1 KORINT DIM 9

1Li ane sida ye m more yolisim, ka a Kiristo Tumtum ka da nye ti Zugsob Yesu la. Ka m tuuma lin ka m tum n tis Zugsob la ke ka yanam a yadda niŋidib. Bee m ma'anee? 2Hale sieba ya'a pu siak ye m ane Kiristo Tumtum, li nar ka yanam siak. Yaname a yadda niŋidib la, nie bigis ye m ane Kiristo Tumtum. 3Nidib ya'a yel ye m ka'a Kiristo Tumtum na, anwana ka m na lebis yiisi m meŋ yel la ni. 4Man ne Barnabas pu mor suer ye ba tisi ti diib ne nuub ti tuuma zugo? 5Ti pu mor suer n na ke ka po'a kane me pu'usid Wina'am doli ti goond wenne ti Tumtum taaba la ne Zugsob pitib la ne Piita niŋid si'em la bee? 6Ya ten'es ye man ne Barnabas ma'aa nar ye ti tum n diisi ti meŋa? 7Sogia be yaani n tum zaalim ka pu di'ed yoode? Ano'on seed tiis ka ku di li wela? Ka ano'on kim niigi ka ku di ba bin'isim. 8M pu yel ne'eŋa ne ninsaalib paŋa, Wina'am wada la me yele ala. 9Li sob wada ban ka Wina'am da tis Moses la gbauŋin ye, “Mit ka ya li'a na'araad bane kuod la ne yuko.” Li ane niigi ka Wina'am daa yet bee? 10Ayei, li ane tinam yela, bee ka'a alaa? Eenn nwa sobne ti zug. Bozugo one kuod ki la kuodne ka one bu'udi li la me bu'udne, ka babayi wusa mor ti'ir ka mor poten'er ye ba na pudugi li n di. 11Ti tum tuuma bane a su'um n tisi ya siis wenne wuu bane but biili. Li a su'um ka ti di'e la'ad bane a su'um ya sa'an wenne wuu bunib. 12Sieba ya'a mor suer kan ka ba na di'e la'asuma bama ya sa'an, tinam mor suer hale ka li gaad ala. Amaa ti pu zaŋ suer kan la ye ti di'e si'el ya sa'anee. Amaa ti siak ye ti ku maal si'el line na giŋ Kiristo labasuŋ la moolugo. 13Ya mi' ye bane tum Wina'am pu'usum yin la, ba diib bene anina. Ka bane maan maana n tisid Wina'am ka tum maan maalug zin'ig la tuuma la, ba me di'edi ba diib anina. 14Ala men, Zugsob la tis noor ye bane moon labasuŋ la na paamidi ba si'el wusa ne anina. 15Amaa man pu zaŋ sueya ban ka m mor la yinni di'e si'el, ka me pu sobid ne'eŋa ye ya tis im si'ela. Hale m ya'a kpi, son'e so' naa ke ka m ku nyaŋe nwe'e nyo'ogo. 16Man moon labasuŋ la pu ke ka m tun'e nwe'e nyo'ogo. Li ane tilas ka m niŋid ala. M ya'a pu mool labasuŋ la, yeltoog na be m zugin. 17M ya'a mool labasuŋ la ne m meŋ boodim, m na di'e li nyood. Amaa m ya'a pu mool li ne m meŋ boodim, lin ane ye m kun moole sa. 18Ka ne' ya'a a sida bo a man nyoode? Li ane man yiti moon labasuŋ la zaalim ka pu zaŋ suer kan ka m na di'e si'el labasuŋ moolug tuuma la nii. 19Hale baa man mor yolisim ka so' pu so'e man la, m zaŋi m meŋ lieb yamug n tis nidib wusa ye m more ba bedego n kenn Kiristo sa'an na. 20M ya'a be Jew dim sa'an, m liebid wuu Jew nid ne, ye m more ba kenn Kiristo sa'an na. Ka m ya'a be ne bane dol wada ban ka Wina'am da tis Moses la sa'an, m liebid wuu ba nid yinni baa ne man pu dol wada la, ye m more bane dol wada la kenn Kiristo sa'an na. 21Ka bane pu dol wada la sa'an ka m daa me lieb wuu ban nid yinni, ye m more ba kenn Kiristo sa'an na. Ka ne'eŋa pu pa'alne ye m pu dol Wina'am wada laa. M dolne Kiristo wada. 22Ka ban yadda pu zu'e la sa'an, ka m daa me lieb wuu ba yinni ye m suŋi ba. M dolne sueya kon'ob kon'ob nidib buudi wusa sa'an, ye m tiligi ba sieba. 23Labasuŋ la zug m niŋid ne'eŋa wusa ye m ti di'e li bareka. 24Ya mi' ye zoogin, zotzotib wusa zotne, amaa ba yinni ma'aa dit ka di'ed piini. Dinzugo kpe'eŋimi ya meŋ bedego, wuu zotzotib n zot si'em la, ye ya ti di'e piini Wina'am sa'an. 25Zotzot wusa gban'edi ba meŋ si'el wusa ni ye ba di'e piini kane ku yuug ka sa'am. Ka tinam gban'edi ti meŋ ye ti ti di'e piini kane ka' naare. 26Dinzug man pu zot yoo yoogo, ka me pu zabid yoo yoogo wuu one zabid nwe'ed sisi'em laa. 27M mugusidi m meŋ tum wenne yamug ne. Ka mam mool labasuŋ la n tisid nidib la, mam meŋ da ko'oŋ nyood Wina'am sa'anee.

will be added

X\