1 PIITA 2

1Dinzugo basimi poten'ebe'ed wusa, ne dama'am ne zam ne fufum, ne taaba kikeug. 2Kel ka ya ya'am kpen' ne Wina'am yela wuu bibibisi bood bin'isim si'em la. Li na ke ka ya bi' ya Yesu Kiristo yadda niŋir yela. 3Niŋimini ala yaname sadigim nye Zugsob la noŋi ya si'em la. 4Kemini o sa'an na, on kane nwaas wuu kugkane ka nidib zan'as o la, ka Wina'am gaŋ o ka o a su'um hale la. 5Keli ka Wina'am noki ya, ka ya nwaas wuu kuga ne ka o me' yir n tis o meŋ, ka me nwaas wuu maalmaan suma ka niŋ line ma'ed Wina'am suunr ka li yi Yesu Kiristo ni. 6Ka li sobne Wina'am gbauŋin ye, “Gosima, m deŋim gaŋi lodigin kugir line a su'um hale ka zaŋidi li eenbid Wina'am pu'usum zin'ig, Zion ni. Ka one niŋ man one nwaasne kugir la yadda, o ku di nyan ne.” 7Yanam bane niŋ o yadda la baŋ ka o a bunsuŋ hale n tisi ya. Amaa bane pu niŋ o yadda la, li sobi ba yela ye, “Kugkan ka tanmeedib ne'es la yu'un lieb lodigin kugsuŋ.” 8Ka lem sob ye, “Li ane kugkane na ke ka nidib tu'ug, ka a tampiing kane na ke ka ba lu.” Ba tu'usid, ban zan'as Wina'am pian'ad la zug, wuu on yel zi'el si'em la. 9Amaa yanam ane tuŋ yinni dim ka Wina'am gaŋ, ka ya a maalmaanib bane a na'anam, ka a Wina'am nidib bane a nyain ye ya mool o nyalima tuuma la, one buoli ya tuumbe'ed zin'igin line a likin ka more ya na kpen'esi o neesim zin'ig line a nyalima la ni. 10Saŋsi'en la ya da ka' Wina'am nidiba, ka nannanna ya aa o nidib. Ba da pu zoti ya nimbaanliga, amaa ba yu'un zoti ya nimbaanlig. 11M zuanoŋa, m sa'ane yanam bane a saam dunia ni la ye ya bas saalib boodim line zabid ne ya Wina'am dolim la, 12ka kpelim more tuumsuma niŋir nidib buudi soogin, ka ba ya'a nwa'asidi ya wuu ya ane tuumbe'ed dim, ban nye ya tuumsuma ka na'as Wina'am, one na ti kenn daasi'er na. 13Wina'am zugo, siemi ya meŋ Room na'ab one so'e paŋ la sa'an ka one so'e na'anam wusa, 14ka lem sie ya meŋ gomenanam sa'an, bozugo Room na'ab la tumi ba ye ba namis bane tum tuumbe'ed la ka zun'e bane tum tuumsuma la, ka lem sie ya meŋ saalib bane mor kpi'euŋ wusa sa'an. 15Ka li ane Wina'am boodim ye ya gu'e zon bane zi' si'el la pian'ad ne ya tuumsuma niŋir. 16Bei wuu nimbane mor yolisim, ka da more ya yolisim la ka li a ziri bun ka tum line a be'ede, amaa bei wuu Wina'am yamis ne. 17Na'asim nidib wusa, ka more ba'abiidug noŋilim. Zomi Wina'am ka na'as Room na'ab. 18Yanam tumtumniba, siakimi ya zugsobnam noya ne na'asi bedego. Ka li ka'ane ninsuma ma'anee, hale baa ba ya'a la'am a nimbe'ednama. 19Ka so' ya'a modig namisugin ne filim filim on mor poten'er ne Wina'am la zug, ne'eŋanami ma'ed Wina'am suunr. 20Fun naani tum be'ed ka ba sigis uf ne kpisiŋkpil ka fu sin ka mor suguru, li su'um a bo? Ka li ya'a wen wuu fu tumne line dol suer ka namisi li yela, ka niŋi li ne suguru, li ma'ed Wina'am sunf. 21Ka tuumbama yela ka Wina'am buoli ya ka Kiristo da namis ya yela la, ka ye, ya me tuunn li tituunli n tu'as o. 22O da pu tum tuumbe'ede, ka dama'asi'a me da pu yii o noorin naa, 23ka ban tu'ud o la, o kulim pu lebis ye anwa ne anwaa, ka ban namis o la, o da pu volis ba mene, ka pesigi o meŋ one kad saria ne sida la nu'usin. 24Ka zee ti tuumbe'ed ne o meŋ niŋgbiŋ dapuudir la zug, ye ti bas tuumbe'ed beilimin ka lee be ne popielim. Ka o pa'alug la zug ka ya nye laafe. 25Ya da wen wuu pe'esi yiridi yirid sa, ka yu'un lebi ya konbkem la sa'an na, on kane guri ya siis la.

will be added

X\