GBOO DOMI KO A 10

1Mi kɔmpin Kristiɛn dɛn, a de pre wit ɔl mi at mek Gɔd go sev mi Ju pipul dɛn. A want mek Gɔd sev dɛn bad bad. 2A kin tɔk fɔ dɛn se, dɛn want pliz Gɔd bad wan, bɔt dɛn nɔ no di rayt we. 3Dɛn nɔ bin ɔnda stand aw Gɔd de mek ɔltin rayt bitwin in ɛn pipul, ɛn dɛn bin de tray fɔ fɛn dɛn yon we fɔ mek ɔltin rayt bitwin dɛn ɛn Gɔd; so dɛn nɔ bin gri fala Gɔd in yon we fɔ mek ɔltin rayt bitwin in ɛn dɛn. 4Krays dɔn kam, di Lɔ nɔ gɛt pawa igen, so Gɔd de mek ɔltin rayt bitwin in ɛn ɛnibɔdi we biliv pan Krays. 5Wɛn Mozis bin rayt bɔt dɛn pipul we tink se Gɔd de mek ɔltin rayt bitwin in ɛn dɛn pipul we de du wetin di Lɔ se, i rayt se: “Dɛn pipul we de du wetin di Lɔ se, go liv di kayn layf we di Lɔ de bring.” 6Bɔt di tin we dɛn rayt na Gɔd in Buk bɔt aw Gɔd de mek ɔltin rayt bitwin in ɛn dɛn pipul we biliv pan am, na in dis: “Yu nɔ se, udat go go ɛvin?” (dat na fɔ bring Krays kam dɔng to wi). 7“Yu nɔ tɔk igen se, udat go go na di ples we de ɔnda dis wɔl?” (dat na fɔ pul Krays kɔmɔt to dɛn pipul we dɔn day ɛn bring am kam.) 8Dɛn rayt na Gɔd in Buk se: “Gɔd in mɛsej de klos yu, yu dɔn tɔk am ɛn i de na yu at,” dat na di mɛsej we wi de tɔk ɔlɔbɔt se una fɔ biliv pan Gɔd. 9If unasɛf tɔk se, “Jizɔs na di Masta,” ɛn una biliv gud gud se Gɔd mek i rayz frɔm di grev, Gɔd go sev una. 10Wɛn wi biliv pan Krays, Gɔd de mek ɔltin rayt bitwin wi ɛn insɛf; ɛn wɛn wi tɛl pipul se wi biliv pan Krays, Gɔd go sev wi. 11Dɛn rayt na Gɔd in Buk se, “Ɛnibɔdi we biliv pan am nɔ go disapɔynt.” 12Gɔd de sev dɛn Ju pipul ɛn dɛn pipul we nɔto Ju, bikɔs dɛn ɔl na wan, Gɔd na di wan gren Masta fɔ ɔlman ɛn i de gi ɔl dɛn wan we de pre to am plɛnti plɛnti blɛsin. 13Lɛkɛ aw dɛn rayt na Gɔd in Buk se, “If ɛnibɔdi pre to di Masta fɔ mek i sev am, di Masta go sev am.” 14Bɔt aw dɛn go pre to di Masta fɔ sev dɛn if dɛn nɔ biliv pan am? Ɛn aw dɛn go biliv pan am if dɛn nɔ yɛri di mɛsej? Ɛn aw dɛn go yɛri di mɛsej if pɔsin nɔ tɛl dɛn? 15Ɛn aw pipul go tɛl dɛn di mɛsej if nɔbɔdi nɔ sɛn pipul fɔ tɛl dɛn? Dɛn rayt na Gɔd in Buk se, “Na wɔnda ful tin we dɛn pipul we de bring di Gud Nyus, de kam.” 16Bɔt nɔto ɔlman biliv di Gud Nyus. Ayzaya insɛf tɔk se, “Masta, udat dɔn biliv di mɛsej frɔm we wi de tɔk am?” 17Na dat mek pipul dɛn mɔs yɛri di mɛsej bɔt Jizɔs Krays fɔs, bifo dɛn biliv am, ɛn pipul mɔs tɛl ɔda pipul bɔt Krays fɔ mek dɛn yɛri. 18Bɔt mek a aks una sɔntin: Na tru se di Ju dɛn nɔ bin dɔn yɛri di mɛsej bɔt Jizɔs Krays? Dɛn bin dɔn yɛri di mɛsej, yɛs. Dɛn rayt na Gɔd in Buk se: “Ɔl dɛn pipul ɔlɔbɔt na wɔl yɛri di wɔd dɛn we di mɛsenja dɛn tɔk.” 19Mek a aks una wan ɔda tin: Di Ju pipul dɛn nɔ bin no? Dɛn bin no, yɛs. Lɔntɛm Mozis bin se, Gɔd se: “A go mek mi pipul dɛn jɛlɔs dɛn pipul we nɔto Ju; a go mek una vɛks pan dɛn neshɔn we di pipul dɛn ɔl nɔ de ɔndastand.” 20Wɛn Ayzaya bin de tɛl pipul Gɔd in mɛsej, di mɛsej bin klia ɛn tra nga pas aw Mozis bin tɔk; i bin se, Gɔd se: “Dɛn pipul we nɔ bin de tray fɔ fɛn mi dɔn fɛn mi, a dɔn sho misɛf to dɛn pipul we nɔ bin de aks fɔ mi.” 21Bɔt Ayzaya tɛl wi se Gɔd tɔk bɔt di Ju pipul dɛn se, “A de tret mi an ɔltɛm to dɛn wan we nɔ want fɔ du wetin a tɛl dɛn ɛn we nɔ de du wetin a tɛl dɛn, fɔ mek dɛn kam to mi.”

will be added

X\