GBOO DOMI KO A 13

1Una ɔl fɔ du wetin dɛn wan we de rul na di kɔntri tɛl una fɔ du, bikɔs nɔbɔdi nɔ go gɛt pawa fɔ rul pas Gɔd gi am da pawa de, ɛn na Gɔd put dɛn pipul we de rul, oba una. 2Na dat mek, ɛnibɔdi we nɔ gri fɔ du wetin di pipul dɛn we de rul se, nɔ gri wit wetin Gɔd dɔn se fɔ bi; ɛn ɛnibɔdi we du dat go mek Gɔd pɔnish am. 3Dɛn pipul we de du wetin rayt nɔ fɔ fred dɛn wan we de rul; na dɛn pipul we de du bad nɔmɔ fɔ fred dɛn. Una nɔ go lɛk fɔ mek una nɔ fred di pipul dɛn we de rul? Wɛl, una du wetin rayt, da tɛm de dɛn go prez una. 4Dɛn pipul we de rul, na Gɔd in wokman dɛn we de wok fɔ ɛp una. Bɔt if una du bad, una fɔ fred dɛn, bikɔs dɛn gɛt di pawa fɔ pɔnish una ɛn dɛn go pɔnish una. Dɛn tinap fɔ Gɔd we dɛn de jɔj ɛn pɔnish dɛn pipul we de du bad. 5Na dat mek una fɔ du wetin dɛn wan we de rul tɛl una fɔ du. Una nɔ fɔ jɛs du am nɔmɔ bikɔs Gɔd go mek dɛn jɔj ɛn pɔnish una if una nɔ du wetin dɛn tɛl una fɔ du, una fɔ du am bikɔs una no insay una at se, na dat una fɔ du. 6Semwe so, una fɔ de pe taks bikɔs dɛn wan we de rul, na Gɔd in wokman dɛn. Dɛn de du Gɔd in wok we dɛn de du di wok we dɛn fɔ du. 7Una fɔ pe dɛn ɔl wetin una gɛt fɔ pe dɛn; una fɔ pe ɛni taks we di gɔvmɛnt se una fɔ pe, ɛn una fɔ rɛspɛkt ɔl una rula dɛn. 8Una nɔ fɔ o ɛnibɔdi dɛt, pas di dɛt we na fɔ lɛk una kɔmpin mɔta lman. Ɛnibɔdi we lɛk in kɔmpin mɔta lman de du wetin di Lɔ se. 9Di lɔ dɛn we Gɔd gi Mozis se, “Man nɔ fɔ lɛf in wɛf go kip ɔda uman ɛn uman nɔ fɔ lɛf in man go kip ɔda man; nɔ fɔ kil; nɔ fɔ tif; ɛn nɔ fɔ gɛt tifyay” ɔl dɛn lɔ ya ɛn ɛni ɔda wan dɛn de insay wan lɔ we se, “Una fɔ lɛk una kɔmpin mɔta lman lɛkɛ aw una lɛk unasɛf.” 10Ɛnibɔdi we lɛk in kɔmpin mɔta lman, nɔ go du am bad. If ɛnibɔdi lɛk in kɔmpin mɔta lman, da pɔsin de dɔn du ɔl wetin ɔl di lɔ dɛn se. 11Una fɔ du wetin a tɛl una fɔ du naw bikɔs una no se di tɛm we una fɔ wek, dɔn kam, bikɔs di de we Gɔd go sev wi dɔn kam klos naw pas di tɛm we wi bin fɔs biliv pan Jizɔs Krays. 12Nɛt dɔn de pas, de tɛm dɔn kam klos. Una lɛ wi lɛf fɔ du dɛn bad tin we dɛn wikɛd pipul we de na dak de du, bɔt lɛ wi tek dɛn tin we wi de tek fɛt, wi we de na di layt bikɔs wi no di tru we, ɛn lɛ wi rɛdi fɔ di fɛt. 13Una lɛ wi de du ɔl wetin wi fɔ du lɛkɛ pipul we de na di tru layt; wi nɔ fɔ liv fri layf, wi nɔ fɔ de drɔnk, wi nɔ fɔ liv bad layf, wi nɔ fɔ de fɛt ɔ jɛlɔs wi kɔmpin. 14Mek Masta Jizɔs Krays bi lɛkɛ di klos we wi de wɛr, mek i rul ɔl wi layf, ɛn mek wi lɛf fɔ du dɛn bad tin we wi at gi wi fɔ du.

will be added

X\