GBOO DOMI KO A 6

1So wetin wi go se? Wi fɔ jɛs de sin de go so dat Gɔd go sɔri fɔ wi ɛn sho wi se in lɛk wi mɔ ɛn mɔ pan ɔl we wi nɔ fit fɔ mek i lɛk wi? 2Dat nɔ fɔ bi so! Wɛn i kam pan sin, i tan lɛkɛ se wi na dedebɔdi, sin nɔ gɛt pawa fɔ rul wi igen so aw wi go stil de sin igen? 3Unasɛf no se, wɛn wi baptayz we mek wi bi wan wit Jizɔs Krays, wi bin day lɛkɛ aw Jizɔs Krays bin day. 4So wɛn wi baptayz, wi day wit Jizɔs ɛn dɛn bɛr wi wit am, so dat jɛs lɛkɛ aw wi Papa yus in wɔnda ful pawa mek Jizɔs Krays rayz frɔm di grev, semwe so i go yus in pawa fɔ mek wi liv di nyu kayn layf. 5Jɛs lɛkɛ aw wi bin jɔyn an wit Jizɔs Krays we wi day lɛkɛ aw i day, semwe so wi go jɔyn an wit am wɛn Gɔd go mek wi gɛt nyu layf lɛkɛ aw i gi Krays nyu layf wɛn i mek i rayz frɔm di grev. 6Ɛn wi no fɔ tru se, di layf we wi bin liv fɔs tɛm dɔn di sem tɛm we dɛn kil Jizɔs Krays na di krɔs, so Gɔd dɔn pul di sin we bin de rul wi layf ɛn mek sin nɔ gɛt pawa na wi layf igen. 7Pɔsin we dɔn day, dɔn kɔmɔt ɔnda sin in pawa. 8If wi dɔn day wit Jizɔs Krays wi biliv se wi go gɛt layf wit am. 9Wi no se Gɔd dɔn mek Jizɔs Krays rayz frɔm di grev, ɛn i nɔ go day igen; day nɔ gɛt pawa oba am igen. 10Wɛn Jizɔs Krays day, i day wan tɛm nɔmɔ, ɛn i nɔ go day igen, fɔ mek sin nɔ gɛt pawa igen oba mɔta lman. Bɔt naw i liv fɔ du ɔl wetin Gɔd want am fɔ du ɔltɛm. 11Semwe so, una fɔ tink se unasɛf dɔn day so dat sin nɔ go gɛt pawa fɔ rul una igen, ɛn una fɔ liv naw fɔ pliz Gɔd bikɔs una gɛt wanwɔd wit Krays Jizɔs. 12Una nɔ fɔ mek sin rul una bɔdi we go day, igen, so dat una nɔ go du ɛni bad tin we una at gi una fɔ du. 13Una nɔ fɔ sin wit ɛni pat pan una bɔdi, bɔt una fɔ gi Gɔd ɔl pat na una layf, na so pipul we bin day bɔt we Gɔd dɔn gi nyu layf, fɔ du; una fɔ gi Gɔd ɔl una layf so dat i go mek una du dɛn tin we gud fɔ mɔta lman. 14Una nɔ fɔ mek sin rul una layf igen, bikɔs una nɔ de ɔnda di lɔ naw, bɔt na di lɛk we Gɔd lɛk una ɛn di sɔri we i sɔri fɔ una de rul una layf naw, pan ɔl we wi nɔ fit fɔ mek Gɔd lɛk wi so ɔ sɔri fɔ wi so. 15We i bi so, wetin wi fɔ se? Wi fɔ stil de sin bikɔs di lɛk we Gɔd lɛk wi, pan ɔl we wi nɔ fit fɔ mek yu lɛk wi, na in de rul wi naw, ɛn di Lɔ nɔ de rul wi igen? Dat nɔ fɔ bi! 16Una no gud wan se, if una givɔp unasɛf fɔ bi slev fɔ pɔsin ɛn una du ɛni tin we di pɔsin tɛl una fɔ du, dat min se una na da pɔsin de in slev fɔ tru. Semwe so, if na sin na una masta, i go mek una day; bɔt if Gɔd na una masta, i go mek ɔltin rayt bitwin una ɛn insɛf. 17Wi fɔ tɛl Gɔd tɛnki, bikɔs fɔs tɛm una na bin slev ɔnda sin, bɔt naw una dɔn tay una at fɔ du ɔl dɛn tru tin we dɛn bin lan una bɔt Gɔd. 18Gɔd dɔn pul una kɔmɔt ɔnda sin in pawa, so naw una dɔn bi slev fɔ Gɔd fɔ du wetin rayt. 19Na dɛn tin we mɔta lman ɔnda stand, a de tek fɔ ɛksplen to una fɔ mek una go ɔnda stand. Tɛm bin de we una na bin slev fɔ du ɔl kayn wikɛd ɛn dɔti tin we bin de na una at. Bɔt naw una fɔ givɔp ɔl una layf fɔ bi lɛkɛ Gɔd in slev dɛn fɔ du wetin rayt, so dat una go bi Gɔd in pipul dɛn, fɔ tru. 20Di tɛm we sin bin de rul una, una nɔ bin bawn fɔ du wetin Gɔd bin want una fɔ du. 21Wetin una bin gen wɛn una bin de du dɛn tin we una de shem fɔ du naw? Na day dɛn kayn tin de, de bring. 22Bɔt naw Gɔd dɔn fri una, mek sin nɔ gɛt pawa fɔ rul una igen; una de lɛkɛ slev to Gɔd naw, so una dɔn gi Gɔd ɔl una layf ɛn una dɔn gɛt layf we go de sote go. 23Day na sin in pe, bɔt layf we go de sote go, na in Gɔd gi wi fri. Wi gɛt di layf we go de sote go bikɔs wi gɛt wanwɔd wit Jizɔs Krays we na wi Masta.

will be added

X\