KO Ɔ NUNDENƐ 12

1Dɛn a si wan wɔnda ful tin ɔp na di klawd. Wan uman bin de we di san kɔba lɛkɛ klos, di mun bin de ɔnda in fut, i bin wɛr krawn, we dɛn tek twɛlv sta mek, na in ed. 2I bin lɛf lili bit fɔ am fɔ bɔn, so di pen we i bin de pas bin mek i de ala. 3Wɛn dat dɔn, wan ɔda wɔnda ful tin bin bi ɔp na di klawd. Wan big big rɛd snek we dɛn kɔl dragɔn bɔs kɔmɔt, i bin gɛt sɛvin ed ɛn tɛn ɔn, ɛn ɔl di sɛvin ed dɛn bin gɛt wan wan krawn pan dɛn. 4I tek in tel drɔ wan pan ɛvri tri sta kɔmɔt ɔp na di klawd, ib dɛn dɔng pan di wɔl. I go tinap bifo di uman we bin fɔ bɔn, so dat i kin it in pikin jɛs i bɔn am so. 5I nɔ tu te, di uman bɔn wan bɔy pikin, we go rul oba ɔl dɛn neshɔn wit staf we dɛn tek ayɛn mek. Bɔt sɔmbɔdi jɔg di pikin rɔn kɛr am go to Gɔd we sidɔm na di ay chia we king kin sidɔm fɔ rul. 6Di uman rɔnawe go na di dɛzat, na di say we Gɔd bin dɔn mek fɔ am, na de i go de fɔ wan tawzin, tu ɔndrɛd ɛn siksti de, ɛn pɔsin go de mɛn am. 7Wantɛm, wa fɔdɔm na ɛvin, Maykɛl ɛn in enjɛl dɛn go fɛt di dragɔn, di dragɔn insɛf fɛt bak wit in yon mɛse nja dɛn; 8bɔt Maykɛl ɛn in enjɛl dɛn win di dragɔn ɛn dɛn nɔ gri mek di dragɔn ɛn in mɛse nja dɛn tap na ɛvin igen. 9Dɛn drɛb di big dragɔn kɔmɔt na ɛvin, ib am dɔng na wɔl! Na in na da snek we dɛn kɔl Dɛbul ɔ Setan, we bin de mek di ol wɔl ful. Dɛn ib am dɔng na wɔl, wit ɔl in mɛse nja dɛn. 10Dɛn a yɛri lawd vɔys de tɔk na ɛvin se, “Di tɛm we Gɔd go sev in pipul dɛn, dɔn kam! Gɔd dɔn sho in pawa naw lɛkɛ king! Krays we i sɛn kam na wɔl dɔn sho in pawa! Di wan we bin tinap bifo Gɔd de tɔk de ɛn nɛt se wi kɔmpin Kristiɛn dɛn du bad, dɔn kɔmɔt na ɛvin, dɛn dɔn ib am na do. 11Wi kɔmpin Kristiɛn dɛn tek di Ship in blɔd ɛn di tru wɔd we dɛn bin de tɛl pipul bɔt Gɔd win am, we i bin de fɛt dɛn; ɛn pantap dat, dɛn gri fɔ wok fɔ Gɔd ɛn day fɔ am. 12So mek gladi de na ɛvin, mek ɔl dɛn wan we lib de gladi! Bɔt bad bad tin dɔn fɔdɔm pan di grɔn ɛn di wata bikɔs di Dɛbul dɔn kam dɔng to una ɛn i vɛks bad bikɔs i no se na smɔl tɛm nɔmɔ lɛf fɔ am.” 13Wɛn di dragɔn si se dɛn dɔn ib am dɔng na wɔl, i bigin rɔnata di uman we bin bɔn di bɔy pikin. 14Sɔmbɔdi bin gi di uman tu wings, dat na da bɔd we dɛn kɔl igul, in big wan, in wing dɛn, fɔ mek i flay go na di ples we de na di dɛzat, we dɛn bin dɔn kip fɔ am, dɛn go de mɛn am de fɔ tri ɛn af ia mek di dragɔn nɔ go ebul du am bad. 15So di dragɔn bigin pul plɛnti wata kɔmɔt na in mɔt we bigin rɔn biɛn di uman fɔ kɛr am go. 16Bɔt di grɔn ɛp di uman; i opin ɛn swɛla di wata we bin de kɔmɔt na di dragɔn in mɔt. 17Fɔseka dat, di dragɔn bin vɛks pan di uman, so i go fɔ go fɛt in ɔda pikin dɛn, dat na ɔl di wan dɛn we de du wetin Gɔd tɛl dɛn fɔ du, ɛn we biliv di tru tin dɛn we Jizɔs sho dɛn ɛn dɛn de fala dɛn. 18Dɛn di dragɔn go tinap klos di wata.

will be added

X\