KO Ɔ NUNDENƐ 4

1Wɛn dat dɔn dɔn a si ɔda tin; a si do opin na ɛvin: a yɛri di vɔys bak we bin sawnd lɛkɛ trɔmpɛt de tɔk to mi. Di vɔys se, “Kam ɔp ya, so dat a kin sho yu dɛn tin we mɔs apin bambay.” 2Wantɛm, Gɔd in Spirit kam pan mi; na de a si wan ay chia we king kin sidɔm pan, a si sɔmbɔdi sidɔm pan am. 3Di pɔsin in fes bin de shayn lɛkɛ dayamɔn ɛn lɛkɛ wan ɔda shayn ston we dɛn kɔl rubi. Renbo we de shayn lɛkɛ da fayn ston we dɛn kɔl ɛmi rald bin de rawnd di ay chia. 4Twɛnti-fo ɔda ay chia we king kin sidɔm pan bin de rawnd di fɔs ay chia; a si twɛnti-fo bigman dɛn sidɔm pan di chia dɛn; dɛn bin wɛr wayt klos; ɛn dɛn tin we king kin wɛr we dɛn kɔl krawn, bin de na dɛn ed, na gold dɛn bin tek mek di krawn dɛn. 5Laytin bin de flash, tɛnda bin de rol, plɛnti nɔys bin de na di say we di fɔs ay chia bin de, di sɛvin lamp dɛn bin layt frɔnt di chia, dɛn lamp ya na Gɔd in sɛvin spirit dɛn. 6Bifo di sem ay chia a si sɔntin lɛkɛ wata we tan lɛkɛ se dɛn tek glas mek am. Ɔlɔbɔt klos di chia, frɔnt, bak ɛn sayd, fo tin we gɛt layf bin tinap, dɛn bin gɛt yay ɔlɔbɔt na dɛn bɔdi; bifo ɛn biɛn. 7Di fɔs tin we gɛt layf bin fiba layɔn, di sɛkɛn wan bin fiba kaw pikin, di tɔd wan bin gɛt fes we fiba mɔta lman fes, di wan we mek fo bin tan lɛkɛ igul we de flay. 8Dɛn ɔl fo bin gɛt siks siks wing dɛn; soso yay bin kɔba dɛn ɔlɔbɔt. Ol de ol nɛt dɛn nɔ de tap fɔ sing se, “Gɔd na di Masta we gɛt pawa pas ɔl, na in wan gren na Gɔd, i nɔ sin wande, i gud pas ɔl. I bin de bifo di wɔl mek, i de naw ɛn i go kam bak.” 9Wɛn dɛn fo tin ya we gɛt layf de prez di wan we go de sote go, we sidɔm pan di ay chia we king kin sidɔm, wɛn dɛn de sho am di rɛspɛkt we dɛn gɛt fɔ am ɛn tɛl am tɛnki, 10di twɛnti-fo bigman dɛnsɛf kin fɔdɔm bifo di wan we go de sote go, we bin sidɔm pan di ay chia we king kin sidɔm pan, ɛn dɛn kin bigin prez am; dɛn kin pul dɛn krawn na dɛn ed ib dɛn bifo di ay chia; dɔn dɛn kin sing se, 11“Wi Masta ɛn wi Gɔd! Yu fit fɔ mek wi fɔdɔm na yu fut, ɛn prez yu, ɛn sho se yu gɛt pawa, bikɔs na yu mek ɔltin ɛn yu mek dɛn ɛn gi dɛn layf bikɔs na dat yu want.”

will be added

X\