GBOO DOMI KO A 1

1Mi, Pɔl, we de wok fɔ Jizɔs Krays, ɛn we na apɔsul we Gɔd pik fɔ go tɛl pipul di Gud Nyus we i gɛt fɔ dɛn, de rayt to una. 2Gɔd bin dɔn prɔmis fɔ sɛn dis Gud Nyus ya lɔntɛm ɛn i bin dɔn mek in prɔfɛt dɛn tɛl pipul se in go sɛn am; di Gud Nyus rayt na Gɔd in Buk. 3Dis Gud Nyus ya tɔk bɔt Gɔd in Pikin we na wi Masta Jizɔs Krays. Wɛn di Pikin na bin mɔta lman na bin wan pan Devid in gra npi kin-pi kin dɛn; 4ɛn we i kɔmɔt to Gɔd ɛn i gɛt Gɔd yon at ɛn Gɔd yon we, Gɔd sho wit in wɔnda ful pawa se na in Pikin, we i mek i rayz frɔm di grev. 5Tru Krays ɛn fɔseka am, Gɔd gi mi di chans ɛn blɛsin fɔ bi apɔsul, so dat a kin go ɛp pipul ɔlɔbɔt na wɔl fɔ biliv Gɔd ɛn du wetin i tɛl dɛn. 6Unasɛf we de na Rom miks pan di pipul dɛn we Gɔd kɔl fɔ bi Jizɔs Krays yon pipul. 7So a de rayt to una ɔl na Rom we Gɔd lɛk ɛn we i dɔn kɔl fɔ bi in yon pipul. Mek Gɔd we na wi Papa ɛn Masta Jizɔs Krays sho una aw i gud ɛn gi una kol at. 8Fɔs tin, a tɛl Gɔd tɛnki tru Jizɔs Krays fɔ una ɔl, bikɔs pipul ɔlɔbɔt na wɔl de yɛri se una dɔn biliv pan Jizɔs Krays. 9Na tru a de tɔk, Gɔd insɛf, we a de wok fɔ wit ɔl mi at we a de tɛl pipul di Gud Nyus bɔt in Pikin, na mi witnɛs. Insɛf no se a de mɛmba una 10ɔltɛm wɛn a de pre. A de pre mek Gɔd gi mi di chans we a dɔn de wet fɔ ɔl dis tɛm fɔ go fɛn una naw, if i gri. 11A want si una bad bad fɔ mek unasɛf gɛt pan di blɛsin we Gɔd in Spirit de gi, so dat go mek natin nɔ shek di biliv we una biliv pan Jizɔs Krays. 12Dat min se a go ɛp una fɔ waka klos Gɔd mɔ bay aw a biliv pan Krays ɛn unasɛf go ɛp mi bay aw unasɛf biliv pan am. 13Mi kɔmpin Kristiɛn dɛn, una fɔ mɛmba se, plɛnti tɛm a kin dɔn mekɔp fɔ go fɛn una, bɔt ɔltɛm sɔntin kin mek a nɔ go. A want fɔ wok fɔ mek una yon pipul dɛn biliv pan Jizɔs Krays lɛkɛ aw a dɔn mek sɔm pan dɛn ɔda pipul we nɔto Ju biliv pan Jizɔs Krays. 14A fɔ wok fɔ Gɔd lɛkɛ slev fɔ ɛp ɔlman: dɛn pipul we sabi fɔ rid ɛn dɛn wan we nɔ sabi fɔ rid, dɛn pipul we sabi Gɔd in lɔ dɛn ɛn dɛn wan we nɔ sabi dɛn. 15Na dat mek a want fɔ tɛl unasɛf, we de na Rom, di Gud Nyus. 16A abop pan di Gud Nyus wit ɔl mi at. Di Gud Nyus na di pawa we Gɔd de tek sev ɔl dɛn pipul we biliv pan Jizɔs Krays. Dɛn Ju pipul we dɛn bin dɔn tɛl di Gud Nyus fɔs ɛn dɛn pipul we nɔto Ju, dɛn ɔl go sev if dɛn biliv pan Jizɔs Krays. 17Di Gud Nyus de sho wi aw Gɔd de mek ɔltin rayt bitwin insɛf ɛn mɔta lman, if dɛn biliv; natin pas dat nɔ go mek dɛn rayt wit Gɔd. Lɛkɛ aw Gɔd in Buk se, “Di pɔsin we Gɔd put rayt wit insɛf bikɔs i biliv pan am go gɛt layf.” 18Di vɛks we Gɔd vɛks dɔn sho aw i go jɔj ɔlman fɔ di sin we de na dɛn at ɛn fɔ di bad we dɛn du, we de mek pipul nɔ no wetin tru bɔt Gɔd. 19Gɔd go pɔnish dɛn, bikɔs dɛn no gud gud wan wetin mɔta lman fɔ no bɔt Gɔd. Gɔd insɛf dɔn mek dat klia to dɛn. 20Frɔm di tɛm we Gɔd mek di wɔl, ɔlman no gud gud se Gɔd gɛt pawa we nɔ de dɔn ɛn Gɔd na di tru Gɔd. Mɔta lman nɔ de si dɛn tu tin ya, bɔt dɛn go no dat bɔt Gɔd, bikɔs Gɔd dɔn mek dɛn tu tin ya plen to dɛn frɔm di tin dɛn we i mek. Na dat mek nɔbɔdi nɔ go se in nɔ no se na bad in de du. 21Dɛn no Gɔd, bɔt dɛn nɔ de gri fɔ gi am di rɛspɛkt we i fɔ gɛt, ɛn dɛn nɔ de tɛl am tɛnki fɔ ɛni tin we i du. Dɛn ed dɔn miks ɔp ɔltogɛda, dɛn nɔ ebul ɔnda stand, so dɛn nɔ no wetin rayt. 22Dɛn se dɛn gɛt sɛns, bɔt dɛn ful. 23Bifo dɛn pre to Gɔd, dɛn de pre to dɛn tin we dɛnsɛf mek we fiba mɔta lman, bɔd, bif na bush, ɔ snek. Gɔd gɛt layf, bɔt dɛn tin ya nɔ gɛt layf. 24Bikɔs mɔta lman ful, Gɔd lɛf dɛn fɔ du dɛn dɔti tin we dɛn at gi dɛn fɔ du, ɛn dɛn de du dɛn tin wit dɛn kɔmpin bɔdi we fɔ mek dɛn shem. 25Dɛn pipul ya nɔ gri fɔ biliv di tru wɔd bɔt Gɔd, dɛn biliv wetin nɔ tru; dɛn de pre to dɛn tin we Gɔd mek ɛn rɛspɛkt dɛn, bɔt dɛn nɔ de pre to Gɔd we mek ɔltin ɛn rɛspɛkt am, ɛn na Gɔd wi fɔ prez sote go! Emɛn. 26Fɔseka dat, Gɔd dɔn lɛf dɛn mek dɛn jɛs de du dɛn dɔti tin we dɛn at gi dɛn fɔ du. Di uman dɛnsɛf de du dɛn tin we Gɔd nɔ mek uman fɔ du wit dɛn kɔmpin uman. 27Semwe so, di man dɛn de lɛf fɔ kip uman go kip dɛn kɔmpin man, ɛn Gɔd nɔ mek dɛn fɔ liv so. Man dɛn de du bad tin wit dɛn kɔmpin man we fɔ mek dɛn shem, na dat mek Gɔd pɔnish dɛn wit di pɔni shmɛnt we dɛn fit fɔ gɛt. 28Bikɔs mɔta lman nɔ gri fɔ put dɛn at pan di tru tin we dɛn no bɔt Gɔd, Gɔd dɔn lɛf dɛn fɔ du di bad tin we de na dɛn at, so naw dɛn jɛs de du dɛn tin we dɛn nɔ fɔ du. 29Dɛn at ful wit ɔl kayn bad tin: dɛn want wetin ɔda pipul gɛt, dɛn de du dɛn kɔmpin mɔta lman bad bad, dɛn de jɛlɔs dɛn kɔmpin mɔta lman, dɛn de kil dɛn kɔmpin mɔta lman, dɛn de fɛt dɛn kɔmpin mɔta lman, dɛn de mek dɛn kɔmpin mɔta lman ful, ɛn dɛn de mɛmba bad bad tin fɔ dɛn kɔmpin mɔta lman. Dɛn de kongosa dɛn kɔmpin mɔta lman, 30dɛn nɔ lɛk Gɔd, dɛn de fityay dɛn kɔmpin mɔta lman, dɛn fil se dɛn bɛtɛ pas dɛn kɔmpin, ɛn dɛn de bost; dɛn de mɛmba us ɔda bad dɛn go du ɔltɛm; dɛn nɔ de yɛri dɛn mami ɛn dadi wɔd; 31dɛn liv fri layf; dɛn nɔ de kip dɛn prɔmis; dɛn nɔ de du gud fɔ dɛn kɔmpin, ɛn dɛn nɔ de sɔri fɔ dɛn kɔmpin mɔta lman. 32Dɛn no se Gɔd se di pɔsin we de du dɛn tin ya fɔ day. Pan ɔl dat, dɛn stil de du dɛn kayn tin ya, ɛn pantap dat, dɛn si wit ɔda pipul we de du dɛn.

will be added

X\