1 KORINT DIM 4

1Kel ka ba gos ka ti a Kiristo tumtumnib ne yelmaanib ka Wina'am gu'uli ba ne yelsua'adir line a ameŋa la. 2Li nar ka one ka Zugsob nok tuuma niŋ o nu'usin a yelsida sob. 3Li pu daam man baa bi'ela ye yanam bee ninsieba n pian'ade m yela wuu ya ane sariakatib la. Hale m pu pian'ad m meŋ yela wuu sariakata. 4Man poten'er a nyain, amaa li pu pa'al ye m pu maal be'ede. Zugsob la a one kad man saria. 5Dinzugo, da wenne sariakatib n deŋi koos so' ye o maal be'ed, ka Zugsob la nam pu kenaa. O ya'a ti kena, o na ti yiis line sua' likin paalo ni na, ka nie line be ninsaalib wusa potenda ni. Saŋkan la Wina'am na pian' so' wusa pian'asuŋ line nar o. 6M ba'abiise, yanam su'um yela ka m nok ne'eŋa wusa mak ne mam meŋ ne Apollos ye ya zamis tinam sa'an yelug line ye, “Dol Wina'am gbauŋ la yel si'em la titu'aa.” Dinzug da nwe' nyo'og ne nid yinni ka ne'es ayinni. 7Ano'one maali ya ka ya be ya kon' ne sieba? Bo ka ya mor ka li ka'a ye Wina'am tisi ya? Ka ya ya'a di'e li, wala ka ya du'osidi ya meŋ wenne ya pu di'e li? 8Ya pun mor yaname bood si'el wusa, ka pun mor Wina'am piini wusa. Ka me lieb na'anam hale ka tiname pu pa'ase. M naan boodin ka ya sid aan na'anam, ka ti wusa la'am di na'am. 9Man sa'an, m ten'eseya ka Wina'am gaŋ tinam bane a Tumtumnib la ka ti a tadimnam, n wenne nidib bane ka ba kuud paalo ni la, ka dunia dim wusa ne maleknam la'am gosidi ti la. 10Tinam ane zon Kiristo zug, amaa yanam ane ya'am dim Kiristo ni. Tinam ka' paŋa, amaa yanam mor paŋ. Nidib ne'esid tinam amaa ba na'as yanam. 11Lin paae saŋkaŋa nwa, tinam gilig ne ko'om ne ku'onuud ka yeed kparikeend n kene giligid zin'ig zin'ig ka ba bu'ud tinam, 12ka tum bedego n diisidi ti meŋ. Ba ya'a po noor tisi ti, ti lebisidne bareka pu'usug. Ba ya'a namisi ti, ti modigidne. 13Ba ya'a pian' ti pian'abe'ed, ti lebisidne pian'amalisiŋ. Ti lieb tadimnam ka wenne dunia tampoor ne dunia bundian'adnam ne, hale n paae nannanna. 14M pu sob ne'eŋa tisi ya ye m diisi ya nyan ne, amaa ye m pa'ali ya wenne ya ane man meŋ binoŋa. 15Hale baa ya ya'a mor suŋidib tusa piiga yaname dol Kiristo la, ya mor ba' yinni ma'aa. Bozugo ya nyovur beilim ne Yesu Kiristo noor yinni la'asug la, mane lieb ya saam, man n mor labasuŋ la kena tisi ya la zug. 16Dinzugo m belimi ya, ye ya doli mane maan si'em la. 17Ne'eŋa yela ka m tum Timoti ya sa'an na. O ane m meŋ binoŋir, on a yelsida sob Zugsob ni. One na tienn ya man nyovur beilim Kiristo ni yela, lin na dol ne bun lin wusa ka m pa'an yadda niŋidib n be zin'is wusa la. 18Ya sieba mor nyeesim n ten'esid ye m ku kena kaae yaa. 19Ka Zugsob la ya'a bood, li ku yuuge ka m na keen ya sa'an, ka baŋ lin ka nyeesim dim bama na tun'e maal, ka ka' ba pian'ad la ma'anee. 20Wina'am so'olim ka'ane noor pian'ade, amaa ka lee mor paŋ. 21Ya bood dine? M kena fi'ebi ya ne kpa'asa bee m kena ne noŋilim ne sumbugusum na?

will be added

X\