1 KORINT DIM 6

1Ya yinni ya'a mor antu'a ne o ba'abiig, ka pu more keŋ bane a Wina'am nidib sa'an ka ba la'ase maali, ka more keŋ bane ka' Wina'am nidib koto ni maal, li pu mor nyannee? 2Ya zi' ye Wina'am nidib na ti kad dunia dim saria? Ka ya ya'a na ti kad dunia dim saria, ya ku nyaŋe tu'as antu'abibis yela nannanna? 3Ya zi' ye tiname na ti kad maleknam saria, ka kelle dunia kaŋa nwa yela? 4Ka ya ya'a mor antu'a bama, bo ka ya more ken bane pu dol Wina'am sa'ane? 5Ne'eŋa ane nyan n tisi ya. Wina'am nidib soogin sieba ya'a nwa'as ne taaba, nid so' ka' ya soogin mor ya'am na tun'e maal ba pian'ad la bee? 6Ka Wina'am nidib soogin sieba more ba antu'a ka pu tu'asi li ba meŋa, ka lee more li keŋ bane ka' yadda niŋidib la koto ni ka ba tu'asi li. 7Asida ya pun po'ogne, yanam mor ya antu'a kenn koto ni ne ya yadda niŋidib taaba la. Li a su'um ka ya siak po'ogir, bee ban na zu ya la'ad ka ya bas taal n gaad yaname na mor ya yadda niŋidib taaba n keŋ koto ni. 8Amaa yaname maan taaba be'ed ka zuud taaba, bane a ya ba'abiis, Wina'am dolim ni. 9Ya pu baŋ ye tuumbe'ed dim ku ti kpen' Wina'am so'olim la nii? Da ma'a ya meŋa. Nimbane a po'asa'amidib bee bane maan bada bee dap bane dig ne ba dap taaba la, 10bee na'ayiis bee bane mor fufum, bee bane nut daam n koon bee bane tu'ud nidib bee faandib, baa ba yinni ku kpen' Wina'am so'olim la nii. 11Ya sieba daa ane ala. Ka Wina'am daa pie ya tuumbe'ed ka ya lieb o meŋ nidib, ka o ke ka ya a popielim dim o tuon, yaname a yinni ne ti Zugsob Yesu Kiristo ne Wina'am Siig Suŋ. 12So' na yel ye, “M mor suer na maal man bood si'el wusa.” Sida. Amaa li ka' si'el wusa a su'um n tisid oo. O ye, “M mor suer na maal man bood si'el wusa.” Sida. Amaa m ku siak n lieb si'el yamugo. 13“Diib be ne poor yela, ka poor me be ne diib yela.” Sida! Amaa Wina'am na sa'am babayi la wusa. Niŋgbiŋ la ka'ane dausa'uŋ bee po'asa'uŋ yelle, li ane Zugsob yela. Zugsob la me be ne ti, ti niŋgbina yela. 14Wina'am vu'ug Zugsob la kumin, ka o paŋ la me na vu'ugi ti. 15Ya zi' ye Kiristo so'e ya niŋgbina lua wusa? Dinzugo li na a su'um ye m zaŋ Kiristo niŋgbina n la'as ne po'agoonda niŋgbina bee? Ayei baa bi'elaa. 16Ya zi' ye one la'as o meŋ ne po'agoondir on ne po'agoondir la lieb ne niŋgbiŋ yinni? Li sob Wina'am gbauŋin, dau ne o po'a yela ye, “Babayi la na lieb niŋgbiŋ yinni.” 17Amaa one la'as o meŋ ne Zugsob la on ne Zugsob la ane yinni siig la ni. 18Luakim dausa'uŋ ne po'asa'uŋ. Bozugo tuumbe'ed wusa ban ka ninsaal maan la pu be o niŋgbinaa. Amaa tuumbe'ed dine a po'asa'uŋ la be ne ninsaal niŋgbina ni. 19Ya zi' ye ya niŋgbina la ane Wina'am Siig Suŋ la yire, one bee ya ni la on ka ya di'e Wina'am sa'an laa? Ya pu so'e ya meŋa. 20Wina'am da'a ya ne. Dinzugo na'asimi Wina'am ne ya niŋgbina.

will be added

X\