KO Ɔ NUNDENƐ 7

1Wɛn dat dɔn, a si fo enjɛl dɛn tinap na di fo kɔna dɛn na di wɔl. We dɛn tinap de, dɛn bin de tap di briz we bin want fɔ blo kɔmɔt na di fo kɔna dɛn na di wɔl, mek dɛn nɔ blo pan di dray grɔn ɔ pan di wata ɔ pan dɛn tik. 2Wɛn dat dɔn, a si ɔda enjɛl kɔmɔt na di say we di san de kɔmɔt. I bin ol Gɔd, we gɛt layf sote go, in stamp. I ala lawd wan tɔk to di fo enjɛl dɛn we Gɔd bin gi pawa fɔ pwɛl di wata ɛn di dray grɔn we de na di wɔl. 3I se, “Una nɔ pwɛl di dray grɔn, di wata ɛn dɛn tik, te wi dɔn put Gɔd in stamp pan dɛn wan we de wok fɔ am, dɛn fɔrɛd.” 4Dɛn a yɛri ɔmɔs pipul di enjɛl dɛn bin stamp; di nɔmba na bin wan ɔndrɛd ɛn fɔti-fo tawzin, dɛn bin kɔmɔt na ɔl dɛn trayb na Izrɛl. 5Dɛn stamp twɛlv tawzin pan Juda in trayb; twɛlv tawzin pan Rubɛn in trayb; twɛlv tawzin pan Gad in trayb; 6twɛlv tawzin pan Asha in trayb; twɛlv tawzin pan Naftali in trayb; twɛlv tawzin pan Manasɛ in trayb; 7twɛlv tawzin pan Simyɔn in trayb; twɛlv tawzin pan Livay in trayb; twɛlv tawzin pan Isaka in trayb; 8twɛlv tawzin pan Zɛbyulɔn in trayb; twɛlv tawzin pan Josɛf in trayb; ɛn twɛlv tawzin pan Bɛnja min in trayb. 9Wɛn dat dɔn, a luk bak, na de a si bɔku bɔku pipul we pɔsin nɔ ebul kɔnt. Dɛn bin kɔmɔt na ɔl dɛn trayb ɛn ɔl dɛn neshɔn na wɔl, dɛn bin de tɔk ɔl dɛn difrɛn difrɛn langwej na wɔl, sɔm bin wayt, sɔm bin blak. Dɛn bin tinap bifo di ay chia we king kin sidɔm, na di say we di Ship insɛf bin de; dɛn bin wɛr wayt ɛn dɛn ɔl bin ol pam. 10Dɛn ɔl bin de ala lawd wan se, “Na Gɔd we sidɔm na di ay chia ɛn di Ship dɔn sev wi!” 11Ɔl di enjɛl dɛn we bin tinap rawnd di ay chia we king kin sidɔm, ɛn rawnd di bigman dɛn ɛn di fo tin dɛn we gɛt layf, bin ledɔm flat bifo di ay chia ɛn dɛn bin de prez Gɔd. 12Dɛn bin de se, “Emɛn! Na wi Gɔd gɛt prez, na in wɔnda ful, na in gɛt sɛns, na in gɛt ɔna, na in gɛt pawa ɛn na in na king sote go; wi de tɛl am tɛnki! Emɛn!” 13Wan pan di bigman dɛn aks mi se, “Yu no udat na dɛn pipul ya we wɛr wayt? Yu no usay dɛn kɔmɔt?” 14A ansa am se, “Mi nɔ no dɛn, sa. Na yu no dɛn, sa.” Na de i se, “Dɛn pipul ya na dɛn wan we bin tinap tra nga wɛn da big trɔbul bin fɔdɔm. Dɛn dɔn tek di Ship in blɔd was dɛn klos, mek dɛn wayt. 15Na dat mek, de ɛn nɛt, dɛn tinap bifo di ay chia we Gɔd sidɔm pan, ɛn dɛn de na in os de sav am. Di wan we sidɔm na di ay chia go kɔba dɛn mek natin bad nɔ mit dɛn. 16Angri nɔ go kech dɛn igen, dɛn nɔ go tɔsti igen, ɔt ɔt san nɔ go bɔn dɛn igen ɛn i nɔ go mek dɛn sɔfa pen, 17bikɔs di Ship we de na di ples we di ay chia we king kin sidɔm, de, insɛf go de gyad dɛn lɛkɛ pɔsin we de mɛn ship. Na in go kɛr dɛn go na di say we da wata we de bɔs na grɔn we de gi layf, de. Gɔd go mek dɛn nɔ kray igen.”

will be added

X\