1 JOON 2

1M biise, m sobidi ya ne'eŋa ye ya da tum tuumbe'ede. Amaa so' ya'a tum be'ed, Yesu Kiristo one a popiel la na nwe' ti Ba' Wina'am nu'ug n tisi ti. 2Ka Kiristo ku'um la ane line ket ka Wina'am supeen naae ne ti tuumbe'ed. Li ka' tinam tuumbe'ed gullimne, ka ane nidib wusa tuumbe'ed. 3Ti ya'a siak Wina'am noyelug la li pa'al ye ti sid mi' o su'uŋa. 4So' ya'a yel ye o mi' o, ka pu siak o noyelugo, ninkan ane dama'am sob, ka yelsida ka' o sa'ane. 5Amaa so' ya'a siak o pian'ad, ninkan sid noŋ o bedego. Ne'eŋa na ke ka ti mi' su'uŋa ye ti be Wina'am sa'an. 6One yet ye o ane Wina'am nid on be su'um wenne Yesu Kiristo n daa be si'em la. 7M binoŋa, noyelug kan ka m sobid n tisidi ya la ka' yel paale. Li ane yelkudug kan ka ya da more yanam da dol Yesu Kiristo pin'ilugin sa la. Yelkudug la ane labaar kan ka ya pun wum. 8Ka noyelug kan ka m sobid n tisidi ya la ane yel paal. Ti nyee li yelsida la ne Kiristo sa'an ne yanam sa'an, bozugo lik la gaadeya ka yelmeŋir neesim la pun nie na. 9One yel ye o be neesim la ni, ka kis o ba'abiig, o nam kpelim bene likin. 10One noŋi o ba'abiig kpelim bene neesim la ni. Dinzugo, si'el kae' na ke ka o tum tuumbe'ede. 11Amaa one kisi o ba'abiig la bene likin, ka kene li ni, ka zi' on ken si'el la, lik la zu'om o la zug. 12M biise, Wina'am tisi ya suguru ka yiisi ya tuumbe'ed n bas Kiristo yu'ur zug la, dinzug ka m sobid ne'eŋa tisidi ya. 13M saamnama, m sobid ne'eŋa n tisidi ya, yaname mi' one da be dunia pin'ilugin sa la zug. Dasamaa, m sobid ne'eŋa tisidi ya, yaname nyaŋ Sutaana la zug. 14M biise, m sobid ne'eŋa tisidi ya, yaname mi' ti Ba' Wina'am la zug. M saamnama, m sobid ne'eŋa n tisidi ya, yaname mi' one da be dunia pin'ilugin sa la zug. Dasamaa, m sobid ne'eŋa n tisidi ya, yaname mor paŋ la zug, ka Wina'am pian'ad bene ya ni, ka ya nyaŋ Sutaana. 15Da noŋi dunia, ne bun lin wusa bee li ni. Ya ya'a noŋ dunia, ya pu noŋ ya Ba' Wina'am. 16Bun line be dunia ni, ka ka'a su'um nwa, niŋgbina boodim be'ed ne nini gosig be'ed ne tita'alim, bama wusa pu yi ti Ba' Wina'am sa'ane. Amaa li yi ne bane zi' Kiristo la sa'an. 17Dunia ne bun lin wusa bee li ni, ka nidib mor ya'amleog li ni la na gaad. Amaa one tum Wina'am boodim la na be yuma dine ka' naare. 18M biise, dunia naar la li'eleya. Ba daa yeli ya ye Kiristo dataa na kena. Ka nannanna, Kiristo dataas bedego pun kena, dinzug ka ti baŋ ye dunia naar la li'eliya. 19Nimbama nwa ka' Wina'am nidib ameŋa, dinzug ka ba yi ti sa'an. Ba ya'a daa aan o nidib, ba naan kpelim beene ti sa'an. Amaa ba basiya ye li pa'al nyain ye ba yinni ka' Wina'am nida. 20Kiristo tisi ya Wina'am Siig Suŋ la, dinzugo ya wusa mi' yelsida la. 21Li ka' ye yaname zi' yelsida la zug ka m sobid tisidi yaa, ka lee ane yaname mi' li, ka me mi' ye dama'am pu yit yelsida ni naa. 22Ano'one a dama'am soba? Li ane one ki'isid ka yet ye Yesu ka'a Kiristo la. One zan'asi ti Ba' Wina'am ne o Biig la, one a Kiristo dataa. 23One zan'as Biig la, me zan'as o Ba' Wina'am. Ka one siak Biig la me siak o Ba'. 24Keli ka pian'ad kan ka ya da wum yanam da dol Yesu Kiristo pin'ilugin sa la, kpelim bee ya sunya ni. Li ya'a kpelim bee ya sunya ni, ya na kpelim bee ti Ba' la ne o Biig la sa'an. 25Ne'eŋa nwa ka Kiristo da yel n zi'el ye o na tisi ti. Lini a nyovur kane ka'a naar la. 26M sobid ne'eŋa n tisidi ya ye m yeli ya nimbane zigid ye ba ma'a ya la yela. 27Kiristo daa tis yanam Wina'am Siig Suŋ la, ka o kpelim bee ya sa'an. Ka Wina'am Siig Suŋi pa'ane ya si'el wusa la zug, ya pu bood so' ya'as ye o pa'ali yaa. Ka on pa'an si'el la a yelsida, ka ka' ziri. Siakimi Siig Suŋ la pa'alug ka kpelimi Kiristo ni. 28M biise, kpelimini o sa'an, ka o ken daar na la ka ti mor sukpi'em, ka nyan da kpen'e ti ka ti sua'aa. 29Ya mi' ye Kiristo ane popiel, dinzugo baŋimi ye one wusa tum dine a su'um la ane Wina'am biig.

will be added

X\