1 PIITA 3

1Ala mene po'aba, siakimini ya sidib noya ka ya na nyaŋe ya sidib la sieba la'am ne ban da nam pu siak Wina'am pian'ad laa, ka li ku yi ne ya pian'adinee, amaa ya tuuma niŋirin, 2ban kpansi nye ya na'asi zotim tuuma line a nyain si'em la. 3Da ke ka ya ba'a be ne yiiŋ venlim nak galisug ka li yela wen wuu zuobid loob ne salima la'ad ne fusuma yeebo. 4Amaa keli ka ya venlim ae baanlim ne na'asi beilim line sua' ya sunya ni n wen wuu salima line ka' sa'uŋo, ka li a su'um galis Wina'am sa'an. 5Ala men ka po'abane da a su'um nyain ka mor ti'ir ne Wina'am me da yiti nakid, amaa ka siakidi ba sidib noya, 6wen wuu Sara da siaki o sid Abraham noor ka buon o ye o zugsob la. Ya ya'a niŋ dine nar, ka pu zot dabiem, ya ane o po'ayuos. 7Ala mene yanam bane a po'ab sidiba, bei ne ba ne poten'esuŋ, ka na'asi po'a la on a tadim la zug, ne yanam la'am taaba di'ed nyovur line a Wina'am popielim piini la zug. Ka ya Wina'am pu'usum da vi'. 8Ka nannanna, ya wusa wusa more poten'er yinni, ka more nyoog ne taaba, ne ba'abiidug noŋir, ne nimbaanlzoor ne sumbugusum, 9ka so' ya'a tumi ya be'ed da yi'ene li sammee. Ka so' ya'a tu'u ya da lebisi yaa, amaa lee tim o yelsum. Wina'am da buoli ya ye ya beilim a ala, ka ya na nye yelsum. Ka li sob ye, 10“One bood ye o nyovur beilim malis ka nye dabis suma kel ka o luaki o zilim pian'abe'edin ka gu'e dama'am. 11Asee ka o luak tuumbe'ed ka tum line dol suer, ka ia sumalisim ne nimmua su'uŋa. 12Zugsob la kpa'a o nindaa n gosid bane a sida dim la, ka o toba kelisidi ba sosug, ka nya'ali bid kudug ne bane a tuumbe'ed dimin.” 13Ka ya ya'a mood ye ya tum line dol suere, ano'one na tumi ya be'ede? 14Hale baa ya ya'a namis ne yelsida yela ya na nye yelsum. Ala zug da more dabiem ka ke ka li paki yaa. 15Amaa ya sunya ni, nokimi ya zug lo Kiristo; ka o a Zugsob. Ti'ebimi saŋa wusa ye ya lebis one mekama bu'osi ya ti'ir kane ka ya mor la, li yela a si'em, baanlim ne na'asi, 16ka ke ka ya poos a nyain, ka ba ya'a tu'u ya ne, yanam tum si'em Kiristo zugo, ban on di nyan. 17Ka li su'um ye ya namis yaname naan niŋid line dol suer, li ya'a a Wina'am boodim ye li aa ala, n gat yanam na tum line pu dol suere ka namis. 18Kiristo da kpii ya tuumbe'ed yela vuguri, on one a popiel la, kpii tis bane ka' popielnama, ye o more ya keŋ Wina'am sa'an. Ba kuu o niŋgbiŋ kuub amaa ka Siig Suŋ ke ka o voe. 19Ka Siig Suŋ la ni ka o keŋ mool labaar n tis siis bane be sarega ni, 20bane da pu siak Wina'am noyelug saŋkan ka o da di nidib suguru saŋkan ka Noa da kpa'ad aaruŋ tita'ar ka nidib bi'ela bane da aa anii ma'aa nye faangir ku'omin aaruŋ la poogin. 21Ku'om suub la nwaasne dine yu'un faann ya. Ka li ka'ane niŋgbiŋ dian'ad pier yelaa, amaa li sosid Wina'am ye o ke ka ya poos a nyain, ka li yit Yesu Kiristo ku'um vu'ugirin, 22on kane keŋ arazana ni zin'i Wina'am datiuŋ ka so'e maleknam ne bane mor kpi'euŋ ne paŋ.

will be added

X\