KO Ɔ NUNDENƐ 10

1Wɛn dat dɔn, na de a si wan ɔda enjɛl we gɛt pawa kɔmɔt na ɛvin kam dɔng. Klawd bin kɔba am lɛkɛ klos, renbo bin de rawnd in ed; in fes bin de shayn lɛkɛ di san, ɛn in fut dɛn bin fiba faya we tinap tret tret wan lɛkɛ pos. 2Wan smɔl pepa we rol we dɛn kɔl “skrol” bin de na in an, di pepa bin opin. I put in rayt fut pan di wata ɛn in lɛf fut pan di dray grɔn. 3I ala lawd wan wit vɔys we fiba layɔn vɔys. Wɛn i dɔn ala dɔn, di sɛvin tɛnda dɛn krak fɔ ansa am. 4Wɛn di tɛnda dɛn bigin tɔk, a bin jɛs want rayt, na de a yɛri vɔys de tɔk na ɛvin se, “Nɔ mek nɔbɔdi no wetin di sɛvin tɛnda dɛn se; nɔ rayt am!” 5Dɛn di enjɛl we a bin si tinap, wit wan fut pan di dray grɔn ɛn wan fut pan di wata, es in raytan ɔp to ɛvin. 6I swɛ bifo Gɔd we de naw ɛn we go de sote go, Gɔd we mek ɛvin ɛn ɔl wetin de insay de. I se, “Tɛm nɔ go wes igen! 7Bɔt wɛn di enjɛl we mek sɛvin blo in trɔmpɛt, Gɔd go du wetin i bin dɔn mekɔp fɔ du we nɔbɔdi nɔ bin no, we i bin tɛl di prɔfɛt dɛn we bin de wok fɔ am.” 8Dɛn di vɔys, we a yɛri, we kɔmɔt ɛvin, tɔk to mi bak se, “Go tek di pepa we dɛn kɔl skrol, we dɔn opin, we di enjɛl we tinap pan di dray grɔn ɛn di wata, ol.” 9A go to di enjɛl go aks am mek i gi mi di lili pepa we dɛn kɔl skrol. I tɛl mi se, “Tek am, it am, i go sawa na yu bɛlɛ, bɔt i go swit lɛkɛ ɔni na yu mɔt.” 10A tek di lili pepa we dɛn kɔl skrol na di enjɛl in an, ɛn it am; ɛn jɛs lɛkɛ aw di enjɛl bin se, i tes swit lɛkɛ ɔni na mi mɔt. Bɔt wɛn a dɔn swɛla am go dɔng, i sawa na mi bɛlɛ. 11Dɛn a yɛri pɔsin de tɛl mi se, “Yu fɔ tɔk Gɔd in mɛsej bɔt plɛnti neshɔn, plɛnti difrɛn pipul dɛn we de tɔk difrɛn difrɛn langwej, ɛn bɔt plɛnti king dɛn wan tɛm mɔ.”

will be added

X\