KO Ɔ NUNDENƐ 6

1Dɛn a si di Ship opin di fɔs say pan di sɛvin say dɛn we bin fasin, dɛn a yɛri wan pan dɛn fo tin we gɛt layf ala tɔk wit vɔys we sawnd lɛkɛ tɛnda se, “Kam go!” 2A tɔn luk, na de a si wan wayt ɔs. Di pɔsin we de rayd am, ol wan bo na in an fɔ fɛt, dɛn gi am krawn fɔ wɛr na in ed. I rayd in ɔs go, i dɔn win wan wa ɛn i de go fɔ win ɔda wa dɛn. 3Dɛn di Ship opin di sɛkɛn say we di pepa we rol, fasin; a yɛri di sɛkɛn tin we gɛt layf se, “Kam go!” 4Wan ɔda ɔs kɔmɔt, na bin rɛd ɔs. Dɛn gi di wan we bin de rayd am pawa fɔ bring wa kam na wɔl so dat mɔta lman kin de kil dɛn kɔmpin; dɛn gi am sɔd fɔ ol na in an. 5Dɛn di Ship opin di say we mek tri we di pepa we rol, fasin; a yɛri di tɔd tin we gɛt layf se, “Kam go!” Wɛn a luk, na de a si wan blak ɔs. Di pɔsin we de rayd am ol skel we dɛn de tek fɔ we, na in an. 6A yɛri sawnd lɛkɛ vɔys de kɔmɔt na di say we di fo tin dɛn we gɛt layf de. Di vɔys de tɔk se, “Pipul kin tek di mɔni we dɛn wok fɔ wan de bay wan kɔp rɛs, ɛn dɛn kin tek da mɔni de bay tri kɔp kɔn. Bɔt ɔyl ɛn wayn go de ɔltɛm.” 7Dɛn di Ship opin di pepa we rol di say we mek fo we bin fasin, ɛn a yɛri di tin we gɛt layf we mek fo, se, “Kam go!” 8A tɔn luk bak, na de a si wan ɔs we in kɔla mek i fiba lɛkɛ se i want day. Di pɔsin we bin de rayd am bin nem Day, ɛn wan pɔsin we nem Ɛl bin de fala am. Dɛn gi dɛn pawa oba wan pat na di wɔl if yu sheb di wɔl fo say, so dat dɛn kin kil pipul na wa, ɔ mek dɛn day wit angri, ɔ sik ɛn day, ɔ mek dɛn wayl bif na wɔl sɛf kil dɛn. 9Dɛn di Ship opin di pepa we rol na di say we mek fayv we bin fasin. Dɛn a si di tebul we dɛn de mek sakri fays to Gɔd, ɔnda am, a si dɛn pipul we dɛn bin kil na wɔl dɛn spirit; dɛn bin kil dɛn bikɔs dɛn bin de tɔk se Gɔd in wɔd na tru ɛn dɛn bin de tɛl pipul bɔt Gɔd. 10Dɛn bin de ala lawd wan se, “Masta, yu we yu pawa pas ɔl pawa, yu we tru ɛn yu we na yu wan gren na Gɔd, aw lɔng igen wi fɔ wet bifo yu go jɔj dɛn pipul na wɔl ɛn pɔnish dɛn bikɔs dɛn bin kil wi?” 11Dɛn gi dɛn ɔl wan wan lɔng wayt klos fɔ wɛr; dɛn bin tɛl dɛn fɔ wet lili bit mɔ bikɔs dɛn nɔmba nɔ bin fulɔp yet, i bin lɛf dɛn brɔda we bin stil de wok fɔ Gɔd na wɔl ɛn we di pipul dɛn na wɔl bin gɛt fɔ kil lɛkɛ aw dɛn bin kil dɛnsɛf. 12Dɛn a si di Ship opin di pepa we rol na di say we mek siks we bin fasin. Na de di grɔn bigin tri mbul bad bad wan, di san blak, lɛkɛ dɛn tik blak klos, di mun rɛd lɛkɛ blɔd. 13Di sta dɛn fɔdɔm kam na di wɔl, lɛkɛ dɛn plɔm we nɔ rɛp we kin fɔdɔm wɛn big briz shek di tik. 14Di klawd lɔs lɛkɛ wɛn dɛn de rol dɛn big big pepa fɔ kip dɛn, ɛn ɔl dɛn ay il wit ɔl dɛn ples we de midul wata muf kɔmɔt na dɛn ples. 15Dɔn, dɛn king na di wɔl wit ɔl dɛn ɔda rula, dɛn soja man dɛn bɔs, dɛn wan we jɛntri we gɛt pawa, ɛn ɔl dɛn ɔda pipul, slev ɛn fribɔn, dɛn ɔl rɔn go ayd midul dɛn big big ston na dɛn ay il. 16Frɔm di ples we dɛn bin de na di ay il dɛn, dɛn bin de ala tɛl dɛn il ɛn dɛn big ston se, “Fɔdɔm pan wi, una ayd wi mek di wan we sidɔm pan di ay chia we king kin sidɔm nɔ si wi ɛn mek di vɛks we di Ship vɛks nɔ kam pan wi! 17Di tɛm dɔn kam we dɛn de sho se dɛn vɛks pan wi, udat go ebul sev insɛf?”

will be added

X\