KO Ɔ NUNDENƐ 17

1Wɛn ɔl dat dɔn, wan pan di sɛvin enjɛl dɛn we bin ol wan pan di sɛvin kɔp dɛn, kam tɔk to mi, i se, “Kam, mek a go sho yu aw dɛn go pɔnish da uman we liv fri layf we ɔlman no; di uman na da tɔng we dɛn bil klos dɛn plɛnti riva. 2Ɔl dɛn wan we de rul na wɔl bin liv fri layf wit dis uman ya we ɔlman no, ɛn ɔl di pipul dɛn na wɔl bin drɔnk wit di wayn we i gi dɛn fɔ drink, dat na di fri layf we dɛn bin liv wit am.” 3Di Spirit fɔdɔm pan mi, na de di enjɛl kɛr mi go na wan dɛzat. Dɛn a si wan uman sidɔm pan wan rɛd wayl bif we bin gɛt sɛvin ed ɛn tɛn ɔn; ɔlɔbɔt na in bɔdi plɛnti bad nem dɛn we nɔ sho rɛspɛkt fɔ Gɔd, bin rayt. 4Di uman bin wɛr rɛd klos we dia, ɛn i bin drɛs fayn wit plɛnti gold tin, dɛn shayn shayn ston ɛn fayn fayn bid. I bin ol wan gold kɔp na in an, we bin ful wit dɛn dɔti dɔti dɔti tin we in fri layf bring. 5Wan nem we gɛt sikrit minin bin rayt pan in fɔrɛd, we se “Babilɔn we ɔlman no, we de bɔn ɔl dɛn pipul we liv fri layf, ɛn we de du ɔl dɛn tin we mɔta lman nɔ fɔ du wit in kɔmpin mɔta lman.” 6A si se di uman bin drɔnk wit Gɔd in pipul dɛn blɔd ɛn di blɔd we kɔmɔt pan dɛn pipul we dɛn bin kil bikɔs dɛn tɔk opin wan se Jizɔs na dɛn Masta. Wɛn a si am a wɔnda te a nɔ no wetin fɔ tɔk. 7Di enjɛl aks mi se, “Wetin du yu de wɔnda?” I se, “A go tɛl yu wetin di uman ɛn di wayl bif we tot am, we gɛt sɛvin ed ɛn tɛn ɔn, min. 8Di wayl bif we yu si bin gɛt layf fɔstɛm, bɔt i nɔ gɛt layf igen, i nɔ go te igen i go kɔmɔt na di ol we nɔ gɛt bɔtɔm, dɛn i go go na ples we dɛn go go kil am. Dɛn pipul we de na wɔl, we dɛn nem nɔ bin dɔn rayt bifo Gɔd mek di wɔl, na di buk we dɛn rayt dɛn pipul we gɛt layf sote go dɛn nem, dɛn ɔl go wɔnda wɛn dɛn de luk di wayl bif. I bin gɛt layf fɔstɛm, dɛn i day, bɔt i go kam bak. 9“Na dat mek pipul fɔ gɛt sɛns ɛn dɛn fɔ sabi wetin dɛn tin ya, min. Di sɛvin ed dɛn na di sɛvin ay il dɛn we di uman bin sidɔm pan. Ɛn igen dɛn min sɛvin king: 10fayv pan dɛn king ya nɔ de rul igen, na wan nɔmɔ de rul te naw, ɛn di las wan nɔ kam yet; wɛn i kam, na shɔt tɛm nɔmɔ i go rul. 11Di wayl bif we bin gɛt layf fɔs, bɔt we dɔn day, insɛf na king we mek et we miks pan di sɛvin king dɛn, bɔt i gɛt fɔ go na ples we dɛn go kil am. 12“Di tɛn ɔn dɛn we yu si na tɛn king dɛn we nɔ bigin rul yet, bɔt dɛn go gi dɛn pawa fɔ rul lɛkɛ king wit di wayl bif fɔ wan awa. 13Na di sem tin ɔl dɛn tɛn king ya want du, dɛn ɔl de gi di wayl bif dɛn pawa. 14Dɛn go fɛt di Ship bɔt di Ship ɛn dɛn wan we i kɔl ɛn pik fɔ du in wok, we nɔ lɛf fɔ fala am, go win dɛn. Na so i go bi bikɔs di Ship na di Masta we de oba ɔl dɛn masta, ɛn di King we de rul oba ɔl dɛn king.” 15Di enjɛl tɛl mi igen se, “Dɛn wata we yu si di uman we liv fri layf sidɔm pan, na ɔl dɛn difrɛn difrɛn kɔntri, ɛn ɔl dɛn difrɛn difrɛn pipul, wayt ɛn blak, we de tɔk ɔl dɛn difrɛn difrɛn langwej. 16Di tɛn ɔn dɛn, ɛn di wayl bif we yu si, nɔ go lɛk di uman we liv fri layf; dɛn go tek ɔl wetin i gɛt kɛr dɛn go, ɛn lɛf am nekɛd; dɛn go it in bif na in bɔdi, dɔn dɛn go bɔn am na faya we i go day insay. 17Gɔd go mek di king dɛn want fɔ du wetin in want, so dat dɛn ɔl go gɛt wanwɔd, ɛn dɛn go gi di wayl bif dɛn pawa fɔ rul, te ɔltin bi lɛkɛ aw i bin dɔn tɔk. 18“Di uman we yu si, na da big tɔng we gɛt pawa oba dɛn wan we de rul na di wɔl.”

will be added

X\