GBOO DOMI KO A 8

1Gɔd nɔ de kɔndɛm dɛn pipul we gɛt wanwɔd wit Jizɔs Krays. 2Gɔd in Spirit we de gi layf ɛn we de rul wi dɔn mek wi gɛt wanwɔd wit Jizɔs Krays, ɛn i dɔn pul wi ɔnda di pawa we sin ɛn day bin gɛt oba wi. 3Gɔd dɔn du wetin di Lɔ nɔ ebul du bikɔs mɔta lman nɔ ebul ɛp insɛf. Gɔd kɔndɛm di sin we de wok insay mɔta lman in at wɛn i sɛn in yon Pikin lɛkɛ mɔta lman kam na wɔl fɔ pul sin kɔmɔt na mɔta lman in at. 4Gɔd du dis so dat wi we nɔ de du wetin wi at tɛl wi fɔ du igen, bɔt wi de du wetin Gɔd in Spirit tɛl wi, go ebul du ɔl wetin di Lɔ se rayt fɔ du. 5Dɛn pipul we de fala wetin dɛn at tɛl dɛn, na dat nɔmɔ go de na dɛn ed fɔ du; bɔt dɛn wan we de du wetin Gɔd in Spirit tɛl dɛn fɔ du, na wetin di Spirit want nɔmɔ na in de na dɛn ed fɔ du. 6If una jɛs de mɛmba wetin una at want nɔmɔ, dat go mek una day; bɔt if una jɛs de mɛmba wetin Gɔd in Spirit want nɔmɔ, una go gɛt di tru layf ɛn kol at. 7So, if mɔta lman jɛs de mɛmba wetin in at want nɔmɔ, dat go mek i nɔ lɛk Gɔd; i nɔ go de du wetin Gɔd in lɔ se, ɛn i nɔ go ebul du am sɛf. 8Dɛn pipul we jɛs de du wetin dɛn at tɛl dɛn fɔ du, nɔ go pliz Gɔd. 9Bɔt una nɔ de du wetin una at gi una fɔ du, una de du wetin Gɔd in Spirit tɛl una, if Gɔd in Spirit de insay una. If Krays in Spirit nɔ de insay pɔsin, da pɔsin de nɔto Krays yon. 10Bɔt if Krays de insay una, pan ɔl we una bɔdi go day bikɔs una dɔn sin, Gɔd in Spirit go mek una gɛt layf, bikɔs Krays dɔn mek ɔltin rayt bitwin una ɛn Gɔd. 11If Gɔd, we mek Jizɔs rayz frɔm di grev, in Spirit de insay una, Gɔd insɛf go mek in Spirit we de insay una mek una bɔdi we go day gɛt di tru layf. 12So mi kɔmpin Kristiɛn dɛn, wi mɔs du wetin Gɔd in Spirit tɛl wi fɔ du, nɔto wetin wi at tɛl wi fɔ du. 13Bikɔs if una jɛs de du wetin una at tɛl una nɔmɔ, una go day, bɔt if una mek Gɔd in Spirit ɛp una fɔ kil dɛn tin we de mek una sin, una go gɛt di tru layf. 14Dɛn pipul we de du wetin Gɔd in Spirit tɛl dɛn fɔ du, na Gɔd in pikin dɛn. 15Di Spirit we Gɔd gi una nɔ mek una bi slev ɛn i nɔ de mek una fred, bɔt i mek una bi Gɔd in pikin dɛn ɛn na in de mek wi se, “Papa, mi Papa,” we wi de kɔl Gɔd. 16Gɔd in Spirit wit wi yon spirit de tɔk di sem tin se wi na Gɔd in pikin dɛn. 17We wi na Gɔd in pikin dɛn, wi go gɛt dɛn blɛsin we Gɔd dɔn prɔmis in pipul dɛn, semwe so, wi gɛt pan wetin Gɔd bin kip fɔ Krays. If wi sɔfa lɛkɛ aw Krays sɔfa, Gɔd go mek di wɔnda ful layf we Krays gɛt bi wi yon. 18A shɔ se di sɔfa we wi de sɔfa naw, nɔ go kam klos ɔl di wɔnda ful tin dɛn we Gɔd go mek bi to wi. 19Ɔltin we Gɔd mek de wet ɛn dɛn want bad bad mek Gɔd sho dɛn in pikin dɛn. 20Gɔd mekɔp se ɔltin we i mek nɔ go min natin bambay, dɛn ɔl nɔ want dat fɔ bi, bɔt na dat Gɔd want. Ɔltin we Gɔd mek de abop se, 21Gɔd go fri dɛn, so dat dɛn nɔ go rɔtin igen, dɛn go fri, lɛkɛ aw Gɔd in pikin dɛn dɔn fri. 22Wi no se sote naw, i jɛs tan lɛkɛ se ɔl wetin Gɔd mek de pini bikɔs dɛn de fil pen lɛkɛ di pen we uman kin fil bifo i bɔn pikin. 23Nɔto dɛn tin ya we Gɔd mek nɔmɔ de pini; bɔt wi we gɛt Gɔd in Spirit, ɛn na in Spirit i gi wi fɔs, wisɛf de pini na wi at as wi de wet fɔ di tɛm we Gɔd go mek wi bi in pikin dɛn ɛn fri wi bɔdi, wɛn i gi wi nyu bɔdi. 24Bikɔs wi bin abop pan Gɔd, na dat mek i sev wi. Bɔt if wi dɔn si wetin wi de abop fɔ, wi nɔ go kɔl dat abop. Udat go abop fɔ tin we i dɔn si? 25Bɔt if wi de abop fɔ tin we wi nɔ si yet, wi go bia wet fɔ am. 26Semwe so, Gɔd in Spirit de ɛp wi, we wi nɔ ebul biliv pan Gɔd gud gud yet. Wi nɔ no aw fɔ pre, na Gɔd in Spirit insɛf de tɔk to Gɔd fɔ wi; di pini we i de pini gɛt minin to Gɔd we mɔta lman nɔ ebul ɔnda stand ɔ tɔk. 27Gɔd, we no wetin mɔta lman want na in at, no wetin di Spirit min, bikɔs di Spirit de beg Gɔd fɔ in pipul dɛn ɛn i de tɔk wetin Gɔd insɛf want. 28Wi no se ɛni tin we mit wi, Gɔd de mek i bi fɔ wi yon gud, wi we lɛk am, ɛn we i dɔn kɔl fɔ du wetin i bin dɔn plan. 29Gɔd bin dɔn pik dɛn pipul we i bin dɔn mak fɔ tan lɛkɛ in Pikin, so dat in Pikin go bi di fɔs pikin pan in plɛnti brɔda dɛn. 30So Gɔd kɔl dɛn pipul we i bin dɔn pik; dɛn pipul we i kɔl, i mek ɔltin rayt bitwin dɛn ɛn insɛf; wɛn i dɔn mek ɔltin rayt bitwin dɛn ɛn insɛf, i mek sɔm pan di wɔnda ful layf we Krays gɛt bi dɛn yon. 31Wɛn wi luk ɔl dɛn tin ya, wetin wi go se? If Gɔd de fɔ wi, nɔbɔdi nɔ go ebul wi. 32Gɔd nɔ kip in Pikin mek i nɔ sɔfa, i sakri fays am fɔ wi ɔl! Gɔd we sak ri fays in Pikin fɔ wi ɔl, i nɔ go gi wi ɔltin fri? 33Udat go se Gɔd in pipul dɛn du bad? Gɔd insɛf dɔn mek ɔltin rayt bitwin in ɛn dɛn. 34So ɛnibɔdi de we go se Gɔd in pipul dɛn du bad? Jizɔs Krays na di wan we dɔn day fɔ wi, ɔ a fɔ se, na in Gɔd mek rayz frɔm di grev ɛn i sidɔm na Gɔd in raytan. I de beg Gɔd fɔ wi. 35Udat ɔ wetin go mek di lɛk we Krays lɛk wi tap fɔ rich wi? Natin: trɔbul, tra nga layf, di sɔfa we pipul de mek wi sɔfa, angri, po, denja, ɔ day sɛf nɔ go ebul mek di lɛk we Krays lɛk wi tap fɔ rich wi. 36Lɛkɛ aw dɛn rayt na Gɔd in Buk we dɛn se, “Papa Gɔd, na fɔseka yu, pipul de tray fɔ kil wi ɔltɛm; dɛn de trit wi lɛkɛ ship we dɛn gɛt fɔ kil.” 37Bɔt insay ɔl dɛn tin ya, we de bi to wi, di wan we lɛk wi de mek wi ebul win ɔltɛm. 38A shɔ se natin nɔ ebul tap wi fɔ fil di lɛk we i lɛk wi: day ɔ layf, enjɛl ɔ dɛn bad spirit we de rul ɔ dɛn pawa na di klawd, dis tɛm ya ɔ di tɛm we de kam; 39di wɔl we de pantap ɔ di wɔl we de ɔnda natin nɔ de we Gɔd mek we go ebul mek di lɛk we Gɔd lɛk wi we Jizɔs Krays wi Masta dɔn sho wi, tap fɔ rich wi.

will be added

X\