MATIU 9

1Jizɔs tek bot krɔs Lek Galili go na in tɔng, dat na Kepanyɔm. 2Sɔm pipul kɛr wan man we para layz go mit am, di man bin ledɔm na mata. Wɛn Jizɔs si se dɛn biliv se in go mɛn di man, i se, “Mi pikin, nɔ mek yu at pwɛl; Gɔd dɔn padin yu sin dɛn. ” 3Wɛn dɛn yɛri dat sɔm Ju Lɔ ticha dɛn bigin tɔk to dɛn kɔmpin se, “Dis man, Jizɔs, de pwɛl Gɔd in nem we i de mek insɛf lɛkɛ Gɔd.” 4Nɔbɔdi nɔ tɛl Jizɔs, bɔt i no wetin di Ju Lɔ ticha dɛn bin de tɔk to dɛnsɛf, so i se, “Wetin du una de mɛmba bad? 5I izi fɔ tɔk se, ‘Gɔd dɔn padin yu sin dɛn’, pas fɔ se, ‘Grap, waka?’ 6A go sho una se Mɔta lman Pikin gɛt pawa na dis wɔl fɔ padin pɔsin sin.” So Jizɔs tɛl di man we para layz se, “Grap, tek yu mata ɛn go na yu os.” 7Di man grap ɛn go na in os. 8Wɛn di pipul dɛn si wetin bi, dɛn fred ɛn prez Gɔd fɔ we i gi mɔta lman da pawa de. 9Jizɔs kɔmɔt na di ples we i bin de. As i de go, na in i si wan man we nem Matyu. Na bin man we de gɛda taks fɔ di gɔvmɛnt, i bin sidɔm na in ɔfis. Jizɔs kɔl am. I se, “Kam bi mi lanin bɔy.” Matyu grap ɛn bigin fala Jizɔs. 10Wɛn Jizɔs bin de it na Matyu in os, plɛnti pipul we bin de gɛda taks ɛn dɛn Ju pipul we dɛn Ju bigman nɔ bin lɛk, bikɔs dɛn bin fil se dɛn nɔ de kip di Ju Lɔ gud, bin sidɔm de it wit Jizɔs ɛn in lanin bɔy dɛn. 11Wɛn sɔm pan di Faresi dɛn si dat, dɛn aks Jizɔs in lanin bɔy dɛn se, “Wetin mek una ticha de it wit dɛn kayn pipul ya?” 12Jizɔs yɛri wetin dɛn tɔk, so i ansa dɛn se, “Nɔto dɛn pipul we wɛl fɔ go to dɔkta, na dɛn pipul we sik. 13Una go ɛn fɛnɔt wetin dɛn bin min wɛn dɛn rayt na Gɔd in Buk se, ‘Gɔd want mek una sɔri fɔ ɔda pipul ɛn du dɛn gud, i nɔ want dɛn bif sakri fays we una de mek!’ A nɔ kam tɛl dɛn pipul we de du wetin di Lɔ we Gɔd gi Mozis se fɔ chenj dɛn layf, bɔt a kam tɛl dɛn pipul we de pan sin fɔ mek dɛn chenj dɛn layf.” 14Jɔn we bin de baptayz, in lanin bɔy dɛn kam to Jizɔs, dɛn aks am se, “Wetin mek wi ɛn di Faresi dɛn de kip fast, bɔt yu lanin bɔy dɛn nɔ de fast?” 15Jizɔs ansa dɛn se, “Una min se dɛn pipul we dɛn kɔl na mared pati go kray wɛn di ɔkɔ de wit dɛn? Nɔba! Bɔt di tɛm de kam we dɛn go pul di ɔkɔ na dɛn an, na da tɛm de dɛn go kip fast. 16“Nɔbɔdi nɔ go tek nyu pisis fɔ pach ol klos, bikɔs wɛn di nyu pisis de shrink, i go chɛr di ol klos, ɛn di ples we chɛr go big pas aw i bin tan. 17Ɛn nɔbɔdi nɔ go tek ol tin we dɛn tek bif kanda mek lɛkɛ bɔtul, put nyu wayn insay, if i du dat, di nyu wayn go bɔs di bif kanda ɛn di wayn go wes. Na nyu bɔtul dɛn go mek wit bif kanda fɔ put nyu wayn, da tɛm de di wayn nɔ go wes ɛn di bif kanda nɔ go pwɛl.” 18Jizɔs bin stil de tɔk to Jɔn in lanin bɔy dɛn, na in wan Ju bigman na di Ju mitin os kam nil dɔng bifo in fut, i se, “Mi gyal pikin dɔn day, bɔt kam go put yu an pan am ɛn pre fɔ am so dat in layf go kam bak.” 19So Jizɔs grap ɛn fala am go, in lanin bɔy dɛnsɛf go wit am. 20Wan uman we bin dɔn de blid fɔ twɛlv ia, kam biɛn Jizɔs ɛn tɔch di bɔtɔm pat pan Jizɔs in klos. 21Di uman tɔk na in at se, if in tɔch Jizɔs in klos, in go wɛl. 22Jizɔs tɔn rawnd; wɛn i si di uman, i se, “Mi pikin, nɔ mek yu at pwɛl! Di biliv we yu biliv pan mi dɔn mek yu wɛl.” Na in di uman wɛl wantɛm. 23Wɛn Jizɔs go na di Ju bigman in os, i si ɔl di pipul dɛn we go fɔ ple flut na di bɛrin ɛn ɔlman bin de kray, so nɔys bin de ɔlɔbɔt. 24Na in i se, “Ɔlman go na do. Di pikin nɔ day, na slip i de slip.” Ɔl di pipul dɛn bigin laf Jizɔs. 25Wɛn dɛn dɔn mek ɔlman kɔmɔt insay di os, Jizɔs go insay di rum we dɛn bin le di gyal pikin, i ol in an, na in di pikin grap. 26Di nyus bɔt wetin Jizɔs du prɛd ɔlɔbɔt na da eria de. 27Wɛn Jizɔs kɔmɔt na da ples de, de go, tu blɛnyay man bin de fala am, de ala se, “Yu we na Devid in pikin, sɔri fɔ wi, sa!” 28Wɛn Jizɔs go insay wan os, di blɛnyay man dɛn go mit am, na in i aks dɛn se, “Una biliv se a ebul fɔ mɛn una?” Dɛn ansa se, “Yɛs, sa.” 29Jizɔs tɔch dɛn yay ɛn se, “Mek wetin una biliv bi!” 30So dɛn yay opin ɛn dɛn bigin si. Jizɔs wɔn dɛn tra nga wan. I se, “Una nɔ tɛl ɛnibɔdi wetin jɛs bi so.” 31Bɔt di man dɛn go tɛl pipul bɔt Jizɔs, ɛn di nyus prɛd ɔlɔbɔt na da eria de. 32Jɛs di tu man dɛn we bin blɛn, de go, na in sɔm pipul bring wan mumu man, we dɛbul de insay, kam to Jizɔs. 33Jɛs Jizɔs drɛb di dɛbul kɔmɔt insay di man so, na in di man bigin tɔk, ɛn ɔlman wɔnda, dɛn se, “Wi nɔ si tin lɛkɛ dis na Izrɛl wande!” 34Bɔt di Faresi dɛn se, “Na Setan we na di dɛbul dɛn edman gi Jizɔs pawa fɔ drɛb dɛbul.” 35Jizɔs go ɔlɔbɔt na dɛn tɔng ɛn vilej, de lan pipul na dɛn Ju mitin os ɛn tɛl dɛn di Gud Nyus bɔt Gɔd in rul, ɛn i mɛn dɛn pipul we gɛt ɔl kayn sik. 36Wɛn Jizɔs si di krawd, i sɔri fɔ dɛn, bikɔs dɛn bin kɔnfyus ɛn dɛn nɔ bin ebul fɔ ɛp dɛnsɛf, jɛs lɛkɛ dɛn ship we nɔ gɛt shɛpad fɔ mɛn dɛn. 37So i bigin tɔk to in lanin bɔy dɛn. I se, “Dɛn pipul ya tan lɛkɛ plɛnti tin we dɛn plant we dɔn du fɔ kɔt, bɔt di wokman dɛn we fɔ gɛda dɛn ɛn bring dɛn kam to Gɔd, nɔ plɛnti. 38Na dat mek una fɔ pre to Gɔd we na di Masta fɔ sɛn mɔ pipul fɔ kam gɛda dɛn pipul ya ɛn bring dɛn kam to am.”

will be added

X\