1 KORINT DIM 15

1M ba'abiise, nannanna m bood ye m tienn ya labasuŋ kan ka m da mooli tisi ya, ka ya di'e li mor kiŋ kiŋ la yela. 2Ya ya'a mor li kiŋ kiŋ, li na faaenn ya. Ka li ya'a ka'a alaa, ya yadda niŋir ane zaalim. 3M tolis man di'e si'eli tisi ya line a buntita'ar n gaad si'el wusa, ye Kiristo kpi ti tuumbe'ed zug, ka li dolne lin da sob Wina'am gbauŋin si'em la. 4Ka ba da mum o, ka Wina'am vu'ug o kumin daba atan' daar, ka li me dolne lin da sob si'em la. 5Ka o da nie o meŋ n pa'al Piita, ka naan nie o meŋ n pa'al Tumtumnib piina ayi la. 6Ka lin nya'aŋ ka o nie o meŋ saŋa yinni o nya'andolib bane gaad kobus nu la sa'an. Ba sieba bedego nan voe, ka sieba kpi. 7Ka o nie o meŋ Jemes sa'an, ka yu'un nie o meŋ Tumtumnib la wusa sa'an. 8Lin wusa nya'aŋ ka o nyaan nie o meŋ pa'al man one wenne one ka ba yuolim du'a la. 9Mane a kpaanr Tumtumnib la wusa sa'an, ka pu nar ka ba buoli m ye Tumtum na, man da namis Wina'am nidib la zug. 10Wina'am popielim zug ka m kilim man a si'em nannanna nwa. Ka popielim kan ka Wina'am tisi m la ka' zaalim, ka man tum gaad bama wusa. Ka li daa ka' m meŋi tumi lii. Wina'am popielim zug ka m daa nyaŋe tumi li. 11Dinzugo, li ya'a daa ane man one moon labaar la bee ban, ti wusa moon labaar line ka m pun tienn ya li yela, ne line ka ya daa siak la. 12Ka ti labaar ya'a a ye Kiristo vu'ug kumin, wala ka ya sieba yel ye, bane kpi ku vu'ug kumine? 13Ka li ya'a a sida ye bane kpi ku vu'ug kumine, ala li pa'ale ye Kiristo da pu vu'ug kumine. 14Ka Kiristo ya'a da pu vu'ug kumine, alaa ti labasuŋ la moolug ane zaalim, ka yanam yadda la me a zaalim. 15Li ya'a a sida ye bane kpi pu vu'ugid kumine, ala Wina'am da pu vu'ug Kiristo kumine, ka lin pa'al ye tinam ma'ade ziri Wina'am yela, tiname yel ye Wina'am vu'ug Kiristo kumin la zug. 16Bane kpi ya'a pu vu'ug kumine, ala Wina'am da pu vu'ug Kiristo kumine. 17Ka Kiristo ya'a pu vu'ug kumine, ya yadda niŋir la ane zaalim, ka ya tuumbe'ed kpelim bee ya ni. 18Li me na pa'al ye bane a Kiristo yadda niŋidib ka kpi la, bodigne. 19Ti ya'a mor ti'ir Kiristo ni ti dunia beilim nwa, ti mor nimbaanligi gat so' mekama dunia ni. 20Amaa ne'eŋa ane sida ye Wina'am vu'ug Kiristo kumin, ka o sid a one vu'ug kumin yiiga. 21Din a ninsaal yinni n mor kum n kenn dunia ni la na, ala men kum vu'ugir yine ninsaal yinni ni na. 22Adam zug ka nidib wusa kpiid. Ala men ka bane a Kiristo nidib na vu'ug kumin. 23Amaa so' mekama mor o saŋa, ka Kiristo n vu'ug kumin yiiga, bane aa o nidib me na ti vu'ug o ken daar la na. 24Dunia naar na kenn Kiristo lebig nya'aŋ na, ka Kiristo na sa'am bane so'e dunia nwa paŋ ne kpi'euŋ dim ne na'anam wusa paŋ, ka zaŋ so'olim la yu'un lebisi tisi o Ba' Wina'am. 25Bozugo li ane tilas ye Kiristo di na'am hale ti paae saŋkan ka o dataas wusa na be o nu'usin. 26Ku'um ane dataa kane ka o na ti yuolim sa'am. 27Li yel Wina'am gbauŋin ye, “Wina'am zaŋ si'elnam wusa n niŋ Kiristo nu'usin.” Amaa li pu pa'al ye si'elnam wusa la paas Wina'am one lee zaŋ si'el mekama wusa n niŋ Kiristo nu'usin laa. 28Si'elnam wusa ya'a ti be Kiristo nu'usin, on one a Wina'am Biig la me na niŋ o meŋ Wina'am nu'usin. Li ane Wina'am one zaŋ si'elnam wusa n niŋ o nu'usin la. Ka Wina'am na a si'elnam wusa na'ab. 29Nidib ya'a ku vu'ug kuminee, bo ka ninsieba di'ed ku'om suub tisid bane pun kpi la? Ku'um ya'a kudin ku vu'ugi, bo ka ba niŋid ne'eŋa? 30Ka bo ka ti kpen'esidi ti meŋ yela ni saŋa wusa? 31M ba'abiise, m nwe'ed nyo'og ya yela, yanam be si'em Zugsob Yesu Kiristo ni la zug. Ne'eŋa zug ka m yeti ya ye m pu lal ne ku'um daar wusa la. 32M daa nye yela Efesus teŋin wenne one zab ne gbigima ne, ka lin ya'a a dunia nwa yela ma'aa, li nyood a bo? Ku'um ya'a pu vu'ugida, siiliŋ la yel sida ye, “Keli ka ti di ka nu, ka beog ti saa kpiidne.” 33Da ke ka so' ma'a yaa. Siiliŋ ane sida ye, “Dolim taab be'ed sa'amid ninsuŋ.” 34Keli ka ya ya'am leb na, ka da lem tum tuumbe'ede. Sieba zi' Wina'am. Ka m sobid ye m diisi ya nyan. 35Ka so' na bu'os ye, “Wala ka bane kpi la na ti vu'ug kumine? Niŋgbiŋ bo buudi ka ba na ti mora?” 36Zoluga! Fu zi' ye fu ya'a but si'el biili ka li bul, asee pak la pun'e ka bul la yu'un vu'ugi? 37Fun but si'el la kuduŋ ane biilif. Li tun'e a ki biilif bee biil sieba. Ka lin ka fu but la niŋgbiŋ ku wenne line na ti yi na laa. 38Amaa Wina'am tisid biilif kan ka fu but la ne on Wina'am bood niŋgbiŋ si'a, ka me tisid biilif buudi wusa niŋgbiŋ kon'ob kon'ob. 39Li ka' niŋgbina wusa n wen na. Ninsaalib more niŋgbiŋ buudi yinni, ka bunkonbid me niŋgbina bee li kon', ka niis niŋgbina me bee li kon', ka zimi me niŋgbina bee li kon'. 40Saazug bunam more ba meŋ niŋgbina, ka dunia bunam me more ba meŋ niŋgbina. Venlim be saazug bunam niŋgbina la ni, ka venlim me be dunia bunam niŋgbina la ni. 41Winig mor o meŋ venlim, ka nwadig me mor venlim si'a. Ka nwadibibis venlim me bee li gunni. Hale nwadibibis la soogin ba venlim be gun gun. 42Ala ka li me na ti a kumvu'ugir saŋa. Niŋgbiŋ ya'a sig teŋin, li pun'odne. Amaa Wina'am ya'a ti vu'ugi li, li pu pun'oda. 43Ku'um mumne ne ziemis, ka na ti vu'ug ne venlim. Li mumne ne tadimis ka na ti vu'ug ne paŋ. 44Li ya'a sig teŋin, li ane dunia ni niŋgbiŋ. Amaa Wina'am ya'a ti vu'ugi li, li ane arazana ni niŋgbiŋ. Ti mor niŋgbina line a dunia ni din. Ala men ti na ti mor niŋgbina line a arazana ni din. 45Li sob Wina'am gbauŋin ye, “Adam ane niŋkane da deŋi be yiiga.” Yesu one a niŋkane kpelim nya'aŋ la ane siig one tisid nyovur. 46Li ka' arazana ni niŋgbina la ka ti di'ed yiiga. Ti di'ed dunia ni din la yiiga, ka naan di'ed arazana ni din. 47Wina'am da maal deŋir dau, Adam la, ne teŋ titan. Amaa dau one tia'al la yi ne arazana ni na. 48Dunia nidib wusa n wenne nid on ka Wina'am da zaŋ teŋ titan maal la. Ka Wina'am nidib me wenne nid one da yi arazana ni na la. 49Tiname wenne nid one ka Wina'am maal ne teŋ titan la, ala men ti na ti wenne nid one yi arazana ni na la. 50M ba'abiise, ne'eŋa ka m sobidi yeti ya ye, ninsaal niŋgbina ane dunia ni din, ka ku nyaŋe kpen' Wina'am so'olim nii. Niŋgbiŋ line pun'od la ku nyaŋe di'e nyovur line ka' naare. 51Kelisimi yelsua'adir kaŋa. Sieba na kpi, amaa li ka' wusaa. 52Ka dunia naar, na'atan ya'a ti pieb, ti wusa na tiak yimmo, wenne nini amisid si'em la. Na'atan na pieb, ka bane kpi na vu'ug ne niŋgbina line kudin ku kpii, ka Wina'am na tiake ti niŋgbina. 53Li ane tilas ye dunia ni niŋgbiŋ kane pun'od la na gaad, ka ti na di'e niŋgbiŋ kane pu pun'oda. Ka niŋgbiŋ kane me kpiid na gaad, ka ti na di'e niŋgbiŋ line pu kpiida. 54Dinzugo ne'eŋa ya'a ti niŋ, ala ka line sob Wina'am gbauŋin ye, “Wina'am nyaŋ ku'um, ka ku'um len kae' la,” na niŋ ameŋa. Li lem sob ye, 55“Ku'um, fu paŋ kane nyaŋed nidib ka toondi ba wenne naŋi yiti ton' nidib si'em la be yaa ni?” 56Li ane tuumbe'ed ket ka kum nyet paŋ na ton' nidib. Ka li ane wada la ket ka tuumbe'ed nyet paŋ. 57Ka ti pu'us Wina'am bareka on tisi ti kum nyaŋer paŋ ti Zugsob Yesu Kiristo ni la. 58Dinzugo m ba'abinoŋa, yaname sadigim mi' ye bun lin ka ya niŋid Zugsob yela ka' zaalim la, yanam modigimi n zi'ene kiŋ kiŋ ka kpe'eŋi ya meŋ saŋa wusa ya tuuma ni n tis Zugsob la.

will be added

X\