1 PIITA 5

1Mam, one a yadda niŋidib kpeenm ne bane da nye Kiristo ka o namis la yinni, bane na di'e na'asi line na ti nie la yinni, sa'an yanam bane a m kpeenm taaba la, 2ye ya guri Wina'am nidib bane ka o gu'uli ya wuu pe'es la, ne ya'amseug ka ka'ane mugusugo. Niŋimi ne nimmua ka ka' nyood line a ligidi yelaa. 3Da webidi bane bee ya nu'usinee, amaa niŋimi su'um ka ba tu'asi li. 4Ka konbkem kpeenm ya'a ti nie, ya na di'e na'am zugpibig line pipilim ku sa'am. 5Ala men yanam bane pu kudig la, siemi ya meŋ kpeenmnam la tuon. Ya wusa siemini ya meŋ n tisi taaba; ka li sob ye, “Wina'am zan'asid nyeesim dim la ka tisid bane sie ba meŋ la yelsum.” 6Dinzugo siemini ya meŋi niŋi Wina'am one a paŋ sob la nu'usin, ye li saŋa o na du'osi ya. 7Zaŋimi ya yelpakir wusa ziil o; ka o guri ya. 8Ae bane gban'adi ba meŋ, ka lem a bane gu'usid su'uŋa; ka ya dataa Sutaana goondi nwa'am wuu gbigim ne ied nid ye o gban'e onb. 9Niŋimi Yesu Kiristo yadda su'uŋa ka zan'as Sutaana, ka ya mi' ye li nar ye ya ba'abiis bane be zin'ig wusa namis namiskan meŋim ka ya nye la. 10Wina'am so'e yelsum wusa, ka buoli ya o na'asi line ka' ben la ni yanam a yinni ne Kiristo la. Ka yaname namis saŋa bi'ela nya'aŋ la ka Wina'am maali ya su'um ka zi'eli ya kiŋ kiŋ, ka kpe'eŋi ya. 11Ka na'am paŋ be ne o, saŋa line ka' benne. 12Silvanus one a ba'abisida mam ni la, suŋi m ka m sob gbauŋ kaŋa giŋa nwa n kpe'eŋidi ya yet ye, lina a Wina'am popielim ameŋa la, gban'amini li kiŋ kiŋ. 13Ka Wina'am nidib bane be Babilon, ka Wina'am me gaansi ba la, pu'usidi ya la'am ne Maak one liebi m biig la. 14Pu'usimi taaba ne noŋilim pu'usug. Sumalisim na be ne yanam bane a yinni ne Kiristo la.

will be added

X\