1 KORINT DIM 8

1Nannanna m sobidne yeti ya bada diib yela. Ti mi' ye yaname yel si'em ye, ti wusa mor mi'ilim la, ane sida. Mi'ilim ketne ka ninsaal du'osidi o meŋ. Amaa noŋir kpe'eŋidne nidib. 2So' ya'a ten'es ye on mi' si'el, o mi'ilim nan pu paae wuu lin su'um ye o naan mi'in si'em laa. 3Amaa nid ya'a noŋ Wina'am, Wina'am mi' o, ka gosid o. 4Aa to, m yeti ya ne bada diib yela. Ti mi' ye ba'ar ane bun line pu voeya, ka me mi' ye Wina'am yinni ma'aa be. 5- 6Hale si'elnam ya'a be agol bee teŋin, ka ninsaalib buon ye Wina'amnam, tinam mi' ye Wina'am yinni be. Hale ka li a sida ye si'elnam bedego be ka ninsaalib buon ye wina'amnam ne zugsobnam, amaa Wina'am yinni be, ka ane ti Ba' one maal si'el wusa ka on zug ka ti voe. Ka ti lem mi' ye Zugsob yinni ma'aa be. O ane Yesu Kiristo, ka ti nyovur ne si'el wusa yi ne o ni na. 7Ka li ka' so' wusa mi' ne'eŋa. Ninsieba miilim bada hale ka ba ya'a di ba'ar diib ba kpelim ten'esid li yela ye li sid ane ba'ar diib. Ba potenda pu kpi'ema, ka ba ten'es ye diib la miligi ba ne. 8Diib pu ke ka ti malis Wina'am. Ti ya'a pu dii, li pu ket ka ti kpelim nya'aŋa, ka ti ya'a di, li pu ket ka ti gat tuone. 9Amaa gu'usimi ka ya yolisim kan ka ya more na di bada diib la, da ke ka nidib bane potenda Wina'am ni pu kpi'em la kpen' tuumbe'ed ni. 10Dau one yadda pu kpi'em ne'eŋa yela, ya'a nye fun one mor mi'ilim, ka fu be ba'amaalug zin'igin n dit diib, ne'eŋa ku ke ka o di ba'ar diib bee? 11Ka fun mi'ilim la na ke ka fu ba'abiig on yadda pu kpi'ema ka Kiristo kpii o zug la sa'am. 12Fu ya'a niŋid wala n tum tuumbe'edi sa'am fu ba'abiig on yadda pu kpi'ema, fu tumne tuumbe'ed n po'ogid Kiristo. 13Dinzugo diib ya'a ke ka m ba'abiig tum tuumbe'ed m meŋ kudin ku onb ni'im ya'asa, ka m da ke ka m ba'abiig kpen' tuumbe'ed ni.

will be added

X\