1 KORINT DIM 11

1Tu'asimi man tuuma wuu man tu'as Kiristo tuuma si'em la. 2M pian'adi ya yaname tiendi m yela si'el wusa ni ka mor pa'alug kan ka m tolisi tisi ya la zug. 3Amaa m bood ye ya baŋ ye Kiristo a dau wusa zugsob, ka dau me a o po'a zugsob, ka Wina'am me a Kiristo Zugsob. 4Dinzugo, dau one pu'usid Wina'am bee di'ed Wina'am pian'ad n tisid nidib, ka si'el pil o zug, diisne Kiristo nyan. 5Ka po'a one pu'usid Wina'am bee di'ed Wina'am pian'ad n tisid nidib, ka si'el pu pili o zugo, o diisne o sid nyan. Li wenne wuu o puni o zug ne. 6Po'a ya'a zan'as ka pu pili o zugo, on kiesimi o zuobid. Lin sadigim a nyan n tis po'a ka o puni o zug la, bee kiesi o zuobid la, o pilimi o zug. 7Wina'am n maal dau wenne o meŋ la ka o mor girima tisid Wina'am la, li pu su'um ka o zaŋ si'eli pil o zugo. Po'a me mor girima tisid dau. 8Wina'am da pu zaŋ po'a konbir n maal dau, amaa o da zaŋ ne dau konbir n maal po'a. 9Wina'am me da pu maal dau po'a zugo, amaa o da maali po'a dau zug. 10Maleknam la zug, li su'um ka po'a zaŋ si'eli pili o zug n pa'al ye o be ne o sid la nu'usin. 11Amaa Zugsob nidib la puugin, po'a bene dau nu'usin, ka dau me be po'a nu'usin. 12Wina'am da zaŋ dau n maal po'a. Ala men ka po'ab me du'ad dap. Ka si'el wusa yitne Wina'am sa'an na. 13Ya meŋ ten'esim n gos. Li a su'uŋa ka po'a pu'us Wina'am paalo ni ka si'el ka' o zuginee? 14Ti malima pun pa'ali ya ye dau ya'a bas o zuobid ka li wa'am, o diisidi o meŋ nyan. 15Amaa li ane venlim po'a sa'an. Wina'am maali o zuobid ka li wa'am ye li a o zugpibig. 16Amaa so' ya'a bood ye o nwa'asi li yela, man na lebis si'el ane ye, tinam bee Wina'am nidib pu mor maluŋ si'a line be zugpilib puugine. 17M pu zun'odi ya yel kan ka m ye m yeli ya laa, bozugo ya yiti la'as taaba ka ya tuumbe'ed gati ya tuumsoma. 18Yiiga zin'igin, m wumya ye ya ya'a yiti la'as taaba ye ya pu'us Wina'am, weligir be ya soogin. M me siak ye labaar la sieba ane sida. 19Bi'esug kae', ye weligir na bee ya soogin ye ba baŋ bane dol sida suer la paalo ni. 20Ya ya'a la'as taaba n ten'es ye ya ditne Zugsob Diib la, li ka' walaa. 21Bozugo ya ya'a la'as, so' mekama ditne o meŋ diib, ka sieba ko'om zabid ka sieba nuu kool. 22Ya pu mor ya' na di ka nuu? Bee ya kudum bood ye ya ne'esne Wina'am nidib ka diis noŋdim nyane? M na yeli ya ye bo? M zun'e ya ne' zug bee? Ayei, m ku zun'e yaa. 23M daa di'e pa'alug kaŋa ne Zugsob la sa'an, ka tolisi tisi ya. Ye yu'uŋ kan ka ba zam ti Zugsob la, ka o zaŋ bodobodo 24n pu'us Wina'am bareka, ka gben'esi li, ka ye, “Ne'eŋa ane m niŋgbiŋ kan ka m tisi ya. Niŋim ala ka li a tienri m yela.” 25Ala ka o lem zaŋ nwam, bane di diib la naae la, ka yel ye, “Nwam kaŋa ane Wina'am nonaar paal line a man ziim. Ya ya'a yiti nuu li, yanam niŋimi li ka li tienn m yela.” 26Ya ya'a yiti niŋ ne'eŋa ka di bodobodo la ka nu nwam kaŋa ni, ya mooni Zugsob la ku'um yela n guri o lebig na. 27Ala zugo, on mekama zan'a di Zugsob la bodobodo ka nu o nwam la ni, ka li pu su'um ye o di ka nu, o tumne tuumbe'ed tis Zugsob la niŋgbiŋ ne o ziim la. 28So' wusa ten'esim su'uŋa ka naan di bodobodo kaŋa ka me nu nwam kaŋa ni. 29On mekama pu baŋ Zugsob la niŋgbiŋ la gbin ne, ka me di ka nu, o na nye saria kad be'ed on di ka nu la zug. 30Dinzug ka ya bedego a ban'adnam, ka sieba ka' paŋa, ka sieba kpi la. 31Ti ya'a maki ti meŋ yiiga su'uŋa, ti ku kpen' Wina'am sariakadib nii. 32Ka Zugsob la kat tinam saria ka namisidi ti ye ti zamis ka ti da ti la'as ne dunia nidib n nye saria kad be'ede. 33Dinzugo, m ba'abiise, ya ya'a la'as taaba ye ya di Zugsob diib la, yanam on gur taaba. 34On ko'om zabid, on dimi o yin ka naan kena, ka da kpen' Zugsob la sariakadib nii. Yela bane kpelim la, m ya'a kena, m na sa'ali ya li yela.

will be added

X\