GBOO DOMI KO A 12

1Mi kɔmpin Kristiɛn dɛn, bikɔs Gɔd de sɔri fɔ wi bad bad, a de beg una mek una gi una layf lɛkɛ sakri fays to Gɔd fɔ du in wok, ɛn fɔ du ɔl wetin i lɛk; na di tru we dat fɔ wɔship Gɔd. 2Una nɔ fɔ de du lɛkɛ aw di pipul dɛn na dis wɔl de du, bɔt una fɔ lɛ Gɔd chenj una at so dat ɔl wetin una de tink ɛn du go chenj. Dat go mek una ebul no wetin Gɔd want; dat na: wetin gud, wetin Gɔd lɛk, ɛn wetin nɔbɔdi nɔ go ebul fɛn fɔlt pan. 3Ɛn fɔseka wetin Gɔd dɔn gi mi bikɔs i gud, a de tɛl una ɔl se: Una nɔ tink se una bɛtɛ pas aw una tan, bɔt una fɔ tink lɛkɛ aw soba pipul de tink bɔt dɛnsɛf, ɛn una ɔl fɔ jɔj unasɛf bay aw Gɔd mek una ebul biliv am. 4Wi bɔdi gɛt plɛnti difrɛn difrɛn pat, ɛn ɔl di pat dɛn gɛt difrɛn difrɛn wok. 5Semwe so, pan ɔl we wi plɛnti, wi jɛs tan lɛkɛ wan bɔdi bikɔs wi gɛt wanwɔd wit Krays, ɛn wi ɔl jɔyn lɛkɛ aw di difrɛn pat dɛn pan di bɔdi jɔyn. 6So ɔlman fɔ wok lɛkɛ aw Gɔd mek i ebul wok wit di pawa ɔ sɛns we Gɔd gi am. If Gɔd mek wi ebul fɔ tɛl ɔda pipul bɔt am, wi fɔ du am bay aw wi biliv. 7If Gɔd mek wi want fɔ ɛp di Kristiɛn dɛn ɔltɛm ɛn mek wi sabi wetin fɔ du, wi fɔ ɛp dɛn. If i mek wi sabi fɔ lan pipul, wi fɔ lan pipul. 8If i mek wi sabi fɔ kɔrej pipul, wi fɔ kɔrej pipul. If Gɔd gi ɛnibɔdi gudat fɔ sheb wetin i gɛt wit ɔda pipul, di pɔsin fɔ de du dat wit ɔl in at; ɛnibɔdi we Gɔd gi pawa fɔ rul, fɔ rul lɛkɛ soba pɔsin; ɛnibɔdi we Gɔd gi ajo, fɔ gladi fɔ sho am. 9If una se una lɛk pipul una fɔ lɛk dɛn wit ɔl una at. Una nɔ fɔ lɛk ɛni tin we bad, una fɔ lɛk ɛni tin we gud ɛn kip am na una at. 10Una fɔ lɛk una kɔmpin gud, lɛkɛ aw Kristiɛn brɔda dɛn fɔ lɛk dɛnsɛf; una fɔ want fɔ rɛspɛkt una kɔmpin. 11Una fɔ wok tra nga wan, una nɔ fɔ les. Una fɔ put ɔl una at pan di wok we una de du fɔ di Masta. 12Una fɔ gladi ɔltɛm bikɔs una abop pan Gɔd, una fɔ bia wɛn trɔbul mit una; ɛn una fɔ de pre ɔltɛm. 13Una fɔ tek pan una yon tin dɛn gi una kɔmpin Kristiɛn dɛn tin we dɛn nɔ gɛt we dɛn fɔ gɛt, ɛn una fɔ du gud to dɛn Kristiɛn tre nja dɛn we kam na una os. 14Una fɔ aks Gɔd fɔ blɛs dɛn pipul we de mek una sɔfa; una nɔ fɔ aks Gɔd fɔ kɔs dɛn, una fɔ aks Gɔd fɔ blɛs dɛn. 15Una fɔ gladi wit pipul wɛn dɛn gladi, ɛn una fɔ sɔri wit pipul wɛn dɛn sɔri. 16Una fɔ kia fɔ ɔlman lɛkɛ aw una kia fɔ unasɛf. Una nɔ fɔ prawd, bɔt una fɔ gri fɔ du dɛn wok we savant sɛf kin du. Una nɔ fɔ tink se una gɛt plɛnti sɛns. 17If pɔsin du una bad, una nɔ fɔ tɔn di bad gi am bak. Una fɔ de tray fɔ du dɛn tin we gud na ɔlman yay. 18Una fɔ du ɔl wetin una ebul fɔ du so dat una kin de kwayɛt wan wit ɔlman. 19Mi padi dɛn, una nɔ fɔ tɔn bad gi ɛnibɔdi we du una bad, bɔt una fɔ lɛ Gɔd kɔndɛm di pɔsin. Dɛn rayt na Gɔd in Buk se, “Di Masta se, a go mek dɛn pipul we de du ɔda pipul bad, sɔfa fɔ di bad we dɛn de du.” 20Bɔt una fɔ du lɛkɛ aw dɛn rayt na Gɔd in Buk, we dɛn se, “If pɔsin we nɔ lɛk una, angri, una fɔ gi am tin fɔ it; if i tɔsti, una fɔ gi am tin fɔ drink. If una du dat, di pɔsin go shem bad bad.” 21Una nɔ mek ɛni bad tin mek una at pwɛl, bɔt una fɔ du gud to ɛnibɔdi we du una bad, da we de ɛnibɔdi we du una bad ɔ mɛmba bad fɔ una, nɔ go ebul una.

will be added

X\