KO Ɔ NUNDENƐ 14

1Wɛn dat dɔn, a si di Ship tinap pantap di ay il we dɛn kɔl Zayɔn. Wan ɔndrɛd ɛn fɔti-fo tawzin pipul bin tinap de wit am. Di Ship in nem ɛn in Papa in nem bin rayt pan dɛn fɔrɛd. 2Dɛn a yɛri vɔys kɔmɔt na ɛvin; di vɔys big lɛkɛ dɛn big wata we de fɔdɔm kɔmɔt ɔp dɛn il kam dɔng ɛn lɛkɛ wɛn tɛnda de krak. Di vɔys swit lɛkɛ di sawnd we kin kɔmɔt wɛn pipul de ple ap. 3Di wan ɔndrɛd ɛn fɔti-fo tawzin pipul dɛn tinap bifo di ay chia we Gɔd sidɔm pan, bifo di fo tin dɛn we gɛt layf, ɛn bifo di bigman dɛn. Dɛn bin de sing wan nyu sing we na dɛn wan nɔmɔ, we Krays bin dɔn pe fɔ na wɔl wit in blɔd, bin ebul lan ɛn sing am. 4Dɛn na man dɛn we nɔ bin miks pan uman biznɛs; dɛn bin de fala di Ship ɛni say i go. Na di Ship bin pik dɛn kɔmɔt to dɛn ɔda mɔta lman wɛn i bay dɛn, ɛn na dɛn fɔs i put wansay fɔ insɛf nɔmɔ ɛn fɔ Gɔd. 5Wande nɔbɔdi nɔ yɛri dɛn lay; dɛn nɔba du ɛni tin we go mek pipul blem dɛn. 6Dɛn a si wan ɔda enjɛl de flay ɔp ɔp, i bin de tɛl pipul di Gud Nyus we go de sote go, dɛn pipul ya kɔmɔt na ɔl dɛn trayb, ɔl dɛn neshɔn ɛn dɛn de tɔk ɔl dɛn difrɛn langwej, blak man o, wetman o, ɔl de pan dɛn. 7I tɔk lawd wan se, “Una fred Gɔd, ɛn prez am bikɔs i wɔnda ful! Di tɛm dɔn kam fɔ mek i jɔj mɔta lman. Una fɔdɔm bifo am ɛn prez am, na in mek ɛvin, na in mek di dray grɔn, di big wata we de rawnd di dray grɔn ɛn dɛn wata we de bɔs na grɔn!” 8Wan ɔda enjɛl bin de fala di fɔs wan de tɔk se, “Babilɔn dɔn pwɛl! Da big tɔng, Babilɔn, dɔn pwɛl! Na in bin de gi ɔlman in wayn fɔ drink; da wayn de na di fri layf we pipul dɛn bin de pan, ɛn we kin mek dɛn du ɛni bad tin we dɛn at gi dɛn fɔ du.” 9Wan ɔda enjɛl we mek tri, kam, i bin de ala lawd wan se, “Ɛnibɔdi we de pre to di wayl bif ɛn di tin we dɛn mek fɔ de tek mɛmba ɛn rɛspɛkt am, ɛn we gri mek dɛn put in mak pan in fɔrɛd ɔ pan in an, 10insɛf go drink Gɔd in yon wayn, dat na di pɔnish we i go pɔnish bikɔs Gɔd vɛks pan am, da pɔni shmɛnt de tan lɛkɛ bita wayn we nɔ miks wit wata we i gɛt fɔ drink. Ɔl dɛn pipul we de du dɛn tin ya go pɔnish bifo Gɔd in enjɛl dɛn ɛn Gɔd in Ship insay faya we sɔlfa de bɔn. 11Di faya nɔ go tap fɔ mek smok we go de tɔmɛnt dɛn sote go, so dɛn pipul we de pre to di wayl bif ɛn di tin we dɛn mek fɔ tek mɛmba ɛn rɛspɛkt am, ɛn we gɛt in mak nɔ go gɛt blo; de ɛn nɛt, dɛn go de pan tɔmɛnt.” 12So mek Gɔd in pipul dɛn tinap tra nga, dat na dɛn wan we de du wetin Gɔd tɛl dɛn fɔ du ɛn dɛn nɔ lɛf fɔ biliv pan Jizɔs. 13Dɛn a yɛri vɔys na ɛvin de tɔk se, “Rayt wetin a de kam tɛl yu naw: Dɛn pipul we go day fɔseka di Masta, go gladi!” Di Spirit ansa se, “Na tru yu de tɔk, dɛn dɔn dɔn di big wok we dɛn bin de du so, dɛn go blo naw ɛn dɛn go gladi bikɔs dɛn dɔn si wetin di wok we dɛn bin de du, dɔn bring.” 14Wɛn dat dɔn, a luk bak, na de a si wan big wayt klawd. A si lɛkɛ wan mɔta lman sidɔm pan di klawd. I bin wɛr wan gold krawn na in ed ɛn i bin ol sɔntin na in an, dat na da nɛf we fɔ tek kɔt dɛn tin we dɛn plant wɛn dɛn dɔn rɛdi fɔ kɔt. 15Wan ɔda enjɛl kɔmɔt na Gɔd in Os, i ala lawd wan tɛl di pɔsin we sidɔm pan di klawd se, “Tek yu nɛf kɔt dɛn tin we dɔn rɛdi fɔ kɔt, di rayt tɛm dɔn rich, di tin dɛn we dɛn bin plant na wɔl dɔn rɛdi fɔ kɔt!” 16Di pɔsin we bin sidɔm pan di klawd swing in nɛf pan di wɔl; di nɛf kɔt ɔl di tin dɛn we bin dɔn rɛdi fɔ kɔt. 17Dɛn a si wan ɔda enjɛl insɛf kɔmɔt na Gɔd in Os na ɛvin, insɛf bin ol wan nɛf. 18Dɛn wan ɔda enjɛl we bin de gyad di faya, kɔmɔt klos di tebul we dɛn bin de mek sakri fays to Gɔd, kam. I ala lawd wan tɛl di enjɛl we ol di nɛf se, “Tek yu nɛf, kɔt dɛn greps we dɛn go tek mek wayn, dɛn dɔn rɛp!” 19Na de di enjɛl tek in nɛf swing am rawnd pan di greps, i kɔt dɛn kɔmɔt pan di an dɛn, ɛn ib dɛn insay di ol we dɛn de kwis dɛn fɔ mek wayn. Dis sho aw Gɔd vɛks bad ɛn aw i go pɔnish dɛn wan we i vɛks pan. 20Di ol we dɛn bin kwis di wata kɔmɔt pan di greps nɔ bin de insay di tɔng; plɛnti blɔd kɔmɔt insay di ol ɛn rɔn te i rich tu ɔndrɛd mayl ɛn na fayv fut di blɔd bin dip.

will be added

X\