1 JOON 3

1Gosimi Wina'am noŋi ti si'em. O noŋilim zu'ene galis, ka o buoni ti ye o biis. Sida ti ane o biis. Dunia dim la zi' Wina'am la zug ke ka ba zi' tii. 2M binoŋa, nannanna ti ane o biis. Ka tiname na ti a si'em la nan pu nie paalo. Ka ti mi' ye Kiristo ya'a ti kena ti na lieb wenne on ne, tiname na ti nye on a si'em la zug. 3On wusa mor ti'ir kaŋa Kiristo ni ket ka o meŋ a su'um nyain, wenne Kiristo a nyain si'em la. 4On wusa tum tuumbe'ed, o sa'am Wina'am wada la. Bozugo tuumbe'ed sa'am ne wada. 5Ya mi' ye Kiristo da pu mor tuumbe'edi o nii, ka da kena yiis ti tuumbe'ed bas. 6Dinzugo on wusa be Kiristo ni pu tum tuumbe'ede. Ka one kpen tum tuumbe'ed la nan pu nye oo bee baŋ oo. 7M biise, da ke ka so' ma'a yaa. On wusa tum dine a su'um ane popielim sob wuu Kiristo a popielim sob si'em la. 8Sutaana tum be'ed hale dunia pin'ilugin sa. Ka one kpelim tum tuumbe'ed ane o nid. Ka Wina'am Biig la da kena ye o sa'am Sutaana tuuma. 9On wusa a Wina'am biig pu tum tuumbe'ede, Wina'am vum bee o ni la zug. Ka Wina'am aa o Ba' la zug, ka o ku lem nyaŋe kpelim tum tuumbe'ede. 10Ne'eŋa ke ka ti baŋ bane a Wina'am biis ne bane a Sutaana biis la. Li ane ye on wusa pu tum dine a su'um, bee pu noŋ o tiraan, ka' Wina'am biiga. 11Labaar kan ka ya da wum yanam da dol Yesu Kiristo pin'ilugin sa ane ne'eŋa, ye li a su'um ye ti noŋ taaba, 12ka da wenne Kain ne. O da ane Sutaana nid ka kuu o meŋ pitu. Bo ka o da niŋ ala? Li da ane o meŋ tuuma a be'ed, ka o pitu tuuma a su'um la zug. 13Dinzugo, m ba'abiise, dunia nidib ya'a kisi ya, yanam da ke ka li lidigi yaa. 14Tiname noŋi ti ba'abiis la zug, ti mi' ye ti yi kumin n keŋ nyovurin. On wusa pu noŋi o ba'abiis nam bene kumin. 15On wusa kisi o ba'abiis ane ninkuud. Ka ya mi' ye ninkuud pu mor nyovur kane ka' naar o sa'ane. 16Kiristo n da kpi ti yela la ke ka ti baŋ noŋilim a si'em. Ka li me su'um ye tinam me kpi ti ba'abiis zug. 17So' ya'a a arazak daan, ka nye ka si'el pasig o ba'abiig, ka o pu tis oo, o na niŋ wala yel ye Wina'am noŋilim bee o sunfine? 18M biise, ti noŋilim da a pian'ad ma'anee, amaa li su'um ka li a tuuma ne yelsida noŋilim. 19Ne'eŋa ke ka ti baŋ ye ti dol yelsida la, ka ti potenda kpi'em Wina'am tuon. 20Hale ti potenda ya'a moŋi ti buod, Wina'am gati ti potenda ka mi' si'el wusa. 21M binoŋa, ti potenda ya'a pu yel ye ti tum tuumbe'ede, ti mor sukpi'em Wina'am tuon, 22ka din wusa ka ti sos o sa'an, o na tisi ti, tiname siak o noyelug ka tum dine malis o la zug. 23Ne'eŋa aa o noyelug. Li ane ye ti niŋ o Biig Yesu Kiristo yadda, ka noŋ taaba wuu on daa yeli ti si'em la. 24On wusa siak Wina'am noyelug bene Wina'am ni, ka Wina'am me bee o ni. O tisi ti o Siig Suŋ, ka o ke ka ti baŋ ye Wina'am bee ti ni.

will be added

X\