1 KORINT DIM 14

1Keli ka noŋilim a ya bunboodim gaad si'el wusa, ka boomi Siig Suŋ piini la bedego. Line gaad li wusa ane nodi'esug piini line yi Wina'am sa'an. 2One pian'ad pian'azuna o pu pian'adi tisid nidiba, amaa o pian'adne tisid Wina'am, ka so' ku baŋ on yet si'el laa bozugo o pian'adne yelsua'ada la ne Siig la paŋ. 3Ka one di'esid Wina'am pian'ad n tisid nidib, pian'adne n suŋid nidib ka me kpe'eŋidi ba, ka belisidi ba. 4One pian'ad pian'azuna suŋidne o meŋ. Ka one di'esid Wina'am noor pian'ad n tisid nidib suŋidne Wina'am nidib. 5M bood ye ya wusa pian'ad pian'azuna, ka bood ye ya di'esid Wina'am noor pian'ad la n tisid nidib gat ala. One di'esid Wina'am noor pian'ad la tisid nidib gat one pian'ad pian'azuna. Amaa o ya'a tu'as pian'azuŋ la gbin ka li suŋ nidib, ba pu gat taabaa. 6M ba'abiise, m ya'a keenn ya sa'an na n pian'ad pian'azuna, m na niŋ wala suŋi yaa? M ku suŋi yaa, asee ka m pa'ali ya bun line yi Wina'am ni na, bee m ke ka ya baŋ si'el, bee m di'e Wina'am noor pian'ad si'a n tisi ya, bee m pa'ali ya si'el. 7Bun line ka'a nyovur ya'a maan vuud wenne wiigi piebid bura bura ka li ka'a gbin ne, fu ye fu niŋ wala baŋ line piebid si'el yela? 8Na'atan ya'a piebid ka pu pieb tanp piebugo, ano'one na ti'ebi yi tanpo? 9Ala men ya ya'a pian'ad pian'azuŋ ka li gbin ka' nyainee, so' na niŋ wala baŋ yanam yet si'ela. Ya pian'ad la na ane zaalim. 10Pian'ad buudi bedego be dunia ni, ka ba yinni kae' pu mor gbin ne. 11M ya'a zi' pian'ad gbin ne, m ane saani tis one pian'ad la. Ka one pian'ad la me a saani tisi m. 12Yanam sadigim bood Siig Suŋ piini la, boomi piini line na kpe'eŋ Wina'am nidib bedego. 13Dinzugo, one pian'ad pian'azuŋ, on sosim Wina'am ka o ke ka o nyaŋe tu'asi li gbin. 14M ya'a pu'us Wina'am ne pian'azuŋ, m siig pu'usid, amaa m ya'am ka' li nii. 15Ka bo ka m na niŋ yu'use? M na pu'us ne m siig ka me lem pu'us ne m ya'am, ka yum ne m siig ka me lem yum ne m ya'am. 16Fu ya'a pu'us Wina'am bareka ne fu siig, nid one la'as ne fu ka zi' fun yet si'ela, na niŋ wala siaki fu pu'usum ye, “Ami?” 17Hale fu Wina'am pu'usum la ya'a a su'uŋa gba, li ka' suŋir n tis ninkaŋa la. 18M pu'us Wina'am bareka man pian'ad pian'azuna n gat yanam wusa la. 19Amaa Wina'am nidib la'asugin m bood ye m pian' pian'uk anu ne m ya'am ye m pa'al nidib n gaad man na pian' pian'uk tusa piiga ne pian'azuŋ. 20M ba'abiise, da wenne biise ya potenda nii. Amaa aae wuu biise ya tuumbe'ed poogin. Kel ka ya potenda wenne kpeenmnam potenda ne. 21Li sob Wina'am gbauŋin ye, “Zugsob la yel ye, ‘M na ke ka ninsieba ne saam pian' m labaar tisi m nidib, ka li a pian'azuŋ ba sa'an. La'am ne wala wusa, ba ku kelise.’ ” 22Dinzug, pian'azuna ane si'el line na sa'al bane ka' yadda niŋidib, ka ka' bane a yadda niŋidib. Ka nodi'esug a line na pa'al n tis bane a yadda niŋidib ka ka' bane ka' yadda niŋidiba. 23Yadda niŋidib wusa ya'a la'as taaba, ka so' wusa pin'ili pian'ad ne pian'azuna, ka yiiŋ dim kpen' na, ba ku yel ye ya geemnee? 24Amaa yadda niŋidib wusa ya'a la'as taaba ka so' wusa di'esid Wina'am noor pian'ad n tisid nidib ka yiiŋ nid kpen' na, on wum si'el wusa la na ke ka o baŋi o tuumbe'ed, ka kad o meŋ saria. 25Yelsua'ada bane be o suunrin na nie paalo ni, ka o na igin pu'us Wina'am ka peligi o poog yel ye, “Asida, Wina'am bee ya ni.” 26Dinzugo m ba'abiise, ya ya'a la'as taaba ye ya pu'us Wina'am, so' more yuum, ka so' me more pa'alug, ka so' more si'el line ka Wina'am nie pa'al o, ka so' more pian'azuŋ, ka so' me more pian'azuŋ la gbini na tu'asi tis nidib. Niŋimi si'el wusa ka li suŋ Wina'am nidib. 27Ninsieba ya'a ye ba pian' ne pian'azuna, nidiba ayi bee nidiba atan' gullim pian'am yinni yinni, ka so' me tu'as ban yel si'el la gbin. 28Amaa so' ya'a kae' na nyaŋe tu'as pian'azuna la gbin ne, one pian'ad pian'azuŋ la da pian' yadda niŋidib la'asugin ne, ka lee pian' tis o meŋ ne Wina'am. 29Keli ka nodi'esidiba ayi bee atan' pian'. Ka ban kpelim la geligim gos ye li a su'uŋa bee. 30Ka nid yinni ya'a pian'ad ka Wina'am Siig Suŋ nie si'el pa'al so' la'asugin la, one deŋim pian'ad la na bas pian'ad. 31Ya wusa yinni yinni na nyaŋe di'e Wina'am noor pian'ad n tis nidib, ka ya wusa zamis ka kpe'eŋ. 32Nimbane mor Wina'am Siig nodi'esug la piini la tun'e gban'e ba meŋ ne nodi'esug piini la yela. 33Bozugo Wina'am pu buoli ti ye ti tum yori yorii amaa ye ti be baanlim. 34Po'ab sini ba noya yadda niŋidib la'asug doogin, wenne zin'ig wusa ka Wina'am nidibi n maan si'em la. Suer pu be ka ba pian'ad la'asugin ne. Amaa ba siakimi ba sidib noya wuu Jew dim wada la yel si'em la. 35Si'el ya'a be ka ba bood ye ba baŋ, ban on bu'osimi ba sidib ba yaan. Li ane nyan ne po'ab n na pian'ad yadda niŋidib la'asugin. 36Ya ten'es ye li ane yanam ni ka Wina'am labaar la pin'ile? Ka ane yanam gullim ni ka li kenaa? 37One ten'es ka o a Wina'am nodi'es bee o ane on ka Wina'am Siig Suŋ bee o ni, on siakim ye lin ka m sobidi tisidi ya nwa ane Zugsob la noyelug. 38Amaa so' ya'a pu kelis ne'eŋa, yanam on da kelisi ne oo. 39Dinzug m ba'abiise, boomi Wina'am nodi'esug, ka da zan'asi pian'azunaa. 40Maalimi si'el wusa su'uŋa, ka da ke ka li a yori yorii.

will be added

X\