a sida sob, ka na niŋ ala. 25Ti ba'abiise, sosimi Wina'am tisi ti, 26ka pu'us ya ba'abiis wusa su'uŋa. 27M yeti ya ne Zugsob paŋ ye ya karem gbauŋ kaŋa tisi ya ba'abiis zan'asa. 28Ti Zugsob Yesu Kiristo yelsum na bee ya sa'an. Ami.

will be added

X\