GBOO FIIPAI KO A 2

1Una nɔ biliv se we una gɛt wanwɔd wit Krays, dat fɔ mek una de kɔrej unasɛf? We Krays lɛk una, dat fɔ mek una tap fɔ wɔri? Una nɔ fil se Gɔd in Spirit we de insay una dɔn mek una ɔl bi wan? Una de sɔri fɔ una kɔmpin ɛn una want du gud fɔ dɛn? 2If na so i bi, una fɔ mek a gladi pas aw a gladi naw fɔ we una gɛt wanwɔd, we una lɛk una kɔmpin, ɛn we una ɔl gɛt wan at ɛn wan maynd fɔ du di wok. 3Una nɔ fɔ jɛs de du dɛn tin we una want fɔ du nɔmɔ, una nɔ fɔ du ɛni tin bikɔs una want mek dɛn prez una; una nɔ fɔ prawd, una fɔ fil se ɔda pipul bɛtɛ pas una. 4Una nɔ fɔ jɛs de mɛmba unasɛf nɔmɔ, una fɔ de mɛmba ɔda pipul. 5Una fɔ de tink ɛn du lɛkɛ Jizɔs Krays: 6Pan ɔl we Jizɔs Krays tan lɛkɛ aw Gɔd tan, i nɔ se paopa in ɛn Gɔd fɔ bi wan. 7Bifo dat, Jizɔs mekɔp fɔ lɛf ɔltin, i lɛf fɔ rul lɛkɛ aw i bin de rul, ɛn i tɔn insɛf to savant. Jizɔs tɔn to mɔtalman ɛn i kam na wɔl lɛkɛ mɔtalman. 8I nɔ luk se in ɛn Gɔd na wan, bɔt i gri fɔ du ɔl wetin Gɔd tɛl am fɔ du, fɔ day sɛf. I gri fɔ day na di krɔs. 9Fɔseka dat, Gɔd mek i sidɔm na ples we sho se na in impɔtant pas ɔl ɛn i gi am nem we sho se i impɔtant pas ɔl. 10So fɔ ɔna Jizɔs, ɔl dɛn wan we de na ɛvin, ɔl dɛn wan we de na dis wɔl ɛn ɔl dɛn wan we de ɔnda dis wɔl, go nil dɔng bifo am, 11ɛn tɔk se Jizɔs na di Masta, ɛn ɔlman go prez Gɔd we na wi Papa. 12Mi padi dɛn we a lɛk bad, jɛs lɛkɛ aw ɔltɛm una kin du wetin a se, di tɛm we a bin de wit una, naw we a nɔ de wit una, i gud fɔ mek una du ɔl wetin a se pas wɛn a bin de wit una; ɛn una fɔ fred Gɔd, dat go mek una du ɔl wetin Gɔd want una fɔ du. 13Gɔd de wok insay una at so dat una go want du wetin in want una fɔ du ɛn fɔ mek una go ebul du am. 14Una nɔ fɔ grɔmbul ɛn una nɔ fɔ agyu wɛn una de du ɛni tin, 15so dat pipul nɔ go pɔynt finga pan una. Dɛn go si se una na Gɔd in pikin dɛn we gɛt klin at ɛn we nɔ miks pan sin. Pan ɔl we una de na wɔl, wit pipul we wikɛd ɛn we de liv bad layf ɔltɛm, una yon layf fɔ tan lɛkɛ layt fɔ dɛn. 16Una fɔ de tɛl dɛn Krays in wɔd we de gi layf, so dat di de we Krays go kam a go fil prawd, bikɔs ɔl di wok we a dɔn wok wit una nɔ go fɔ natin. 17If dɛn gɛt fɔ kil mi sɛf ɛn di day we a day go tan lɛk sakri fays ɛn wit unasɛf yon sakri fays we una de mek to Gɔd dat na di biliv we una biliv pan Krays, a gladi ɛn a de mek una no se a gladi; so dat unasɛf go gladi wit mi. 18Semwe so, unasɛf fɔ gladi ɛn mek a no se una gladi so dat misɛf go gladi wit una. 19If Masta Jizɔs gri, a go sɛn Timoti to una, i nɔ go te igen; so dat i go tɛl mi bɔt una wɛn i kam bak ɛn dat go kɔrej mi. 20Timoti de mɛmba una lɛkɛ aw misɛf de mɛmba una. Pan ɔl dɛn ɔda Kristiɛn, na in wan gren a si se want fɔ ɛp una, fɔ tru. 21Ɔl di ɔda pipul dɛn de wok fɔ dɛnsɛf nɔmɔ, dɛn nɔ de wok fɔ Krays. 22Bɔt una no se Timoti dɔn pruv insɛf se in de du di wok gud. I de wok wit mi, lɛkɛ se in na mi pikin ɛn mi na in papa, fɔ mek mɔ ɛn mɔ pipul biliv di Gud Nyus. 23A de abop fɔ sɛn Timoti go to una wɛn a no wetin go apin to mi. 24Ɛn a biliv se i nɔ go te igen, di Masta go gri fɔ mek misɛf go to una. 25A tink se i go gud fɔ mek a sɛn Ɛpa fro daytɔs, we biliv Krays lɛkɛ wisɛf, go bak to una. Na una bin sɛn am kam to mi ɛn i kin ɛp mi ɛnitɛm we a want sɔntin. I de wok wit mi, ɛn insɛf na Krays soja man. 26Ɛpa fro daytɔs want fɔ si una bad wan; i wɔri bad bikɔs una bin dɔn yɛri se i bin sik. 27Na tru, i bin sik, i bin lɛf lili bit mek i day, bɔt Gɔd sɔri fɔ am, ɛn Gɔd sɔri fɔ misɛf bikɔs Gɔd nɔ gri fɔ mek ɔda waala mit mi bifo wan dɔn. 28Na dat mek a want sɛn Ɛpa fro daytɔs to una bad wan, so dat una go gladi wɛn una si am bak ɛn dat go mek a nɔ wɔri tumɔs igen. 29Una fɔ gladi fɔ am wɛn i go to una bikɔs na una Kristiɛn brɔda; una fɔ rɛspɛkt pipul lɛkɛ dɛn wan de. 30Na fɔseka Krays in wok, i put in layf pan denja ɛn i niali day fɔ mek i ebul du ɔl wetin una bin sɛn am fɔ kam du fɔ mi, we unasɛf nɔ gɛt chans fɔ kam du.

will be added

X\