1 KORINT DIM 7

1Nannanna, yaname daa sob gbauŋ si'a la ka m ye m sob lebisi ya. Li su'um ka dau da di po'a. 2Amaa po'asa'uŋ bedego bee ya teŋin la zug, dau mekama su'um ye o mor o meŋ po'a ka po'a me mor o meŋ sid. 3Li su'um ka dau tum dau tuum tis o po'a, ka po'a me niŋ ala n tis o sid. 4Bozugo po'a pu so'e o meŋ niŋgbinaa. Ka li ane o sidi so'e li. Ka dau me pu so'e o meŋ niŋgbinaa. Ka li ane o po'a so'e li. 5Po'a ne o sid da zan'asi taaba. Asee ban na gban'e noor n zaŋ saŋa bi'ela ye ba sos Wina'am, ka naam lem la'as ne taaba, ka Sutaana da maki ba, bozugo ba ku tun'e nyaŋe ba meŋa. 6Ne' ane m meŋ ten'esug ka ka'ane wadaa. 7M ten'esug ane dau wusa naan a wuu mane a si'em la. Amaa ninsaal mekama mor o meŋ piini kan ka Wina'am tis o. Ti wusa yinni yinni mor piini gun gun. 8M yet ne'eŋa tisidi nidib bane ka'a po'ab bee ka'a sidib la ne pokonya, ye li a su'um n tisi ba ka ba kpelim be ban gullim wuu man be si'em la. 9Amaa ba ya'a ku nyaŋe gban'e ba meŋa, dap on dim po'ab ka po'ab me kul sidib. Li a su'uŋa ka ya niŋ ala n son'e yaname na ti more li ya'amleog ka li zabid wuu bugum. 10M mor noyelug n na tis nidib bane mor po'ab bee mor sidib la. Ka li ane Zugsob la din ka li ka' man dine. Li ane ye po'a da bas o sida. 11Amaa o ya'a bas o sid, on zin'i, ka da toom kul sida, bee on ne o sid la naalim taaba. Ka dau me da bas o po'a. 12Ne'eŋa ane man meŋ noyelug ka m yet nimbane kpelim. Li ka' Zugsob la yelugo. Li ane ye one siak Wina'am ya'a mor po'a sa, ka po'a la ka' yadda niŋid, ka siak ye ba la'am be, on da bas oo. 13Po'a one siak Wina'am ya'a kul sid sa, ka dau la ka' yadda niŋida, ka siak ye ba la'am be, on da bas oo. 14Po'a kane a Wina'am nid la tun'e ke ka o sid a nyain, ka dau kane a Wina'am nid la tun'e ke ka o po'a a nyain. Ne'eŋa ya'a ka'ane ala, ba biis naan aan dian'ad. Ka lin a si'em la, biis la me a nyain. 15Amaa one ka' yadda niŋid ya'a bood ye o bas one a yadda niŋid, on niŋimi ala. Li ka'a mugusug ye po'a bee dau one a yadda niŋid la'asem ne one ka' yadda niŋida. Wina'am buoli ti ye ti be ne sumalisim. 16“Po'a one a yadda niŋida, fu niŋ wala baŋ ye fu ku tun'e tiligi fu sida? Ka dau one a yadda niŋida, fu niŋ wala baŋ ye fu ku tun'e tiligi fu po'a?” 17So' mekama dol beilim kan ka Wina'am tis o, ne on daa a si'em ka Wina'am buol o la. Ne'eŋa a lin ka m tis noor Wina'am nidib bane be zin'is wusa. 18One kpen' baŋo, ka Wina'am nyaan buol o, on da mood ye o yiis baŋo la isir n base. One me pu kpen' baŋo ka Wina'am buol o, on da kpen'e. 19Ka one kpen' baŋo ne one pu kpen' baŋo wusa ane zaalim. Lini pak ane Wina'am noyelug la siakir. 20So' mekama kpelim be on daa a si'em ka Wina'am buol o la. 21Fu ya'a daa ane yamug saŋkan ka Wina'am buol fu, fun da ke ka li paki fu. Amaa fu ya'a na nye yolisim suer fun di'em. 22Ka on ka Zugsob la buol, ka o a yamug, ane Zugsob la yolisim nid. Ala men, yolisim nid on ka Kiristo buol, ane o yamug. 23Wina'am da'a ya ne. Dinzugo, da liebi wuu yamis n tis nidiba. 24Dinzugo m ba'abiise, so' mekama daa a si'em ka Wina'am buol o la, on be ala ne Wina'am noor yinni. 25Ne' bipumis bane pu kul sidib yela, m pu di'e noor Zugsob la sa'ane. Amaa m tu'asidne m poten'er mor si'el line ka m paam Zugsob la sa'an o nimbaanlzoor la yela ye ya na siak ye mane yel si'el la ane yelsida. 26To'ogi a si'em nannanna la zug, man ten'es ye li su'um ka nid na kpelim zin'in wuu o beilim a si'em la. 27Fu ya'a mor po'a, fun da mood ye fu bas oo. Ka fu ya'a a dakoonr men fun da ied ye fu di po'a. 28Ka fu ya'a lia' po'a ka o kul uf, fu pu tum tuumbe'ede. Ka one me pu mor sid ya'a kul sid, o pu tum tuumbe'ede. Ka m bood ye ya luak yela ban ka bane mor po'ab bee mor sidib la na nye dunia nwa ni la. 29M ba'abiise, lin ka m yel la gbin ane ye, saŋa kan ka Wina'am zi'el n tisi ti la pu lem zu'e. Nannanna wa'ae sa, li a su'um ka bane mor po'ab la wenne wuu ba ka' po'aba, 30ka bane kaasid wenne ba sunya pu sa'am, ka bane la'ad wenne ba ka'a sumalisim, ka bane da'ad wenne ba pu so'e lii, 31ka bane mor dunia la'ad n maan ban bood si'em da ke ka li yela loo ba zute. Ka dunia kaŋa a si'em nannanna nwa, ye li gaad ne. 32M pu bood ye si'elnam daami yaa. Dakoonr gosidne on na niŋ si'em tum Zugsob la tuuma, ka niŋ si'el ka li na malis Zugsob la. 33Ka po'a daan gosidne dunia la'ad ne on na niŋ si'em ka li malis o po'a. 34Dinzugo o ya'amboodim pudugne. Ka po'a one ka' sid, gosidne Zugsob la tuuma yela, on na niŋ si'em ka o niŋgbina ne o siig na ti a Wina'am din. Ka one mor sid, gosidne dunia la'ad ne on na niŋ si'em ka li malis o sid. 35Yanam su'um zug ka m yel ne'eŋa ye m suŋi ya. M pu kpe'eŋid ye m zuol dine kisi ya zutine. Amaa m boode ye ya tum dine a su'um ne dine nar, ka zaŋi ya meŋ wusa n pesig Zugsob la. 36Nid ya'a more o bipuŋ ka o bi'ig n tu'ug sid kulig, ka li mor po'ogir, on kel ka o kul sid wenne on ten'es si'em o suunrin la. O ya'a zaŋ o bipuŋ la tis sid, o maal su'uŋa. 37Ka niŋkane suunre kpi'em ne yelkaŋa, ka o ten'es o poten'erin ka gban'e o ya'amin ye o na mor o bipuŋ la ka o da kul sida, ka mugusug kae', o ya'a mor paŋ na maal nwa, o maal su'uŋa. 38Ala zugo, one tisidi o bipuŋ sid maane su'uŋa. Ka one me pu tisidi o bipuŋ sida, maan su'uŋa gaad. 39Po'a one kul sid, ka o nam voe, o pu so'e o meŋ. Ka o sid ya'a kpi, suer be ka o na tun'e kul on ka o bood, asee ka li a Zugsob la boodim. 40Ka man ten'eseya ka o ya'a kpelim be on a si'em la, li na malis o gaad on na kul dau. Ka m mi' ye m me mor Wina'am Siig n pa'ani ya.

will be added

X\