KO Ɔ NUNDENƐ 21

1Wɛn dat dɔn, na de a si wan nyu ɛvin ɛn wan nyu wɔl. Di ɛvin ɛn di wɔl we bin de fɔs bin dɔn lɔs, di wata insɛf bin dɔn dray. 2Dɛn a si Gɔd in tɔng, we dɛn kɔl, nyu Jerusɛlɛm, i bin de kɔmɔt to Gɔd na ɛvin kam dɔng, dɛn bin dɔn mek am fayn fayn rɛdi, lɛkɛ uman we jɛs mared we dɔn drɛs de wet fɔ go to in man. 3A yɛri lawd vɔys we kɔmɔt na di say we di chia we king kin sidɔm fɔ rul, bin de; i bin de tɔk se, “Gɔd dɔn kam fɔ tap to mɔta lman, i go tap wit dɛn ɛn dɛn go bi in pipul. Gɔd insɛf go de wit dɛn ɔltɛm. 4I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.” 5Dɛn di pɔsin we sidɔm na di chia we king kin sidɔm fɔ rul, se, “Luk, a de mek ɔltin nyu!” Dɛn i se, “Rayt dɛn wɔd ya dɔng, bikɔs dɛn na tru ɛn pipul kin biliv dɛn.” 6I tɔk igen se, “Ɔl dɛn tin ya dɔn bi. Mi na Alfa, dat na di wan we bigin ɔltin, ɛn Omega, dat na di wan we go dɔn ɔltin. If ɛnibɔdi tɔsti, mek i kam to mi, a go gi am pan di wata we de bɔs plɛnti plɛnti we de gi layf; ɛn we fri. 7Ɛnibɔdi we stil tinap tra nga afta Gɔd dɔn tray am go gɛt ɔl dɛn tin ya, ɛn pantap dat, a go bi in Papa ɛn i go bi mi pikin. 8Bɔt as fɔ dɛn pipul we dɛn maynd wik, dɛn wan we nɔ biliv Gɔd in mɛsej, dɛn wan we de du dɛn dɔti dɔti tin, dɛn wan we de kil dɛn kɔmpin, dɛn wan we liv fri layf, dɛn wan we de wich, dɛn wan we de fala mɛrɛsin, dɛn wan we de lay, ɔl dɛn pipul we de du dɛn kayn tin ya, dɛn go trowe dɛn ɔl insay da wata we faya de kech ɛn sɔlfa de bɔn. Na di sɛkɛn day dat.” 9Wan pan dɛn sɛvin enjɛl dɛn we bin gɛt dɛn sɛvin kɔp we dɛn sɛvin bad bad tin dɛn we bin gɛt fɔ fɔdɔm pan di wɔl bifo di wɔl dɔn, bin de insay, kam tɔk to mi, i se, “Kam mek a sho yu di Ship in yawo.” 10Gɔd in Spirit kam pan mi, na de di enjɛl tek mi go ɔp wan ay ay il. Wɛn wi rich de, di enjɛl sho mi Gɔd in tɔng we dɛn kɔl di nyu Jerusɛlɛm as di tɔng de kɔmɔt to Gɔd na ɛvin kam dɔng. 11Gɔd in brayt layt bin de shayn insay de; di tɔng bin de shayn lɛkɛ wan fayn fayn ston we dɛn kɔl jaspa, ɛn i bin de shayn lɛkɛ glas. 12Wan ay ay wɔl bin de rawnd am, ɛn i bin gɛt twɛlv domɔt. Twɛlv enjɛl dɛn bin de gyad di twɛlv domɔt dɛn. Di nem fɔ ɔl di twɛlv trayb dɛn na Izrɛl bin rayt pan di domɔt dɛn. 13Ɛvri wan pan di fo say dɛn na di tɔng bin gɛt tri domɔt: tri na di say we san de kɔmɔt, tri na di say we san de go dɔng, tri na di raytan say, tri na di lɛfan say if yu de luk to di say we san de kɔmɔt. 14Na twɛlv ston dɛn bin tek bil di wɔl in fawndeshɔn. Na pan dɛn ston de di Ship in twɛlv apɔsul dɛn nem bin rayt. 15Di enjɛl we bin de tɔk to mi bin ol wan gold tik we dɛn de tek mɛnshɔ; na in i go tek mɛnshɔ di tɔng, di domɔt dɛn ɛn di wɔl. 16Di enjɛl tek di tik, mɛnshɔ di tɔng. Nɔn say na di tɔng nɔ bin lɔng pas in kɔmpin. Wan say na bin wan tawzin fayv ɔndrɛd mayl, semwe so di tɔng in ayt na bin wan tawzin fayv ɔndrɛd mayl. 17Di enjɛl mɛnshɔ di wɔl insɛf, lɛkɛ aw mɔta lman de mɛnshɔ, di wɔl bin ay tu ɔndrɛd ɛn sikstin fut. 18Na fayn fayn ston we dɛn kɔl jaspa dɛn bin tek mek di wɔl, ɛn na piɔ gold we bin de shayn lɛkɛ glas dɛn bin tek mek di tɔng insɛf. 19Na twɛlv difrɛn kayn fayn fayn ston dɛn put pan di twɛlv fawndeshɔn ston dɛn fɔ mek di wɔl we bin tinap rawnd di tɔng, fayn. Di fɔs ston na bin grin ɛn i bin de shayn, dɛn kɔl am jaspa; di sɛkɛn ston na bin blu, dɛn kɔl am safaya; di ston we mek tri bin gɛt ɔl kayn kɔla, dɛn kɔl am aget; di ston we mek fo na bin brayt grin, dɛn kɔl am ɛmi rald; 20di ston we mek fayv bin de shayn ɛn i bin klia, i bin gɛt plɛnti kɔla, dɛn kɔl am oniks; di ston we mek siks na bin lɛkɛ wɛn brawn ɛn rɛd miks, dɛn kɔl am rubi; di ston we mek sɛvin na bin yala, dɛn kɔl am kwɔts; di ston we mek et na bin grin, dɛn kɔl am bɛril; di ston we mek nayn na bin layt yala, dɛn kɔl am topaz; di ston we mek tɛn bin gɛt yala-grin kɔla, dɛn kɔl am kri so prayz; di ston we mek ilɛvin na bin dip blu, dɛn kɔl am jasint; di ston we mek twɛlv na bin dip rɛd, dɛn kɔl am ami tist. 21Na dɛn fayn fayn tin we tan lɛkɛ bid we dɛn kɔl pal dɛn tek mek di twɛlv get dɛn na di tɔng, na gold dɛn tek mek di trit, ɛn di gold de shayn lɛkɛ glas. 22A nɔ bin si Gɔd in Os insay di tɔng bikɔs Gɔd, we gɛt pawa pas ɔl, ɛn di Ship bin de ɔlɔbɔt na di tɔng ɛn ɔlman bin de pre to dɛn ɔlɔbɔt. 23Da tɔng de nɔ nid san, i nɔ nid mun fɔ layt am, bikɔs na di layt we de kɔmɔt pan Gɔd, ɛn di Ship insɛf, de layt am. 24Di layt we lib de go mek pipul ɔlɔbɔt na wɔl si fɔ waka. Dɛn wan we de rul na wɔl dɛnsɛf go kɛr dɛn jɛntri go de. 25Di domɔt dɛn na di tɔng go opin ɔltɛm, tɛm nɔ go de we dɛn go lɔk, bikɔs nɛt nɔ go de na da tɔng de. 26Dɛn go kɛr ɔl dɛn neshɔn dɛn pawa ɛn dɛn jɛntri go lɛf dɛn de. 27Bɔt natin we bad nɔ go go insay de, ɛnibɔdi we de du dɛn dɔti dɔti tin nɔ go go insay de, semwe so, dɛn pipul we de lay, ɛn pipul dɛn lɛkɛ dat, nɔ go go insay de. Dɛn pipul we go go insay de, na di wan dɛn nɔmɔ we dɛn nem bin dɔn rayt na di Ship in buk we dɛn de rayt dɛn pipul we gɛt layf sote go dɛn nem.

will be added

X\