KO Ɔ NUNDENƐ 3

1“Rayt dis mɛsej ya sɛn am go to di enjɛl we de gyad di Kristiɛn dɛn na Sadis: “Na dis mɛsej ya di pɔsin we gɛt Gɔd in sɛvin spirit dɛn ɛn we ol dɛn sɛvin sta, sɛn: A no di tin dɛn we una de du, pipul tink se una gɛt layf, bɔt una nɔ gɛt layf, una dɔn day. 2So una grap, una tray mek di lili layf we una stil gɛt nɔ dɔn ɔltogɛda. A si se di tin dɛn we una de du nɔ tan yet lɛkɛ aw dɛn fɔ tan na Gɔd yay. 3So una mɛmba dɛn tin we dɛn dɔn lan una we una bin biliv, ɛn una nɔ lɛf fɔ biliv dɛn wit ɔl una at, una lɛf fɔ du dɛn bad tin we una de du. If una nɔ grap wantɛm ɛn bigin du dɛn tin we a tɛl una, a go kam lɛkɛ tifman kam mit una ɛn una nɔ go no di tɛm we a go kam mit una. 4Bɔt te naw sɔm pan una de na Sadis we nɔ dɔti una klos, bɔt una nɔ plɛnti. Dɛn pipul de go waka wit mi, dɛn go wɛr wayt klos bikɔs dɛn fit fɔ wɛr am, bay aw dɛn de du. 5Dɛn pipul we go stil tinap tra nga afta Setan dɔn tray dɛn, dɛnsɛf go wɛr wayt klos. Ɛn a nɔ go pul dɛn nem kɔmɔt na di buk we dɛn pipul we gɛt layf, dɛn nem rayt. A go tɔk bifo mi Papa ɛn bifo in enjɛl dɛn se dɛn pipul de na mi yon. 6“Ɛnibɔdi we gɛt yes, mek i yɛri dɛn wɔd ya we Gɔd in Spirit de tɛl di Kristiɛn dɛn na dɛn difrɛn ples. 7“Rayt dis mɛsej ya sɛn am go to di enjɛl we de gyad di Kristiɛn dɛn na Filadɛlfia: “Na di mɛsej dis we Krays we na di tru wan, sɛn. Na in ol di ki we Devid bin ol. If i opin ɛni do, nɔbɔdi nɔ de we go ebul lɔk am. If i lɔk ɛni do, nɔbɔdi nɔ de we go ebul opin am: 8A no di tin dɛn we una de du. Una lisin, a dɔn opin do fɔ una we nɔbɔdi nɔ ebul lɔk. A no se pan ɔl we una nɔ gɛt plɛnti trɛnk una dɔn du wetin a tɛl una fɔ du, wande una nɔ dinay se una de waka wit mi. 9As fɔ dɛn wan we de fala Setan, we de lay se dɛn na Ju, a go mek dɛn kam fɔdɔm na una fut ɛn a go mek dɛn ɔl no se a lɛk una. 10Una dɔn du wetin a tɛl una fɔ du una dɔn tinap tra nga ɛn una dɔn bia; fɔseka dat a nɔ go mek una sɔfa wɛn di tɛm kam we tin go tra nga na wɔl, fɔ tray ɔlman we de na di wɔl fɔ si if dɛn biliv pan Gɔd, fɔ tru. 11A go kam bak, i nɔ go te igen. Una nɔ lɛf fɔ biliv wit ɔl una at dɛn tin we una dɔn lan, so dat nɔbɔdi nɔ go jɔg una blɛsin we una go gɛt bikɔs una dɔn tinap tra nga. 12Ɛnibɔdi we go stil tinap tra nga afta Setan dɔn tray am, a go mek i bi lɛkɛ pos we go mek Gɔd in Os tinap, i go tinap de sote go. A go rayt mi Gɔd in nem pan am, ɛn di tɔng we i bil, in sɛf yon nem pan am, dat na ‘di Nyu Jerusɛlɛm’, we go kɔmɔt to Gɔd na ɛvin kam dɔng. Ɛn a go rayt mi yon nyu nem pan am. 13“Ɛnibɔdi we gɛt yes, mek i yɛri dɛn wɔd ya we Gɔd in Spirit de tɛl di Kristiɛn dɛn na dɛn difrɛn ples. 14“Rayt dis mɛsej ya sɛn am go to di enjɛl we de gyad di Kristiɛn dɛn na Leo di sya: “Na di mɛsej dis we di wan we de se ‘Emɛn’ fɔ ɔl Gɔd in wok, sɛn. Na in na di Wan we de tɔk tru ɔltɛm ɛn wɛn i tɔk pipul fɔ biliv wetin i se, na in an ɔl dɛn tin we Gɔd mek, bigin: 15A no ɔl wetin una de du. Una tan lɛkɛ it we nɔ kol ɛn we nɔ ɔt we nɔ gɛt tes. A wish una bin de fala mi wit ɔl una at ɔ una bin lɛf fɔ fala mi ɔltogɛda. 16So bikɔs una tan lɛkɛ it we nɔ ɔt ɛn we nɔ kol, a go pit una kɔmɔt na mi mɔt. 17Una de tɔk se una jɛntri, di tin dɛn we una gɛt, dɔn plɛnti, ɛn natin nɔ de we una fɔ gɛt we una nɔ gɛt. Bɔt una nɔ kechɔp se una po, ɛn pipul de sɔri fɔ una, una de nekɛd ɛn una yay blɛn. 18So a de advays una mek una kam to mi kam bay gold, we dɛn dɔn bɔn na faya te i klin so dat una go jɛntri fɔ tru; ɛn a de advays una igen mek una kam bay wayt klos fɔ wɛr, so dat una nɔ go shem bikɔs una de nekɛd, ɛn mek una kam bay mɛrɛsin fɔ rɔb na una yay mek una go si. 19Dɛn pipul we a lɛk na dɛn a kin tɛl se dɛn de du rɔng tin ɛn a kin pɔnish dɛn mek dɛn go gɛt sɛns fɔ du wetin rayt. So una kechɔp unasɛf, ɛn lɛf fɔ sin. 20Una lisin, a tinap nia di do, a de nak pan am; if ɛnibɔdi we yɛri mi vɔys opin di do, a go kam insay in os, mi ɛn in go sidɔm ɛn it togɛda. 21Ɛnibɔdi we go stil tinap tra nga afta Setan dɔn tray am, a go mek i sidɔm wit mi na di say we a sidɔm fɔ rul jɛs lɛkɛ aw misɛf bin stil tinap tra nga afta Gɔd dɔn tray mi ɛn a kam sidɔm wit mi Papa na di say we i sidɔm de rul. 22“Ɛnibɔdi we gɛt yes, mek i yɛri dɛn wɔd ya we Gɔd in Spirit de tɛl di Kristiɛn dɛn na dɛn difrɛn ples.”

will be added

X\