KO Ɔ NUNDENƐ 18

1Wɛn dat dɔn, a si wan ɔda enjɛl kɔmɔt na ɛvin kam dɔng na wɔl, i bin gɛt wɔnda ful pawa. Di layt we bin de shayn pan am, layt ɔl dɛn ples na wɔl. 2I ala lawd wan se, “Babilɔn, da tɔng we ɔlman no, dɔn pwɛl, i dɔn pwɛl pata pata; na ɔl kayn bad spirit tap de naw, ɔl dɛn wan we kɔmɔt to Setan; dɛn bad bɔd we pipul nɔ lɛk na dɛn dɔn go gɛda de. 3Na so i bi, bikɔs ɔl dɛn pipul na ɔl dɛn neshɔn dɔn drink in wayn, dat na di fri layf we dɛn dɔn liv wit am; dɛn wan we de rul na di wɔl dɛnsɛf dɔn liv di sem fri layf wit am, ɛn bikɔs i lɛk fɔ bay plɛnti plɛnti tin dɛn, dɛn wan we de tre din na dis wɔl dɛnsɛf dɔn jɛntri bikɔs i de bay to dɛn.” 4Dɛn a yɛri wan ɔda vɔys de tɔk na ɛvin se, “Mi pipul dɛn, una mekes kɔmɔt na da tɔng de so dat unasɛf nɔ go bigin du di bad tin dɛn we i de du, ɛn unasɛf nɔ go sɔfa lɛkɛ aw i gɛt fɔ sɔfa. 5Una fɔ no se Gɔd nɔ fɔgɛt di bad bad tin dɛn we i dɔn du, we dɔn payl te dɛn dɔn rich ɔp na ɛvin. 6Lɛ di bad we i dɔn du tɔn pan am. Mek i sɔfa tu tɛm pas di sɔfa we i mek ɔda pipul sɔfa; da kɔp we i kin tek gi pipul in wayn fɔ drink, ful am wit wayn we trɔng pas in yon wayn, ɛn gi am mek i drink. 7Mek i pɔnish gud fashin ɛn mek in at ebi lɛkɛ aw i bin mek insɛf impɔtant ɛn i bin de ɛnjɔy layf. I de tɔk to insɛf se, ‘Mi na mama kwin, mi nɔto uman we in man dɔn day; kray nɔ go de na mi yay.’ 8Bikɔs na dat i de mɛmba, di big waala we fɔ mit am go fɔdɔm pan am. Wan gren de, i go sik, in at go ebi, i nɔ go gɛt natin fɔ it, ɛn faya go bɔn am. Bikɔs Gɔd we na wi Masta, gɛt pawa ɛn na in dɔn kɔndɛm am.” 9Dɛn wan we de rul na dis wɔl we bin dɔn liv fri layf ɛn ɛnjɔy layf wit am go si di smok we de kɔmɔt na di faya we de bɔn am, dɛn dɛn go put dɛn an na dɛn ed, ɛn bɔs kray. 10Dɛn go fred wɛn dɛn si di big waala we mit di tɔng, dɛn go tinap fawe, de tɔk se, “Oya, da big tɔng, Babilɔn, we bin gɛt pawa, dɔn pwɛl; na wan awa nɔmɔ i tek fɔ bɔn kam dɔng na grɔn.” 11Dɛn wan we de tre din na di wɔl go kray ɛn dɛn at go ebi bikɔs di tɔng dɔn pwɛl, ɛn nɔbɔdi nɔ go de igen fɔ bay dɛn tin we dɛn de sɛl; 12nɔbɔdi nɔ go bay ɔl dɛn tin we dɛn de sɛl, lɛkɛ gold ɛn silva, dɛn shayn shayn ston ɛn fayn fayn bid; dɛn fayn fayn klos, rɛd wan ɛn mov wan, silk ɛn linin; ɛn dɛn wud we gɛt fayn sɛnt, dɛn tin we dɛn tek ɛli fant tit ɛn dia wud mek ɛn dɛn tin we dɛn tek bras ɔ ayɛn ɔ mabul mek; 13dɛn tin we de smɛl swit lɛkɛ sinamɔn, spays, insɛns, ɛn dɛn tin we dɛn kɔl ma ɛn fra nkinsɛns; wayn, ɔyl we dɛn de tek kuk, fayn flawa, kɔn, kaw ɛn ship, dɛn ɔs ɛn dɛn chariɔt, ɛn dɛn pipul we dɛn tek mek slev. 14Dɛn wan we de tre din go tɛl am se, “Ɔl di tin dɛn we yu bin put yu at pan nɔ de igen; ɔl yu jɛntri dɔn dɔn, yu nɔ go si am igen, ɛn di fayn layf we yu bin liv bikɔs yu bin jɛntri dɔn dɔn, yu nɔ go liv so igen.” 15Dɛn pipul we jɛntri bikɔs dɛn de sɛl dɛn tin ya go fred wɛn dɛn si di trɔbul we mit di tɔng, dɛn go tinap fawe, de kray ɛn wit ebi at, dɛn go se, 16“Eeya, oya! Da tɔng de we bin gɛt pawa, dɔn pwɛl, i bin tan lɛkɛ uman we drɛs wit fayn fayn linin, mov ɛn rɛd klos ɛn we kin tek gold ɛn dɛn shayn shayn ston ɛn fayn fayn bid drɛs insɛf! 17Na wan awa nɔmɔ ɔl in jɛntri lɔs!” Ɔl dɛn kapten, ɔl dɛn wan we de go ɔp ɛn dɔng na dɛn big bot, wit ɔl dɛn siman, ɔl dɛn wan we de go si fɔ tre din, dɛn ɔl tinap fawe; 18wɛn dɛn si di smok we bin de kɔmɔt na di faya we bin de bɔn di tɔng, dɛn ala se, “Nɔ tɔng nɔ de lɛkɛ dis wande!” 19Dɛn ib dɔti na dɛn ed bikɔs dɛn at ebi, dɛn ala se, “Oya o! Oya, una fɔ sɔri fɔ da tɔng we bin gɛt pawa. Di jɛntri we dis tɔng bin jɛntri fɔs tɛm bin mek ɔl dɛn wan we bin gɛt bot we bin de go si fɔ tre din, jɛntri. Bɔt naw, wan awa nɔmɔ, i dɔn pwɛl pata pata.” 20Mek ɔl dɛn wan we de na ɛvin gladi, mek ɔl Gɔd in pipul dɛn, in apɔsul dɛn, ɛn dɛn wan we de tɔk in mɛsej gladi bikɔs Gɔd dɔn pɔnish am fɔ di bad we i bin de du dɛn. 21Wɛn dat dɔn, wan enjɛl we gɛt plɛnti pawa pik wan big big ston lɛkɛ pɛpɛ ston ib am insay di wata, i se, “Na semwe so dɛn go ib da big tɔng we nem Babilɔn dɔng ɛn brok am, ɛn nɔbɔdi nɔ go si am igen. 22Insay da tɔng de, pipul nɔ go yɛri ɛnibɔdi de ple ap igen, dɛn nɔ go yɛri pɔsin de ple flut ɔ blo trɔmpɛt igen, dɛn nɔ go yɛri pipul de sing igen; ɔl dɛn pipul we de du ɔl kayn tin wit dɛn an, lɛkɛ dɛn wan we de mek dɛn pɔt ɛn dɛn fita dɛn so, nɔ go wok insay de igen. Nɔbɔdi nɔ go yɛri pɔsin de bit kɔn de igen; 23lamp nɔ go layt de igen; man ɛn uman nɔ go mared de igen. Dɛn wan we bin de tre din insay de na bin dɛn bigman we ɔlman na wɔl, no. I bin de tek wich mek ɔl dɛn pipul na ɔl dɛn neshɔn ful.” 24Ɛn i go sɔfa bikɔs na insay de blɔd bin kɔmɔt pan dɛn wan we bin de tɔk Gɔd in mɛsej, pan ɔl Gɔd in pipul dɛn, ɛn pan ɔl dɛn pipul na wɔl we dɛn dɔn kil.

will be added

X\