1 TESALONIKA DIM 4

1To, ti ba'abiise, ya daa zamisid ti sa'an yaname na a si'em ka li ma'ae Wina'am sunf. Ya kpelim aa ala. Ka ti sa'ali ya ka belimi ya ne ti Zugsob Yesu yu'ur ye ya niŋ ka li gaad ala. 2Ya mi' noyelug bane ka ti daa tisi ya ne Zugsob Yesu paŋ la, 3ye Wina'am bood ye ya a su'um nyain, ka luak dian'ad tuuma, 4ka ya yinni yinni baŋ yanam na niŋ si'em di po'a ne na'asi, ka ya sunya a nyain. 5Ka li ka'ane ne be'ed ya'amleog wuu ba'amaanib bane pu dol Wina'am niŋid si'em laa. 6Ka ne' poogin, mit ka dau tum tuumbe'ed ka maal be'ed tis o ba'abiig. Ti daa deŋim yeli ya, ka sa'ali ya ne paŋ ye, Zugsob na namis bane tum tuumbe'ed bama. 7Wina'am daa pu gaŋi ti ye ti sunya a dian'ade, amaa ye li a nyain. 8Dinzugo one zan'as pa'alug kaŋa, o pu zan'as ninsaala, o zan'asne Wina'am one tisi ti o Siig Suŋ la. 9Li lem kae' ye ti sob tisi ya ya ba'abiis noŋilim yelaa. Wina'am pun zamisi yanam ye ya noŋ taaba. 10Ka li a sida ye ya noŋ ya ba'abiis wusa bane be Masedonia so'olimin la. Ti ba'abiise, ti belimi ya ye ya ke ka noŋilim la gaad lin a si'em la, 11ka ya kpe'eŋ ya meŋ n a baanlim, ka gosi ya meŋ tuuma, ka tum ne ya meŋ nu'us n diisi ya meŋ, wuu tinam daa yeli ya si'em la, 12ye ya nye na'asi bane ka' yadda niŋidib la ni. Ka da tia' so' ka ye o tisi ya, yanam bood si'el la. 13Ti ba'abiise, ti bood ye ya baŋ yelsida ne bane kpi la yela, ka ya sunya da sa'am wuu bane pu mor ti'ir laa. 14Ti siak ye Yesu kpiya ka lem vu'ug kumin, ka me siak ye bane daa a Yesu nidib ka da kpi la, Wina'am na more ba ne Yesu na. 15Lina ane Zugsob pa'alug ka ti yeli ya ye, saŋkan ka Zugsob la na ti kena la, tinam bane kpelim voe la, ku deŋ bane kpi la n la'as ne Zugsob la yiigaa. 16Zugsob la meŋ na ti yi arazana ni sig na ka tis noor tansug ka ti wum malek kpeenm kukor ne Wina'am na'atan piebug. Ka bane a Yesu nidib ka kpi la, na vu'ug kumin yiiga. 17Ka Wina'am yu'un na nok tinam bane kpelim voe la n la'as ne ba n tu'os Zugsob la saŋgbana ni. Ka ti yu'un na be Zugsob la sa'an saŋa wusa. 18Dinzugo, kpemisimi taaba sunya ne pian'abama.

will be added

X\