GBOO FIIPAI KO A 1

1Na wi, Pɔl ɛn Timoti, we de wok fɔ Krays Jizɔs, de sɛn dis lɛta to ɔl dɛn pipul we de na Fili pay we gɛt wanwɔd wit Krays Jizɔs. Semwe so, wi de sɛn am to dɛn chɔch ova sia ɛn dɛn pipul we de ɛp pan di chɔch wok. 2Mek Gɔd we na wi Papa ɛn wi Masta Jizɔs Krays blɛs una ɛn gi una kol at. 3Ɛnitɛm we a mɛmba una a kin tɛl mi Gɔd we a de pre to, tɛnki; 4ɛn a kin gladi fɔ pre fɔ una ɔltɛm. 5A kin tɛl Gɔd tɛnki fɔ we una de ɛp mi fɔ tɛl ɔda pipul di Gud Nyus frɔm di fɔs de we a bigin dis wok na Fili pay sote naw. 6A biliv se Gɔd, we bigin du dis gud wok ya insay una at, go stil de du am sote di de we Jizɔs Krays go kam bak. 7Una de na mi at ɔltɛm ɛn na so i fɔ bi bikɔs una de ɛp mi pan dis wok, we Gɔd gi mi dis wɔnda ful chans fɔ du, naw we a de na jel ɛn dɛn tɛm we a bin fri fɔ tɛl ɔlman di Gud Nyus ɛn sho dɛn se na tru, fɔ mek dɛn biliv am mɔ ɛn mɔ. 8Gɔd insɛf no se a lɛk una wit ɔl mi at lɛkɛ aw Jizɔs Krays lɛk wi. 9A de pre fɔ mek una lɛk Gɔd ɛn una kɔmpin mɔta lman mɔ ɛn mɔ, ɛn mek una no bɔt Gɔd mɔ ɛn mɔ, ɛn sabi mɔ ɛn mɔ wetin gud ɛn wetin bad, 10so dat una go no wetin rayt na Gɔd in yay ɛn gladi fɔ du am, ɛn una nɔ go gɛt ɛni tin we bad na una layf di tɛm we Krays kam bak. 11A de pre mek una waka tret ɛn du dɛn gud tin we Jizɔs Krays in wan gren nɔmɔ ebul mek in pipul dɛn du, ɛn dat go mek ɔda pipul rɛspɛkt ɛn prez Gɔd. 12Mi kɔmpin Kristiɛn dɛn, a want mek una no se wetin dɔn bi to mi dɔn ɛp fɔ mek di Gud Nyus prɛd ɔlɔbɔt. 13Ɔl dɛn soja man sɛf we de gyad di King in os ɛn dɛn ɔda pipul dɔn no se pipul put mi na jel bikɔs a de wok fɔ Krays. 14Pantap dat, bikɔs a de na jel, di Kristiɛn dɛn we de abop pan di Masta mɔ ɛn mɔ, de plɛnti mɔ ɛn mɔ ɛn dat mek dɛn nɔ de fred fɔ tɔk Gɔd in wɔd ɛn dɛn nɔ bisin bɔt wetin pipul go du dɛn. 15Na tru se, sɔm pipul de we de tɔk bɔt Jizɔs Krays bikɔs dɛn de jɛlɔs mi ɛn dɛn want sho se dɛn de wok pas mi, bɔt ɔda pipul de we de tɔk bɔt Jizɔs Krays bikɔs dɛn want fɔ du wetin rayt. 16Dɛn pipul we de tɔk bɔt Krays bikɔs dɛn want du wetin rayt na dɛn wan we lɛk Gɔd, we no se Gɔd mek a kam na ya so dat ɔda pipul go no se di Gud Nyus we a de tɔk, na tru. 17Di ɔda pipul dɛn we de tɔk bɔt Jizɔs Krays, nɔ de du so wit klin at, na dɛnsɛf nɔmɔ dɛn de mɛmba wɛn dɛn de du so; dɛn min se dɛn go mek a sɔfa mɔ ɛn mɔ na jel we dɛn de du so. 18Fɔ mi yon pat, if na gud dɛn mɛmba we dɛn de tɔk bɔt Krays ɔ if na bad, dat nɔ mata; wans nɔmɔ dɛn de tɛl ɔda pipul bɔt Jizɔs Krays, a gladi; ɛn a go gladi mɔ ɛn mɔ, 19bikɔs a no se ɔl wetin dɛn de du go mek a fri wan de, bikɔs una de pre ɛn Jizɔs Krays in Spirit de ɛp mi fɔ mek a fri. 20A abop wit ɔl mi at se a nɔ go shem fɔ ɛni tin we a de du, ɛn a go gɛt di kɔrej fɔ tinap fɔ Krays, so dat if a day ɔ if a nɔ day, wetin a de du go mek ɔda pipul prez Krays. 21Fɔ mi yon wan pat, a liv ɔl mi layf fɔ Krays nɔmɔ, bɔt if a day, a go gɛt layf we bɛtɛ pas dis layf. 22Bɔt if a liv a go du mɔ wok fɔ Krays we go ɛp ɔlman, so naw a nɔ no wetin a want: fɔ day ɔ fɔ liv. 23Sɔntɛm a kin want liv, sɔntɛm a kin want day: a want kɔmɔt na dis wɔl ɛn go to Jizɔs Krays, ɛn dat go bɛtɛ fɔ mi fawe pas fɔ de na dis wɔl, 24bɔt i go bɛtɛ fɔ una if a stil de na dis wɔl, so dat a go ɛp una. 25A shɔ se i go bɛtɛ fɔ una if a de na dis wɔl, na dat mek a no se a nɔ go day yet, a go de wit una fɔ ɛp una fɔ biliv pan Jizɔs Krays mɔ ɛn mɔ, ɛn fɔ mek una gladi mɔ bikɔs una biliv pan Krays. 26So dat wɛn a kam luk una bak, una go prez Jizɔs Krays fɔseka di ɛp we a ɛp una. 27Bɔt na wan tin nɔmɔ, una fɔ liv lɛkɛ pipul we dɔn biliv di Gud Nyus bɔt Krays. So if a de wit una, ɔ if a nɔ de wit una, a want fɔ yɛri se una stil biliv pan Jizɔs, una gɛt wanwɔd, ɛn una ɔl want fɔ du di sem tin, dat na fɔ tɛl pipul di Gud Nyus. 28Una nɔ fɔ fred se dɛn pipul we nɔ lɛk una go mek una sɔfa, bɔt una fɔ gɛt kɔrej; dat go sho dɛn se Gɔd de wit una ɛn i go sev una, bɔt dɛn yon layf nɔ go bɛtɛ. 29Na Gɔd insɛf gi una dis wɔnda ful chans fɔ biliv pan Krays ɛn fɔ sɔfa fɔseka am. 30So una fɔ jɔyn mi naw fɔ fɛt fɔ di Gud Nyus lɛkɛ aw a bin de fɛt fɔs tɛm ɛn we una dɔn yɛri se a de fɛt te naw.

will be added

X\