KO Ɔ NUNDENƐ 20

1Wɛn dat dɔn, a si wan enjɛl de kɔmɔt na ɛvin kam dɔng. I bin ol di ki fɔ tek opin di ol we nɔ gɛt bɔtɔm, ɛn i bin ol wan ebi chen. 2I kech di dragɔn, dat na da snek we bin dɔn de frɔm tɛm, dɛn bad spirit dɛn king, Setan; i tay am fɔ wan tawzin ia. 3Dɛn di enjɛl tek am trowe am insay di ol we nɔ gɛt bɔtɔm, i lɔk am ɛn put waks we sil di lɔk, so dat i nɔ go kɔmɔt, ɛn i nɔ go mek dɛn pipul ɔlɔbɔt na wɔl ful igen, te di wan tawzin ia dɔn pas. Afta dat, dɛn fɔ lus am lili bit fɔs. 4Wɛn dat dɔn, a si dɛn chia we king kin sidɔm fɔ rul, ɛn a si dɛn wan we bin sidɔm pan dɛn. Sɔmbɔdi bin gi dɛn pawa fɔ jɔj ɔda pipul, ɛn igen a si dɛn spirit we kɔmɔt pan dɛn pipul we dɛn bin kil na wɔl bikɔs dɛn bin de tɔk se Jizɔs na dɛn Masta ɛn dɛn bin de tɛl pipul Gɔd in mɛsej. Dɛn pipul ya nɔ bin fɔdɔm bifo di wayl bif fɔ pre to am ɛn dɛn nɔ bin pre to di tin we dɛn mek fɔ tek mɛmba ɛn rɛspɛkt am, ɛn di wayl bif in mak nɔ bin de pan dɛn fɔrɛd ɔ pan dɛn an. Dɛn gɛt layf bak, dɔn dɛn rul wit Krays fɔ wan tawzin ia. 5Dɛn ɔda pipul we bin dɔn day nɔ bin gɛt layf bak te di wan tawzin ia dɔn pas. Na di fɔs tɛm dis we Gɔd mek pipul we bin dɔn day rayz frɔm dɛn grev. 6Ɔl dɛn pipul we fɔs kam gɛt layf bak afta dɛn bin dɔn day na pipul we gɛt blɛsin, dɛn gɛt wɔnda ful blɛsin. Di sɛkɛn day nɔ go du dɛn natin; dɛn go bi pipul we de mek sakri fays to Gɔd ɛn Krays, ɛn dɛn go rul wit am fɔ wan tawzin ia. 7Wɛn di wan tawzin ia dɔn pas, dɛn go pul Setan kɔmɔt na di say we dɛn bin lɔk am, 8ɛn wɛn i kɔmɔt de, i go go mek ɔl dɛn neshɔn ɔlɔbɔt na wɔl, ful. Di neshɔn dɛn na bin Gɔg ɛn Megɔg. Setan go gɛda dɛn ɔl fɔ fɛt; dɛn go plɛnti lɛkɛ sansan. 9Dɛn go ɔlɔbɔt na wɔl go tinap rawnd di say we Gɔd in pipul dɛn bin de mit, dat na da tɔng we Gɔd lɛk. Bɔt faya kɔmɔt ɔp na ɛvin kam dɔng kam bɔn dɛn. 10Dɛn tek Setan we bin de mek pipul ful, trowe am insay da wata we faya de kech ɛn sɔlfa de bɔn; na da sem ples de dɛn bin trowe da wayl bif ɛn da prɔfɛt we nɔ de tɔk tru; na de dɛn go tɔmɛnt, de ɛn nɛt, sote go. 11Wɛn dat pas, na de a si wan big wayt chia we king kin sidɔm fɔ rul ɛn di pɔsin we sidɔm pan am. Ɛvin ɛn di wɔl jɛs lɔs bifo am; nɔbɔdi nɔ si dɛn igen. 12Dɛn a si dɛn pipul we bin dɔn day, dɛn bigman ɛn dɛn ɔdi nari pipul, dɛn ɔl tinap bifo di chia. Sɔmbɔdi opin sɔm buk dɛn, dɔn i opin wan ɔda buk we dɛn pipul we gɛt layf sote go dɛn nem bin rayt. Ɔl wetin dɛn pipul we bin dɔn day bin du bifo dɛn day, bin rayt insay di fɔs buk dɛn, ɛn na in Gɔd tek jɔj dɛn. 13Ɔl dɛn wan we bin dɔn day na wata kɔmɔt na di wata kam ɔp; ɔl dɛn wan we bin dɔn day we bin de na grev, rayz; di wan we bin sidɔm na di chia we king kin sidɔm, jɔj dɛn ɔl bay di wok we dɛn bin du na wɔl. 14Dɛn sɔmbɔdi tek day ɛn di ples we dɛn dayman de, ib dɛn na da wata we faya de kech. (Di tɔmɛnt we pɔsin go tɔmɛnt sote go na di wata we faya de kech, na in na di sɛkɛn day.) 15Ɛnibɔdi we in nem nɔ bin rayt insay di buk we dɛn rayt dɛn pipul we gɛt layf sote go dɛn nem, dɛn trowe am insay di wata we faya de kech.

will be added

X\