1 M ba'abiise, nannanna m yeti ya ne piini line yit Wina'am Siig Suŋ ni na la yela. M bood ye ya baŋi li yela a sida si'em. 2 Ya mi' ye yaname daa nan kae' yadda niŋidib la, ba'a kpiilima daa more ya n dol suer be'ed. 3 Dinzugo, m bood ye ya baŋ ye Wina'am Siig Suŋ la ya'a be so' ni, o ku tun'e pian' Yesu yela be'ede. Ka so' me ku tun'e yel ye Yesu ane Zugsoba, li ya'a ka'a ye Wina'am Siig Suŋ la bee o nii. 4 Siig Suŋ la tisid piini kon'ob kon'ob. Amaa li wusa yitne Siig Suŋ yinni la ni. 5 Tuuma kon'ob kon'ob be. Amaa li ane Zugsob yinni ka ti tumi tisid. 6 Tuuma kon'ob kon'ob be. Amaa li ane Wina'am yinni tisid nidib ya'am ka ba tumi li. 7 Wina'am Siig Suŋ la tisid yadda niŋidib wusa piini si'a line pa'an Siig Suŋ la paŋ ye li suŋ Wina'am nidib wusa. 8 Siig Suŋ la tisid ninsieba piini ka ba pian'ad ya'am pian'ad, ka tisid sieba mi'ilim pian'ad, 9 ka tisid sieba yadda tita'ar Wina'am ni, ka tisid sieba piini line na ti'eb ban'adnam, 10 ka tisid sieba paŋ ka ba na nyaŋe tum tuumnyalima, ka tisid sieba piini ka ba di'ed Wina'am pian'ad n tisid nidib, ka tisid sieba ya'am ka ba na nyaŋe baŋ line yi Siig Suŋ la sa'an na ne line pu yi aninaa, ka tisid sieba piini ka ba na tun'e pian' pian'azuna, ka tisid sieba ka ba na tun'e tu'as pian'azuna la gbin ne a si'el. 11 Li ane Siig Suŋ yinni la n niŋid ne'enam wusa. O tisid so' mekama ne piini gun gun wuu on bood si'em. 12 Kiristo nidib wenne niŋgbiŋ yinni ne, n mor luas bedego. Hale ne lin mor luas buudi kon'ob kon'ob la li kpelim ane niŋgbiŋ yinni. 13 Tinam wusa bane a Jew dim ne bane ka' Jew dim, yamis ne bane ka'a yamise, Kiristo suu ti wusa ne Wina'am Siig Suŋ ka ke ka ti liebi wenne niŋgbiŋ yinni. Wina'am tumi o Siig Suŋ yinni la n tisi ti wusa. 14 Niŋgbiŋ la meŋ pu mor lua yinni ma'anee. Li more luas bedego. 15 Nobir ya'a yelin ye, “Man ka'a nu'ug la zug, m ka' niŋgbiŋ la nii,” lin ku nyaŋen keen ka o ka' niŋgbiŋ nii. 16 Tobir me ya'a yelin ye, “Man ka'a nif la zug, m ka' niŋgbiŋ la nii,” lin ku nyaŋen keen ka o ka' niŋgbiŋ nii. 17 Niŋgbiŋ la wusa ya'a aane nifo, li ye li niŋin wala n wum pian'ade? Ka li ya'a aane tobir, li ye li niŋin wala n wum nyuugo? 18 Lin a si'em la, Wina'am maalne niŋgbiŋ luas wusa to'oŋ wuu on bood si'em. 19 Li wusa ya'a aane lua yinni ma'aa, niŋgbin naan ku beene. 20 Lin a si'em la, luas bedego be, amaa li ane niŋgbiŋ yinni. 21 Dinzugo nif ku nyaŋe yel nu'ug ye, “M pu bood fu suŋire.” Zug me ku nyaŋe yel noba ye, “M pu boodi ya suŋire.” 22 Ka ti niŋgbiŋ la luas bane wenne ba ka' paŋ la ya'a kae', niŋgbiŋ la ku tum. 23 Ti gosid niŋgbina luas bane ka ti ne'es la su'uŋa, ka na'asid nyan luas bane ka ti pu bood ye nidib nye la n ligini ba. 24 Ka li pu nar ka ti ligin luasuma laa. Wina'am meŋ maal ti niŋgbina ka tis luas bane ka ti gos ka ba nyood pu zu'e la na'asi n gaad lua mekama. 25 Dinzugo weligir kae' ti niŋgbina nii. Luas kon'ob kon'ob la bood taaba suŋir. 26 Dinzugo lua yinni ya'a namisid, luas la wusa me namisidne. Lua yinni ya'a nye na'asi, luas la wusa more sumalisim. 27 Ya wusa wenne Kiristo niŋgbiŋ ne. Ka so' kam zan'asa me wenne o niŋgbiŋ la lua sieba. 28 Ka Wina'am gaŋne Tumtumnib o nidib soogin ka ba a kpeenmnam, ka gaŋ nodi'esidib ka ba tia'ali ba, ka nan gaŋ pa'anib, ka yu'uŋ gaŋ bane maan tuumnyalima, ka lem gaŋ sieba ka ba na tun'e ma'ae ban'adnam, ka gaŋ sieba ka ba suŋid nidib ka gaŋ sieba ka ba gosid ka bigisid nidib tuuma a si'em, ka gaŋ sieba ka ba pian'ad pian'azuna. 29 Ti wusa ka' Tumtumnib bee nodi'esidib bee pa'aniba. Li ka' ti wusa mor paŋ na maal tuumnyalima 30 bee ti'eb ban'adnam bee pian' pian'azuna, bee nyaŋe tu'as pian'azuna la gbin ne. 31 Boomi piintitada n gaad bun wusa. Ka m na pa'ali ya suer line gati ba wusa.
